السلام عليكم ورحمة الله وبركاته
لما بحرق جامد على الموتور أو بعدي ال 110 بشم رائحة عادم جاية من قدام. علما بأن عربيتي مازدا 323 موديل 1982
عرض للطباعة
السلام عليكم ورحمة الله وبركاته
لما بحرق جامد على الموتور أو بعدي ال 110 بشم رائحة عادم جاية من قدام. علما بأن عربيتي مازدا 323 موديل 1982
يمكن ان يكون شرخ فى فرن الشكمان
شكرا على سرعة ردك
يعني أتوكل على الله واروح لبتاع شكمانات؟
وممكن يكون الفرن عاوز جوان بس ....أو جاويط مكسور ....أو عاوز يتربط كويس .....والعادم بيهرب من خلوص الفرن مع السرعه وطبعا الريحه بتاعة العادم حتظهر مع السرعه
شكرا على رد حضرتك يا باش مهندس سمير
أنا لسة مبتدئ في العربيات ومعلوماتي تقريبا صفر.
أروح للميكانيكي ولا بتاع شكمانات. والعملية دي ممكن تكلف كتير؟
روح لميكانيكى الأول ....وأعرض عليه كلامنا ....وخليه يراجع على رباطات الفرن .....أحتمال يكون فيه حاجه مش مظبوطه فى الجوايط ....أو صاموله عاوزه تتربط .....حتكون حاجه بسيطه أن شاء الله ......ومش حتتكلف كتير ....لو حيربط ( بكتيره 10 ج ) .....ولو حيغيرلك جوان ( مش حتعدى 50 ج جوان ومصنعيه بالتقريب يعنى )
جزاك الله خيرا
احتمال يكون زيت على الشكمان بيتحرق مع سخونة الشكمان
وممكن يكون الزيت بينزل على الشكمان مع تغيير الفلتر
هو أنا فعلا لسة مغير فلتر الزيت.
انا غيرت الشكمان كلة بسبب الحكاية دى وسبب ان الشكمان انسد شوية من الزيت اللي بيتفوت من الموتور
والحمد لله راحت الريحة حتى وانا معدى 120 كم\ساعة ومافيش ريحة خالص
غيرته بكام؟
غيرتة كلة 240 جنية
بدون المشترك
أنا رحت للميكانيكي قلت له يشيك على فرن الشكمان. قال لي الفرن زي الفل - وقال لي أنا ظبط لك مسمار الهواء والريحة هتختفي إن شاء الله. وأنا مروح من عنده برضه لسة في ريحة مع السرعة العالية أو الحرق على الموتور!!!!! (هي الريحة عبارة عن ريحة عادم + زيت). الزيت عندي تقريبا مابينقصش (بينقص خفيف جدا).
قبل ما غير زيت آخر مرة (من أسبوعين). حطيت زيت موبيل 5000 وللأسف اكتشفت من خلال هذا المنتدى إن زيت موبيل سيئ جدا جدا. وكان بينقص عندي وكنت مركب ساعتها فلتر زيت ميتسوبيشي (تقريبا كان بيسرب زيت) وجوان غطاء التاكيهات كان بيسرب زيت برضه. طبعا ما استنتش غيرت الجوان وغيرت الزيت بزيت شل الأصفر وحطيت فلتر زيت مازدا. أنا لاحظت إن العربية كانت بتسخن جامد مع الزيت القديم بس لما غيرت الزيت الجديد + الفلتر مابقتش تسخن والزيت مبقاش ينقص الحمدلله. بس ايه حل موضوع الريحة دي؟؟؟؟ آسف على الإطالة وشكرا
الريحة بيتهيائلي مدية على زيت محروق.
طيب اخبار لون العادم اية؟
زود واقرص عليها وهى واقفه فى مكانها وشوف العادم لونة اية
فيه معلومة كمان عايز أضيفها. لما غيرت الزيت الريحة بدأت تتلاشى شيئا فشيئا. وجيت أجرب أقرص عالموتور في يوم شوية علشان أجرب فيه ريحة ولا لأ - لقيت الريحة ظهرت تاني وبقت تظهر مع السرعات القليلة كمان
هى الحكاية دى كانت عندى قبل العمرة
وحالياً عملت عمرة من حوالى شهر ونص والريحةدى والحمد لله راحت نهائى مهما قرصت على الموتور...وكمان لو الشكمان علية زيت فممكن يكون بيتحرق من السخونة ويطلع الريحة دى عندك
طب سؤال...الريحة اللي بتشمها بتكون ليها لون؟
ماقولتليش اخبار لون العادم اية؟
واية نوع الزيت اللي بتستخدمة حالياً؟
الريحة اللي بشمها مالهاش لون خالص.
أنا جيت النهاردة وانا ماشي في طريق فاضي على 80 وشميت الريحة (المرة دي ريحة عادم على ريحة زيت سخن وريحة العادم هيه الغالبة) وقفت على جنب بسرعة وفتحت الكبوت مالقيتش ريحة والريحة راحت أعدت أدوس بنزين من الكاربيتير مافيش اي ريحة. الريحة بتظهر وانا ماشي بس. بص بالنسبة للون العادم من الشكمان(من ورا) مافيش أي لون - بس لو قرصت جامد هلاقي دخان أبيض خفيف (بس أنا هجرب تاني إن شاء الله)
بالنسبة للزيت أنا دلوقتي بستخدم زيت شل 5000 (الجركن الأصفر). غيار الزيت اللي قبله كان موبيل 5000 (كان زيت خفيف زي المياه).
بص أنا كنت شايف الكوبلن اللي فوق الشكمان معرق زيت.
سؤال: بالنسبة للزيت هو المفروض ماينقصش خالص في المازدا؟ ولا بينقص خفيف؟
لا المفروض ان الزيت ما ينقصش خالص ده لو مافيش اى تسريبات او تفويت
بس حكاية الزيت اللي على الكوبلن اللي فوق الشكمان عندى برضة نفس الحكاية دى مش عارف اية سببها بالظبط
انا قبل العمرةكان عندى غطاء وجهه التقسيمة مكسور وبيجيب زيت على الكرتيرة كلها
بس الحمد لله غيرتة ومافيش زيت نهائى والحمد لله
ومن ناحية الزيت انا ناوى استعمل شل الاصفر ناس كتير بتشكر فية
طيب ورأى نبيل مازدا فى موضوع الريحة اية؟
أنا هروحله النهاردة إن شا ء الله. أنا كل لما أروحله يشتغل معايا أي حد من صبيانه لكن المرة دي هروحله شخصيا بإذن الله.
بالنسبة لموضوع تسريب الزيت فأنا شاكك إن الزيت بيتسرب لأن غطاء الكارتيرة اللي تحت ده مزيت عالآخر والغطاء اللي جنبه (على الشمال) مكسور وملصمه.
بالنسبة لموضوع العمرة ده. ايه علاماته؟ ربنا يستر..
لاقدر الله لو الموتور مفوت بيكون عادم لونة ازرق من الشكمان وتحس بضعف الموتور خصوصاً على المطالع او فى حالة حمل الركاب
بس الاول اتأكد من انه مافيش تسريبات للزيت من الخارج
أنا رحت للميكانيكي النهاردة - النتائج:
1. العادم كان بيهرب من بداية الشكمان من قدام. ربط لي بعض الصواميل (زي ما المهندس سمير قال بالظبط)
2. بالنسبة للزيت كان بينقص بسبب إن كارتيرة الزيت برضه كانت مهوية سنة.
3. بالنسبة للزيت اللي على الكوبلن اللي فوق الشكمان. كان بسبب إن كاوتشة زيت الفتيس كانت بتسرب زيت الفتيس على الكوبلن. غيرتها وطلع فعلا زيت الفتيس ناقص.
4. قلت له بالمرة اقرص على المكنة والعربية وافقة علشان نشوف الدخان اللي هيطلع لونه ايه. الحمدلله طلع لونه أسود مش أبيض ولا أزرق. قال لي الدخان الأسود من الشكمان ، روح مشوار كبير وهتلاقي الشكمان بتاعك زي الفل (مش مطمن للمعلومة دي هل صح ولا غلط؟). بالنسبة للكاربيراتير فهو طلع جديد زيرو بقاله شهرين بس (صاحب العربية اللي قبلي هو اللي جابه قبل مايبعهالي).
الخلاصة:
الحمدلله ريحة العادم اختفت بس فيه ريحة زيت محروق سنة بسيطة قال لي روح اغسل المكنة ويومين وهتروح الريحة خالص.
والحمدلله رب العالمين.
جزاكم الله خيرا. ألف شكر للمهندس سمير وألف شكر ليك يا استاذ محمد ولكل من شارك في الموضوع.
وجزاكم مثلة
الحمد لله ان الموضوع اتحل على خير
ومسألة الدخان الاسود حاجة بسيطة...بيكون تظبيط كربيراتير
انا كانت بتحصل معايا وكان الميكانيكى بيفك الكربيراتير وينضفة ويظبطة وكان بيروح خالص...بس مش عارف اذا كانت ممكن تتظبط من مسامير الهواء والبنزين بس من غير فك الكربيراتير؟
شوف يكن مشوارين تلاتة ويروح زى ما بيقولك الميكانيكى
وشوف برضة راى الباشمهندس سمير
والف مبروك مرة تانية:biggrin2:
انا بقى عندى نفس المشكلة وكمان زيادة الصوت العالى والعربية على السلانسيه ورحت لبتاع الشكمان وقال ان فى جاويط مكسور لازم يتحل عند ميكانيكى لانه عاوزله شغلانة لازم المكانيكى هيحل الفرن ويوديه عند خراط يحلله المسمار المكسور
انا مش مقتنع وحاسس انه بيعمل شغل ده صحيح ولا ايه رايكو وهل لو فضلت كدة ممكن المسامير الباقية تتكسر هية كمان ولا ايه ارجوكم افيدونى وشكرا مقدما
ان معايا واجا 2005 و لما بكون فاتح الزجاج بشم رائحه عادم جامده في صالون العربيه
و لما بقفل الزجاج الريحه بتروح و ما بشمش اي شي
و كشفت عالشكمان لقيت ما فيهوش اي حاجه او اي تسريب
و في حد قالي ان الريحه ده بتخش من الشنطه فعملت تجربه بسيطه اني قفلت فتحات الشنطه كلها بسوليتب لان العربيه كانت عالمه حادثه و الشنطه تقفيلها مش كويس
و بعدين مشيت بالعربيه حسيت ان ريحه العادم راحت بنسبه 60% مثلا
يا ريت حد يفيدني في الموضوع ده مع العلم اني بشم الريحه لما بمشي بسرعه بس
و هل ممكن تكون الريحه بترد من الشكمان لورا عشان تخش الصالون و انا ماشي بيرعه كده؟؟؟؟؟؟؟؟؟
ايه يا جماعه ما فيش حد عنده تفسير
و هل ممكن اروح الوكيل يعرف السبب بس و هيكون السعر كام لكشف السبب
؟؟؟؟
1. اظبط الاسبراتير اذا كان بينفع يتظبط.
2. شوف حالة البوجيهات ... لو مهببة اكشف على الرشاشات أو الكاربيراتير عندك.
3. لو لسة الريحة موجودة اكشف على الشكمان من قدام لو فيه تسريب
انا لما باحرق علي الغياار
بشم الريحة دة
مع العلم المكنة عندي بسم الله ماشاء الله حلوة
نفسي الريحة دة تروح او اعرف السبب دة من اية
______________________
يرجى مراعاة كتابة لفظ الجلاله بشكل صحيح
مشرف الورشه
متحرقش على الغيارات
لأنك كده بتشيط أسطوانة الدبرياج
وحتبوظ الدبرياج منك بدرى