الفرق فى استهلاك البنزين بين الجديد والقديم ؟

السلام عليكم ورحمة الله وبركاته
تحياتى الى كل اعضاء المنتدى .وتحياتى لادارة المنتدى الرائع.. اما بعد
اريد ان أعرف من اصحاب الخبرة هل تكنولوجيا السيارات الجديدة خفضت فعلا من استهلاك البنزين ام ان هذا مجرد دعاية فقط للشركات المنتجة؟

فأنا امتلك سيارة منذ 15 سنة موديل 1982 وسعة الموتور 1500 سى سى كنت اذهب بها شغلى على طريق العين السخنة وانا من حلوان . اعمل 260 كيلو متر رايح جاى وتاخد 16 لتر بنزين والعربية مفيهاش تكييف طبعا

وبمقارنة استهلاك البنزين لسيارة احد اصدقائى موديل 2009 و1500 سى سى ايضا وجدت معدل استهلاكة اكثر هذا بخلاف ان السيارات ال1600 اكثر استهلاكا

فارجو الان التفسير من اصحاب الخبرة كيف يكون :
1 لتر بنزين يعمل 16 كيلو متر لسيارة موديل 1982
1 لتر بنزين يعمل 13 و 14 كيلو متر لموديلات حديثه

وشكرا جزيلا

المفروض ان العربيات الجديده مع تصغير حجم الموتور واستخدام نظام الدفع الامامى واستخدام الانجيكشن بدل من الكربراتير اكيد المفروض بتوفر اكتر من الموديلات القديمه اللى كانت بتعتمد على الدفع الخلفى وحجم موتور اكبر لكن فى بعض الموديلات الحديثه بتستهلك بنزين اكتر من محرك قديم من نفس السعه واعتقد دا راجع لتصميم العربيه ومقاومه الهوا ليها واستخدام طبعا التكييف
انا عندى الماتريكس مشاء الله على استهلاكها ولا عربيه 2000 سى سى رغم ان موتورها 1600

شكرا على اهتمامك ومشاركتك يا استاذ ash_rsi
انا معاك بالفعل فى الكلام اللى قولته ..ولكن السيارات الحديثه اكثر انسيابية وبالتالى مقاومتها للهواء المفروض تكون أقل
فيبقى التكييف ..فهل التكييف هو الذى التهم البنزين الذى وفرتة تكنولوجيا السيارات ام ان التكنولوجيا لم تقدم لنا الجديد اصلا

تم نقل الموضوع الى منتدى ورشة نايل موتور وذلك للاستفادة من المتواجدين به

إستهلاك البنزين له عوامل أخرى كثيرة غير حداثة السيارة

يعني مثلا أنا كان معايا نوبيرا 97 كانت بتعمل 140 كيلو في 20 ليتر سواء مضغل التكييف أو لأ ... وفي نفس الوقت كان معايا بيجو 505 موديل 80 كانت بتعمل 160 كيلو في 20 ليتر برضه

الموضوع مش ممكن يتحسب بالموتور بس
يعني النوبيرا اللى كانت معايا كانت إستيشن وأتوماتيك ... يعني ديناميكيتها في مقاومة الهواء ضعيفة جدا .. غير إن موتور النوبيرا معروف إن إستهلاكه عالى .. وهكذا

الماتركس كمثال ليس بها أي نوع من أنواع ديناميكية مقاومة الهواء لأن تصميمها لا يساعد على ذلك

يعني في عربيات إستهلاكها للبنزين ضئيل جدا بمقارنتها بأخرى مثلها في السعة برضه مثل ... الهوندا سفيك 1600 سيسي ... النوبيرا 1600 ... اللأوبترا 1600 كل دول كل واحدة فيهم إستهلاكها غير التاني

متنساش عملين السحب والسرعة وعلاقتهم بحرق بنزين اكتر
كدا كدا الحديث لآزم يفرق

بفرض وجود عربيتين "من نفس النوع " ماشيين تحت نفس ظروف الطريق
هتلاقى استهلاك البنزين مختلف
ليه؟
لاختلاف نوع البنزين :انت متضمنش انت حاصص بنزين نضيف ولا مغشوش ولا ايه حاله تانك المحطه
ظريقه القياده هى اكبر سبب :يعنى العربيه اجديده ممكن تلاقى استهلاكها اعلى لانك بتحرق على الماتور و ال rbm يوصل ل 4 و 5 و انت مش ملاحظ ان صوت الماتور عالى لان العزل ممتاز انما العربيات القديمه اول اما ال rbm يوصل ل 3 تحس ان فيه حاجه بتنعر فبتنقل علطول

فعلا الملاحظ ان الموديلات الجديدة بتسحب بنزين اعلى وممكن في ده يتدخل طريقة القيادة وقوة الموتور وقوة السحب

شكرا لكل الأعضاء المشاركين

كلامكم بيأكد ان هناك سيارات قديمة بتستهلك بنزين أقل من الجديدة خاصة الاستاذ ayman samir اللى عمل مقارنة بين البيجو موديل 80 وبين نوبيرا موديل 97

بس انا هنا أقدر اقول ان مفيش جديد فى موتور السيارة
وزن سيارة أخف +استهلاك بنزين اكثر = سيارة حديثة يعنى المعادله مش مظبوطه خالص

وعلشان شركات السيارات تظبط المعادلة بتحولها للصيغة التاليه:
وزن اخف + بنزين اكثر +شكل جميل + شوية كماليات = السيارة الحديثة
أى: بودى اى كلام + موتور اى كلام + شكل بس + شوية كماليات عبيطة (dvd +حامل اكواب +حافظة نظارة) = السيارة الحديثه

انا عندى نيسان صنى 83 بتعمل 230 ك م فى الصفيحة والعربية كربيراتير 1500cc وبنزين 80 كمان

انا افتكرت حاجة كمان ياجماعه
الكل يعرف سير الكاتينة . وانا لحد علمى ان تلف سير الكاتينة وعدم تغييره فى الوقت المحدد يؤدى لتلف موتور السيارة لأنه بيخلف عملية فتح وقفل الصمامات اثناء حركة البساتم فيخلى الموتور يكسر نفسه
عارفين ان فيه سيارات قديمة لا تحتاج لتغيير سير الكاتينة لانه جنزير حديد اوترس
فانا من 15 سنة اما اشتريت السيارة مستعملة واحد صاحبى قاللى غير سير الكاتينة فذهبت لميكانيكى وقلتله عايز اغير سير الكاتينة قالى دى مش بيتغيرلها كاتينة لانه مش بيحصله حاجه
طيب يعنى العربيات الجديدة عايزة تشيلنا الهم ليه؟
انا عايز عربية جديدة متشيلنيش الهم
سير كاتينة- صيانة 1000كيلو- 10000كيلو ...... وناهيك عن قطع الغيار التى لا يوجد مبرر لاسعارها
انا بستغرب على تيل فرامل ب300 جنيه و500 جنيه و800 جنيه ليه ؟ هو فيه ايه
انا بستغرب على طقم بوجيهات ب 400 جنيه
انا بستغرب على فانوس ب 1500 جنيه واكثر ( ده التليفزيون الملون فيه شوية زجاج وبلاستيك يعملو كذا فانوس وب600جنيه )

الله يرحم القديم
بدون سير كاتينة
طفم بوجيهات ب 25 او 50 جنيه
تيل فرامل وبيفرمل 45 جنيه وخلفى 70جنيه
وكبيرها فى الصيانة بلاتين ومكثف ب 20جنيه والاسطى بياخد 20 او 30 جنيه

اعتقد يا استاذ حسام لو حطيت لعربيتك بنزين 90 حتعمل كيلو متر اكثر

انا عربيتى مازدا موديل82 موتور 1500 بتعمل 320 كيلو فى الصفيحه بنزين 90
بس اما بحطلها بنزين 80 الموتور بيرعش فى السلانسيه وكمان سحب العربية بيقل

اقتباس:

---

المشاركة الأصلية كتبت بواسطة aymansman

اعتقد يا استاذ حسام لو حطيت لعربيتك بنزين 90 حتعمل كيلو متر اكثر

انا عربيتى مازدا موديل82 موتور 1500 بتعمل 320 كيلو فى الصفيحه بنزين 90
بس اما بحطلها بنزين 80 الموتور بيرعش فى السلانسيه وكمان سحب العربية بيقل

---

اعتقد ان الفرق فى السعر يخلينى استحمل ضعف السحب مع العلم انه مش فارق كتير بين الاثنين........

لازم ياجماعه نعترف إن العربيات القديمه - النظيفه - أوفر بكتيير من العربيات الحديثه
وفى داهيه فرق السرعه حيث لا يصرح فى البلد السير بسرعه أعلى من 100 كيلو فى الساعه
أحب أتشارك معاكو بتجربتى مع البيجو 305 - معايا من عام 84
-إستهلاك البنزين 220 كيلو متر كل 20 لتر بنزين 90
- الإكصدام حديد ومايتغيرش خالص إلا لو العربيه إتفرتكت فى حادثه - مقارنه بالعربيات الجديده اللى مايستحملشى خدشه وسعره فوق الالف جنيه
- سير الكاتينه حديد وباغيره كل عمره فقط
- الفانوس الامامى الجديد ب 150 جنيه اللى فى العربيات الحديثه فوق ال 1000 جنيه وأحيانا 1800 جنيه
- مرايه الجنب الجديده ب 100 جنيه وسعره فى العربيات الجديده مايقلش عن 500 جنيه ( واحد قاللى سعر مرايه الالنترا 2000 جنيه بالكهرباء )
- لسه واحد قريبى مغير الرفرف بتاع عربيته الكليو - التعبانه - ب 2000 جنيه
- وغيره وغيره ولا مقارنه أبدا بين القديم - النظيف - والجديد
ومصلحه البلد فى التوسع فى استيراد القديم النظيف وليس فى استيراد الجديد الذى يعتبر مذبحه للعمله الصعبه اللى بنتعب على مانجيبها
لكن موش عارف ليه الحكومه موش عارفه مصلحه البلد فين