العربيه بتعوم مع اني لسه ظابط زوايا ومرصص اعمل ايه !!
صباح الخير لاجمد منتدي سيارات في مصر
بعد اذنكم كان عندي استفسار فني عشان عربيتي بتعوم وتحدف مع اقل عوجه في الطريق او اقل غرسه علي اي سرعه
مع اني لسه ظابط زوايا ومرصص
هي العربيه هيونداي اكسنت والدريكسيون عادي ومن كام يوم رحت اظبط زوايا وقلت للراجل اني الدريكسيون تقيل زياده المهم هو معرفش عمل ايه ومن ساعتها الدريكسون بقي خفيف
وهنا ظهرت المشكله
اولا مع اي فرامل بسمع صوت احتكاك الكوتتش بلارض
كاني ضربت فرامل علي 100 مع اني ببقي احيانا سرعتي ماتجيبش 60
ثانيا وانا بضرب الفرامل بحس ان العربيه بتحدف حدفه صغيره
ثالثا مع اي غرسه مهما كانت بسيطه العربيه بتحدف جامد
رابعا مع اي اعوجاج في الاسفلت العربيه بتحدف جامد
وبصراحه كان المفروض استفسر عن الموضوع ده من كام يوم لكني اتاخرت وكنت هادفع التمن غالي جدا النهارده
لاني كنت ماشي في طريق النصر وفي حته الاسفلت مش مستوي وعليه شوية زيت ولرغم اني ماشي علي 60 لاقيت العربيه حدفت بشكل غريب جدا والدريكسيون ولا اكنه موجود
وطبعا حاولت اني اسايس العربيه شويه بالدريكسيون وشويه فرامل بس القدر ماادنيش فرصه وجت عربيه مرسيدس من الخلف وخبطتني:eee:
بس الحمد لله جت سليمه والاضرار مش كبيره والراجل بصراحه كان محترم جدا وحتي رفض انه ياخد اي حاجه
المهم دلوقت انا مش فاهم العربيه عملت كده ليه وفين المشكله والله اتعقدت منها وخايف اسوقها :B4_611:
فياريت لو حد عنده فكره ايه الاسباب والمفروض اعمل ايه
لاني مش عايز اروح لصنايعي وانا مش فاهم عشان مايشتغلنيش واطلع من عنده الاقي العيب زي ما اهو
مستني ردودكم يا شباب