شكلى هاجيب used VTI Civic 96 محتاج نصايحكم

بخصوص السعر و تكشف عليها في اي بنزينه دا ما اقدرش افيدك فيه.
اما تكشف علي ايه فبالترتيب كده.:
اولا حوض العربيه و لشنطه و القوايم تكون فابريكه ما فيهاش سنتي بس مرشوش و لازم سمكري كويس يشوفهالك علشان ما تنخدعش فيها.
تاني حاجه منظر العربيه من بره يعني فروقات الابواب تكون مظبوطه و الابواب الاماميه تكون متناسقه مع القايم بتاع البرابيز. لا تبقي طالعه ولا نازله من جنبه.
فوانيس العربيه من الامام تكون برضه ماشيه مع الاكصدام و الكابود ما يبقاش فيه اي فروق او فانوس داخل لجوه او اي شئ من هذا القبيل.
تبص علي السقف و تبص علي طرف السقف من ورا في اتجاه الامام و تشوفه مضبوط ولا معرج.
تشوف فتح و قفل الاوبواب يا تري قلفلتها محكمه ولا الابواب بترزع لما بتقل و تطلع اصوات .
بعدين تبص علي الصالون يا تري شكله حلو ولا متبهدل و يا تري الكراسي قاعدتها ناشفه و خصوصا الكنبه اللي ورا لو قعدتها ناشفه تعرف ان العربيه دي مش مستهلكه كتير انما لو الكراسي لينه تعرف انها اتركبت كتير :wink: .
تعالي بقي بص للزراير بتاع السقف الكهربا و يا تري شغال ولا لاء و في بارومه نايته ولا لاء؟
بص للعلامات بتاع دراع النور و المساحات و زراير الزجاج الكهربا يا تري موجوده ولا ممسوحه ولا شكلها عامل ازاي لو ممسوحه تعرف ان العربيه دي اتهانت و اتركبت و اتبهدلت كتير.
طبعا دا مش مقياس يعني مش اول حاجه تبص عليها .
و لو الفتيس اتوماتيك جرب النقلات بتاعه كلها و شوفها شغاله ولا لاء و يا تري بياخد الحاره مضبوط ولا فيه مشاكل و يا تري بيتهز من مكانه و ملخلخ ولا كويس.
في الاخر خالص تبص علي الموتور و تخلي ميكانيكي يبص يشوفه كويس ولا لاء او في مركز خدمه انت و راحتك .
لو الموتور مش كويس قلل من تمن العربيه تمن موتور استعمال و روح اشتري واحد مفيش مشكله انما لو جسم العربيه متبهدل او واخده خبطه يبقي ابعد عنها خالص.
طبعا تخلي بالك من المساعدين و تشوف العربيه بيطلع منها اصوات و لا ماشيه هاديه.
و الف مبروك مقدما :)