نفسك فيي سواق خاص يريحك من عذاب القيادة.. اتفضل ممكن أفيدك
السائق الخاص
لحد فترة قريبة جدا (سنتين) كنت لا أؤمن تماما بفكرة ان يكون في حد بيسوقلي .. طب ليه هو انا اعرج .. و بعدين كنت باسمع عن مشاكل كتير بتحصل بسبب السواقين .. و لذا تحاشيت هذا الأمر ..
ثم مرض والدي رحمة الله عليه فاضطررت لتعيين سواق خصوصي علشان مكونتش قادر الاحق على المشاوير..
في خلال السنتين دول تناوب عليا عدد كبير من السواقين مما يمكنني من عرض تجربتي لعلها تكون مفيدة ..
لماذا نحتاج الى سواق:
1 - عادة احنا كلنا بنسوق فترات طويلة بنكون فيها سايقين بنص عقل (نص تركيز يعني) و النص التاني مركز في البيت و العيال و الشغل و المشاكل ... و ده بيتحسن كتير في وجود سائق محترف
2 - احنا لو حسبنا الفلوس اللي بندفعها تيبسات (بقشيش يعني) للبواب اللي بينضف العربية و باركات وسط البلد سواء القانونية او الاجبارية و و حسبنا البنزين اللي بنحرقة في البحث عن ركنة و قيمة الوقت اللي بيضيع في مشوار تافه مش محتاج وجودك اصلا و صيانات العربية و توصيل المدام و الاولاد و ماما الحاجة و حماتك و بقشيش الولد اللي بيشيل مشتروات السوبر ماركت هتلاقي انك بتدفع تقريبا اكتر من مرة و نص مرتب السواق و انت شغال عبد مملوك عند كل الناس دول ..
3 - للستات و ربات البيوت اللي بيسوقو و هم مركزين في الحلل او مستعجلين يلحقو الولد اللي مركون على رصيف المدرسة او ميعاد تدريب السباحة بتاع البنت.. مرتب السواق في ستة اشهر بيساوي تقريبا تمن تصليح العربية خلال نفس الفترة .. حيث ان متوسط الحوادث الحريمي هي 3 الى 5 حوادث سنويا (باكرر ده للنوعية دي بس من الستات)
* مرتبات السواقين
تتراوح مرتبات السواقين الملاكي بين 600 و 1200 جنيه و الفرق الكبير ده سببه فرق سنين الخبرة و المؤهلات الدراسية و البعد أو القرب بين سكن السواق و سكنك
المتوسط لسائق عمره 30 الى 40 سنة هو 750 جنيه
يفضل دفع مرتب السواق اسبوعيا
ليه
علشان هو كده كده مهما كان مرتبه هيطلب منك فلوس قبل اخر الشهر حيث ان (الكاشات خلصت يا باشا) فعلشان تريح دماغك اديله مرتبه بالاسبوع مع العلم ان الشهر 4 اسابيع و نصف (ما عدا فبراير)
* الورق المطلوب من السواق
طبعا الرخصة و البطاقة اصول (لازم يكونو معاه مفيش حاجة اسمها معايا الصورة فقط او اصلي بغير العنوان في الرقم القومي)
فيش و تشبيه موجه لك شخصيا
صورة مؤهل دراسي ان وجد (لو مفيش لازم تمتحنه في القراءة) مينفعش سواق لا يقرأ هيلبسك في الحيطة
وصل نور يطابق عنوان البطاقة و ان لم يوجد فلابد من عقد ايجار او تمليك بعنوانه الحالي مع زيارة مفاجأة منك للبيت عنده ( ساعة مغربية كده) و يكون هو معاك فيها .. لاحظ انطباعات الناس في الحته بتاعته و هو داخل عليهم
* الورق اللي يملاه السواق
طلب وظيفة بخط يده ( و دي بتكون مفيده جدا و هاقولك ليه) فور موافقتك عليه
عقد سائق خصوصي ( نسخة واحدة تظل معك) برضو فور الموافقة و يكتب فيه انه سائق تحت التدريب بمكافأة لمدة 3 او 6 اشهر (لتجنب المسائلة الضريبية)
عقد ادارة و مسئولية ( انه سائق له الحق في ادارة السيارة و المشي بها في الشوارع و دفع المخالفات مع مسئوليته الشخصية عن سلامة كلا من السيارة و الركاب و سيارات الغير و المشاة من الساعة 9 ص الى 6 مساءا مع احتمال تمديد هذه الفترات لمقتضيات العمل) و هذا العقد يصدق عليه من الشهر العقاري و يكتب فيه مرتب لا يزيد بحال عن 200 جنيه (و ده بيكون خلال اسبوع من الموافقة)
فائدة العقد ده انه لو لا قدر الله السواق خبط حد و الحد ده مات او اصيب .. ابسط شيء هيعمله انه هيسيب العربية و يخلع
ايصال أمانة بقيمة لا تقل عن 20 الف جنيه و هذا شرط لا تتهاون فيه بأي حال من الاحوال (كلهم بيرفضو في البداية بس بيوافقو في النهاية) و هنا تظهر قيمة طلب الوظيفة المحرر بخط يده لمطابقة الخطوط
الحلقة الجاية انواع السواقين و طرق تقييمهم و الاسلوب الامثل للتعامل معاهم
ده لو الموضوع عجبكم
