الموضوع: المشكلة قائمة وازدادت سوءآ بعد مارحت لسيد الفراش !!!!

سلام عليكم

ده الموضوع الأولاني اللي كنت فاتحه بخصوص مشكلة العربية في الدواره وده اللينك بتاعه

http://www.nilemotors.net/Nile/a/84840-a.html

بناءآ علي نصيحة الأعضاء هنا وكلامهم روحت لسيد الفراش في الحرفيين شرحتله المشكلة كاملة وايه اللي حصل وكل حاجة روحتله يوم الجمعة بعد الصلاة مباشرة وبدء يشتغل في العربية واحد عنده اسمه خالد بدء يشتغل في العربية ويجرب ويدور ويفك دي ويركب دي المهم وصل الكلام انه معرفش فيها ايه بالظبط من الكشف المبدئي طلب مني اسيبهاله تبات عنده لأنه عاوز يفك الموتور من جوه ويشوف ويطمن وكده سبتهاله في الورشة ومشيت

اليوم التاني كلمني في نص اليوم وقالي انه اكتشف ان صبابات البنزين فيها مشكله وبتاع وان سير الكاتينة شكله قديم وعلي الأخر وسألني تحب اغيره !! قولتله اه غيره وقالي ان بعد مايظبط موضوع الصبابات ده هتشتغل تمام وهتدور علي طول لأن ده وضع طبيعي انها متشتغلش فرحت واطمنت !

بعدها بساعة كلمته تاني قالي والله انا دورتها وكانت تمام بتاع 10 مرات ورا بعض وعادي ولما مشيت بيها شوية رجعت تبطء في الدوارة تاني !!! الله اعلم طبعآ كلامه صح ولا غلط قفلت معاه ونزلته روحتله لقيته فاتح وفاكك العمة وكده وماسك الكربراتير بينظفه قعدني بعدها للساعة 11 ولا 12 بالليل ولا حياة لمن تنادي يجرب دي ويشيل دي ويحط دي ولا الهوا العربية مش بتدور برضة بسرعة ولا حاجة وقالي انه فك الموتور كله ومفيهوش حاجة وكلام كده بعدها جه سيد الفراش قالي انا اسف والله مش عارفين نعمل فيها ايه مفيش قدامنا غير اننا نفك الموتور عشان نشوف البساتم !! طبعآ الكلمة غاظتني جدآ امال انتوا طول النهار فكيتوا ايه ولا بتعملوا ايه وطبعآ كلفني بعض التكاليف اللي ملهاش اي لازمة غير ان جيبي يفضل ينزل فلوس والسلام !!!! وكانت كالأتي

خرط وش السلندر من تاني !!!

جاب جوان للموتور من تاني !!!!!!

غير سير الكاتينة بحجه انه قديم مع ان شكله والله اعلم جديد لانج !!!!!

اللي حرق دمي اكتر ان سيد الفراش قاله متحسبش البشمهندس علي اللي حصل في العربية وبتاع وكلمتين نعناع من بتوع الصنايعية دول كنت انا حاسبت الراجل علي قطع الغيار والحاجت اللي جابها خلاص ومستعد اني اغادر المكان راح خالد قاله بالظبط والله ماحسبته علي حاجة انا بس اخدت تمن قطع الغيار قاله طيب وجه سيد قالي احنا اسفين علي الوقت وبتاع وتعالي يوم تاني مش هنسيبها الا لما نظبطها وكلمتين حلوين سكتت برضة وقلت ماشي خرجت برة وجيت ادور وامشي لقيتهم بيتكلموا سوا جوه الورشة وبعدين نده عليا الأسطي خالد قالي فيه 25 جنيه كمان بقوله بتوع ايه قالي مسامير معرفش ايه كده !!!!! اي كلام في اي كلام دفعتهم وطلب من الأسطي خالد اني اوصله لأنه طريقه طريقي علي حسب ما عرفت والحمد لله اني عملت كده لأني فوجئت وانا راكب معاه بالتالي

سحب العربية بقي زي الزفت انا عمري مادوست الدواسة للأخر !!! كنت بجيب 120 والدواسة في النص لسه !!! لما ركب معايا دوست الدواسة علي الأخر والعربية مش بتجيب وقفت علي جنب وقالي متقلقش انا معايا العدة وقعد يلعب في العربية شوية ومشيت ولسه المشكلة قائمة قعد يفتح ويلعب وهكذا لغاية الساعة 1 بالليل !!!!! لما بجد كرهت نفسي وفي الأخر حسنها شوية وخلاها تمشي بس حتة الأن سحب العربية بقي زفت وخصوصآ لو حد ركب معايا !!!!

طبعآ مسكته قعدت اقطم فيه وفي ورشته وفي الأسطي سيد الفراش بتاعه مردش عليا وقعد يقولي هنظبطها وهنعملها وكلام نعناع كله وعمل حركة بجد ملهاش اي لازمة علي العربية جامد عشان لما اجي ادورها تلقط معايا اسرع طبعآ العربية دلوقتي بقي الطبيعي بتاعها بعد ما علاها يبقي الأر بي ام علي 2 ولما ادورها الصبح علي 3 وزيادة !!!!!!

حبيت بس انقلكم التجربة كاملة وليكم الحكم وحسبي الله ونعم الوكيل انا بصراحة كان المفروض اروحله تاني بس والله ما روحت ولا عاوز اروحله ولا عاوز اروح لميكانيكي تاني ولا سيد فراش ولا بتاع كفاية حركة ال 25 جنيه دي حسستني اني في نصبه مش في ورشه اللي هوا نطلع منه بأي حاجة والسلام !!!!! بعد ما كلفني بتاع 200 جنيه كمان تصليحات ملهاش اي لازمة ولولا انه عنده كمان قطع غيار بقي يجرب بيها كان ممكن يكلفني اكتر واكتر واكتر !!!!!

مش عارف اقول ايه الحمد لله علي كل شيء واسف علي الأطالة