تفاصيل صيانة ال 1000 كم بمركز كيا فرع القطامية
السلام عليكم و رحمة الله و بركاته
الحمد لله النهاردة العربية اتعملها صيانة ال 1000
و اليكم تفاصيل اليوم من اوله لأخره
------------------------------------------------------------------------
الساعة 9 الصبح رحت كيا فرع روكسى ( ياسين )
و مكنتش حاجز للاسف فالبشمهندس اعتذرلى و قالى مينفعش ادخلك علشان انا ملتزم بجدول و ناس حاجزة
و على العموم احنا عاملين احتياطنا و عارفين ان الناس مش عارفة ان لازم حجز و ممكن تجيلنا الشفت التانى ابتداء من الساعة 6 مساء و العربية مش حتاخد اكتر من ساعتين صيانة
المهم انا كنت عايز اعملها الصبح علشان كنت مطبق مخصوص للموضوع ده
فا سألته فيه فرع من غير حجز ... قالى فرع القطامية ( معرض محمد ذكى على الدائرى )
طلعت على فرع القطامية و دخلت المكتب بتاع كيا
ملحوظة : توكيل كيا مأجر من محمد ذكى مكتب صغير و واخد منه الدور تحت الارضى كا ورشة ليهم
انا كنت فاكر ان الورشة تبع محمد ذكى و ده كان عاملى قلق من مستوى الخدمة
لازم يبقى معاك كتيب الضمان و رخصة العربية علشان يفتح جوب الصيانة و ناس راحل من غير كتيب الضمان فا طلب منهم يجيبوه الاول
دخلت المكتب و قابلت المهندس / صلاح مدير خدمة العملاء و هو اللى فتح جوب الصيانة
سألنى حتعمل ايه ... قلتله صيانة الالف و غسيل الماتور بالفوم + ظبط رجلاش فرامل اليد + الكشف على عومان لما ادوس فرامل جامد على سرعة عالية
قالى ميعاد دخول السيارة الساعة : 10.30 و ميعاد الخروج : 2.30
قلتله مش كتير 4 ساعات على تغيير زيت و فحص عام ؟؟ ... قالى عندنا ضغط شغل حتتأخر
اكتشفت بعدها ان هما معندهمش غير 3 كواريك و كوريك زوايا فقط :d
سألته حضرتك مش حتطلع تكشف على العربية من برا و تشوف لو فيها خدوش او احتكاك علشان لو حصل حاجة فالورشة يبقى على مسئوليتكم ؟؟؟
قالى خليها على الله و لو فيه حاجة احنا مسئولين عنها ( طبعا كلام اول مرة اسمعه من مدير خدمة عملاء و فى توكيل محترم )
ما علينا عديها
عملت الجوب و الضمان اتمضى و اتختم و طلعت بره افضى العربية استعدادا لدخولها
استنيت نص ساعة علشان حد يدخل العربية الورشة و لكن لسه كانت العربيات اللى فالورشة ماخلصتش فا طلعت فالاستراحة و سيبتلهم المفتاح فالعربية
الاستراحة كويسة و فيها كافيتريا حلوة و اسعارها رخيصة جدا
حاطين 5 شاشات كبيرة واحدة شغالة تلفزيون و الباقى عبارة عن عرض لكاميرات موجودة فالورشة بحيث تتابع عربيتك و هيا فالورشة
لاحظت انهم مهتمين جدا بالكشف على الحاجات البسيطة زى الانوار و الكوالين ..... الخ
يعنى فعلا العربية بتاخد حقها تحت فا اطمنت و ريحت دماغى لحد الساعة 2 كده
نزلتلهم على الساعة 2 علشان اشوف النظام خاصة انى زهقت من كتر الانتظار فا قالولى العربية خلصت حتتجرب و حتتغسل و تطلع
نص ساعة فاتت و مفيش جديد و العربية ماطلعتش تتجرب ...
رحتلهم تانى و كنت متنرفز بصراحة فا واحد من المسئولين عن متابعة الجوبات خدنى تحت و فرجنى على العربية و هيا بتتغسل علشان اتأكد
طبعا محدش طلع جربها و لا حاجة و مشكلة العومان محدش اهتم بيها
المهم العربية اتغسلت و الماتور مغسول بنضافة و الفاتورة كانت بتتعمل
تفاصيل الفاتورة :
30 جنيه غسيل الماتور بالفوم
30 جنيه فلتر
240 زيت
الاجمالى : 301 جنيه شاملة الضرائب
دفعت الفاتورة و مشيت جربت العربية
1- الفرامل اليد محدش ظبطها و زى ماهيا
2- صوت العربية هدى شوية
3- مشكلة العومان لسه مجربتهاش
مشيت من عندهم على الساعة 3 بعد طول انتظار دام 4 ساعات و نص
و الناس كانت واقفة على المكتب و متضايقة من طول فترة الانتظار و البطء اللى هما فيه
مميزات المركز :
1- بدون حجز و قريب من مدينة نصر و مناطق كتيرة
2- استقبال كويس و استراحة كويسة
3- العربية بتاخد حقها و بنود الصيانة بتتعمل كلها
4- العربية بتتغسل من برا و جوا بعد الصيانة
العيوب :
1- المركز صغير و لو فيه ضغط يبقى ربنا معاك فالاستلام
2- مع الضغط العربية مابتتجربش و بيهتموا بالصيانة العادية فقط
3- العربية بتفضل مركونة فالشارع صف تانى برا لحد ماتدخل الورشة و تطلع منها على نفس المكان ( الشارع رئيسى و بيبقى فيه عربيات نقل بتجرى فيه )
تقييمى النهائى للمركز : 8/10
لو فيه اى استفسار انا تحت امركم
