الموضوع: صحوا الsystem

السلام عليكم يا وحوش عاملين ايه؟؟
امبارح كان عندى مشكلة سخيفة فالتوكيل
ابن خالتى معاه ميجان سيدان موديل 2008 جايبها بناء على ترشيحى
لاقيته امبارح بيكلمنى بيقولى الcompressor ضرب و راح التوكيل عشان يغيره على الضمان فوجئ انهم بيستهبلو و قالولو العربية 2007 مش 2008 و الضمان ل 60 ألف مش 100 ألف و هو عامل 63 ألف فطبعا هو اتغاظ وكان هيفرقع و وراهم الرخصة مكتوب فيها 2008 قالولوه ملناش دعوة بالرخصة فروحتله على المقطم أشوف ايه الحكاية , روحت لاقيته مع حسام شاب مدير الورشة و انا كنت مشحون فقلت لحسام معقولة معطلين الراجل و عمالين ترقصوه (مع شد القاف) فزعل اوى من كلمة ترقصوه و قاللى احنا مبنرقصش حد
و انا والله مش فايدى حاجة دى وقفة عند الموظف المسئول عن الضمان فبعتنا لواحد اسمه عبد الظاهر, قبل ما نروحله عدينا عالمبيعات و خدنا ورقة فيها ارقام الشاسيهات و الموديل (و دى الورقة اللى بتتعمل للعربيات و هى دخلة من الجمارك) و خدناها وريناها لعبد الظاهر فقاللنا حاجة تجنن قالك ان ضمان ال 100 الف على العربيات المترخصة من 1\1\2008 و الرخصة اللى معانا 21\10\2007 قلناله ازاى ده الاعلانات وقتها كانت بتقول ان الضمان 3 سنين او 100 ألف قالنا انا والله معرفش فى ايه فالاعلانات,انا ماليش غير انى ادخل رقم شاسيه العربية وكل المعلومات تطلعلى على العربية بما فيها الضمان لو كان 60 الف او 100 الف , احنا سمعنا الجابة دى مشينا من غير ما نتكلم
فكلمت أحمد بيه عبد المقصود عشان اساله على موضوع الضمان فقاللى العقيد خالد هو جاب العربية فى نفس الوقت و فعلا كلمت العقيد خالد بس لاقيته جاب عربيته 2\2008 ونصحنى بالشكوى لرينو فرنسا
و كان عندنا مشكلة ان كتيب الضمان مكانش مكتوب فيه ان الضمان 100 الف
لاقينا مفيش حل غير ان احنا نجيب اعلان يثبت الن الضمان 100 الف او اى حد جايب عربيته قبل 1\1\2008 و معاه كتيب الضمان مكتوب فيه ان الضمان 100 الف
المهم و احنا ماشيين عجينا على حسام تانى و سألناه على حكاية الضمان فقاللنا كلموا مدير مبيعات الأفراد بس ده فى المهندسين فكلمناه على التليفون و شرحناله الموضوع من طق طق لسلامو عليكو فقالنا طب انا هسال الراجل الفرنساوى و ارد عليكو و فعلا بعد نص ساعة كلمنا و قاللنا ان لضمان فعلا 100 الف و الغلطة فى الsystem بتاع التوكيل و انهم دخلو الضمان غلط و بدل مايدخلو ضمان ال100 الف على كل موديلات 2008 دخلوه على العربيات من 1\1\2008 طبعا غلطة قاتلة
المهم الراجل اعتذر لنا وقاللنا انه هيبعت للتوكيل فى المقطم و هيحللنا المشكلة و الحمد لله انها اتحلت على خير و الcompressor هيتغير على الضمان:10D5C8~1107:
و فى الاخر احب اشكر الوحوش
أحمد عبد امقصود و هانى و شاركى اللى المكالمة مكملتش عشان تليفونه فصل شحن
على محاولتهم لمساعدتى و تضيعهم لوقتهم معايا
واختص بالشكر العقيد خالد اللى اهتم جدا زى ما تكون المشكلة مشكلته و اتصل بيا عشن يتابع الموضوع
حقيقى بجد الف شكر يا وحوش و حقيقى انا حبيت العربية عشان خلييتنى اتعرف على ناس زى الفل