ارجو النصيحة سريعا :) - ارخص اسعار لمكيفات كاريراو شارب من فين ؟ و بالتقسيط ؟

**CryptonX** · 21-07-2009 11:36 AM

السلام عليكم .

ياجماعة انا مزنوق جدا في الوقت و عايز اشتري مكيفين كاريراو شارب جداد الاسبوع ده .

الاتنين سبليت حائطي ,

واحد 1.5 حصان بارد فقط ( ان وجد بارد فقط ) .
واحد 3 حصان بارد فقط ( ان وجد بارد فقط ) .

المشكلة ان الراجل الي بنتعامل معاه دائما معندوش الا كارير حاليا و انا بسمع الناس كلها بتقول شارب هو رقم واحد الان ..

الراجل قالي التكيفين دول علي 24 شعر من غير فوائد ( الكارير ) = 460 جنيه مصري ( بارد ساخن )

الشارب بارد فقط = 440 جنيه مصري .

مع ان الناس كلها بتقولي شارب اغلى !

المهم !

انا عايز اعرف عنوان او رقم شركة خاصة بالتكييف وعندهم تقسيط و يكون حد جربهم يا ريت

علشان اقارن بس الاقساط و الفوائد و مين احسن .. و اكون شاكر جدا .

**M.almaghraby** · 21-07-2009 06:07 PM

شارب يا باشا و مش حتندم

تكيف جميل جدا

و اوعي حد يجيب يونيون اير

**CryptonX** · 21-07-2009 06:22 PM

المشاركة الأصلية كتبت بواسطة muslem

والله الراجل سعره رخيص يعني لانى كلمت ناس تانية قالوا لى على اسعار اغلى

بس انصحك تكلم توكيل لشارب في منهم بيقسطوا كنت شفت اعلان لهم فىالوسيط
فى توكيل لشارب اسمه مسسة الجمال التجارية بيقسط و ده تليفونه
26836828
موبيل 0101692365
على فكرة انا مكلمتش التوكيل انا كنت شايل النمرة بس علشان اسال و برضوة مسألتش لاشغال الحياة

الف شكر يا استاذ مسلم .

هو سعره كويس و من غير اجرائات بالنسبة لي علشان تبع الشغل بس المكشة انه معندوش شارب حاليا و كل الناس بترجحلي شارب .

460 جنيه الي انا كاتبهم, انا كتبت غلط " من غير فوائد " هما بفوائد بس من غير مقدم .

المشاركة الأصلية كتبت بواسطة drguevara

شارب يا باشا و مش حتندم

تكيف جميل جدا

و اوعي حد يجيب يونيون اير

شكرا يا دكتور , اه منا عارف يونيون اير ده كان ظاهرة و اختفى :)

**M.almaghraby** · 22-07-2009 01:32 AM

الشارب احسن من الكارير

**askoda** · 22-07-2009 11:20 AM

So what about TRANE??

**أبو_يوسف** · 22-07-2009 11:32 AM

الشارب جهاز محترم جدا ويتحمل الشغل
بس في أجهزة تانية مش مشهورة زيه واقوى
زي الترين والباور
واعتقد الكرافت كويس برضه..
لو عايز تقسيط ممكن عتمان اللي في شارع النادي الأهلي (حسن المأمون)
او في هايبر وان في بارتشن لشارب

**tamer_a7** · 22-07-2009 01:41 PM

في رايي الشخصي اولا قبل شارب او كارير او كرافت وهما دول اللي المفروض تفكر فيهم
عليك وعلي التوكيل قسط من هناك واوعي ثم اووعي من شركات التكييف التنيه يقولك وكيل معتمد ابويا هو صاحب الحاج كاريير ذات نفسه ما تكولش من الكلام ده
التوكيل ثم التوكيل علشان الضمان يبقي محترام والتركيب كمان يبقي محترم
اخيرا وليس ااخرا انا عندي كارير شباك 3 حصان وباور شباك 1.5 وبور اسبليت 2.25 بصراحه اتفو علي بور في جميع اشكاله وانواعه
اما كارير فدا معجزه رائعه وللعلم بس هو احسن من شارب لما بيقدم لان الاتنين عندنا في الشغل وتبريد دا احسن من دا بكتير لما الزمن مر عليهم وطبعا اتطحنو الاتنين كارير افضل
بالنسبه لكرافت طبعا ماركه عالميه ما عليهاش غبار بس لو في توكيل مضمون هنا في مصر مش مجرد حد بيبيع وانت تعيش مع نفسك بعد كده

**CryptonX** · 22-07-2009 02:25 PM

الف شكر ليكم جميعا يا جماعة الحمد الله تعاقدت على ال 2 كارير (1.5حصان و 3 حصان ) بارد- ساخن .

و ان شاء الله يركبوا انهاردة و اقولكم الاخبار .

اصل احنا عندنا تكيفات ماشاء الله من العصر الحجري ماركة غربية كدة اسمها " فيليكو " و كل الي بتعمله دلوقتي انها تستهلك الكهرباء و تطلع صوت :)