الوكيل بيشترط تسليم العربية بعد الحصول على المبلغ نقدا أو بشيك أو بتحويل على حسابه في البنك و لا يقبل التفويض أو التعهد الذي تتعامل به البنوك إطلاقا.

الوكيل بيتعامل مع 3 بنوك:
- العربي الإفريقي
- بنك أبو ظبي
- البنك الوطنى للتنمية (إسلامي)

و دول مفيش مشاكل معاهم خالص لأنهم بيدفعوا للتوكيل بمجرد تسليم العربية و قبل الترخيص و بالنسبة للأخير لو هاتدفع 25% بيبقى النسبة 9.5% و لو 40% أو 50% هاتبقى 9%

انا كنت رحت لبنك فيصل الإسلامي و عملت كل حاجة و خلصوا و كان ميعادي معاهم الثلاثاء قبل الماضي (7 يوليو) لكن لظروف سفري أجلت للأحد الماضي (19 يوليو) و رحت فعلا البنك و خلصت الورق و الشيكات و الجوابات كلها في ساعتين و رحنا الوكيل .. طبعا مندوب البنك كان معاه تفويض (تعهد) من البنك بسداد كامل القيمة بعد الترخيص لكن في سكودا رفضوا الموضوع تماما و أصروا على الاستلام بالشيك!! و اضطريت إني الغي التعاملات كلها مع فيصل و أعملها تبع البنك الوطني للتنمية و استنى كمان اسبوع أو اكتر (الله أعلم) عشان توكيل سكودا هو الوحيد في مصر اللي بيتعامل بالطريقة دي.

خلاصة الكلام:
لو هاتتعامل مع توكيل سكودا يبقى يا إما نقدا أو بالتقسيط تبع أحد البنوك الثلاثة السابق ذكرها توفيرا للوقت و المشقة.

ملحوظة: حاولت إلغاء حجز العربية عشان أقدر اشتريها من معرض تاني تبع بنك فيصل قالولي هانخصم 400 جنيه عشان ما كملتش إجراءات التعاقد !!! رغم إن المشكلة عندهم مش عند حد تاني! طبعا إخترت أخسر 100 جنيه مصاريف إستعلام مع فيصل و أنتظر كام يوم على ما البنك التاني يخلص إجراءاته خاصة إن اللون اللي كنت عاوزه مش موجود في المعارض بره.