القضاء والقدر

**alfa_we** · 04-08-2009 08:31 PM

السلام عليكم ورحمة الله وبركاته
الحمد لله العربية اتخبطت للمرة الثانية
بس المرة دى مش زى المرة الى قبلها
الى حصل ان الوالد كان رايح الشغل بالعربية وكان ماشى على سرعة 90 تقريبا
وكان ماشى قدامه ميكروباص سياحة مرة واحدة وقف عشان يدخل يو ترن وطبعا ابويا ماشى وراه
قام اتخبط فيه والحمد لله انو خرج سليم من العربية
بس العربية اتبهدلت طبعا
دى صور العربية

روحنا القسم وعملنا محضر بالحادث ودا طبعا هايفدنى فى تأمين العربية
اجيلكم بقى فى المشكلة الاكبر
بعد ما خلصنا موضوع القسم والنيابة ودينا العربية التوكيل وطلبنا منهم مقايسة عشان
شركة التأمين
وكانت كالاتى :
قائمة اسعار قطع غيار
عضم اكصدام امامى 560
اكصدام امامى 1350
رفرف امامى يمين 670
فانوس امامى يمين 490
كبوت 1495
قنطرة امامية 2495
زجاج امامى 440 وليس بالاصلى
فانوس خلفى يمين 230
جريدة باب خلفى يمين 216 فاكرين دى ؟
اعمال السمكرة المصنعية :
1 - اعمال سمكرة وتركيب اكصدام + عضمة اكصدام +
رفرف امامى يمين +استبدال سلاح كرتيرة رفرف يمين +
شد سلاح شاسيه يمين + سمكرة باب خلفى يمين + رفرف خلفى يمين 4800
2 - اعمال دوكو فرن + رش اكصدام + رش رفرف يمين امامى + رش دواخل حوض السيارة
رش باب خلفى يمين + رش رفرف خلفى يمين 3400
3- اعمال ميكانيكا لتجهيز السيارة لاعمال السمكرة 1500
4 - اعمال كهرباء لتجهيز السيارة 1000
الاجمالى : 18646 جنيه مصرى ولسة الضريبة 10 % يعنى هاتعدى العشرين الف جنيه
ليييييييييييه ؟
طبعا الاسعار دى وهمية ومبالغ فيها لدرجة كبيرة اوى
ولما سألتهم عن السبب قالوا دى مقايسة للتأمين
بس لو انت هاتدفعها من جيبك هاتكون ارخص شوية
لو وديت المقايسة الفظيعة دى لشركة التأمين مش الطبيعى انها تترفض
وبرضوا عايزكم تحكموا معايا
هل الكبوت يستاهل انو يتغير
هلى الاكصدام يستاهل التغيير
هلى الرفرف يستاهل التغيير
والله انا اول ما شوفت قائمة الاسعار افتكرت انى راكب عربية مفيش منها اتنين
انا دلوقتى بفكر اروح اجيب العربية واعملها برة التوكيل وامرى لله
بس فى الحالة دى هل العربية هاتخرج من الضمان ؟
انا قولت استشير وحوش رينو فى الى انا فيه
والحمد لله على كل شئ

**bishoy02010** · 04-08-2009 08:47 PM

متهيقلى المفروض حضرتك تنبسط مش تضايق يعنى مثلا ده هيغيرلك الكبوت مش هيصلحهولك :) وكده كده التأمين هوة اللى هيدفع فحضرتك تضايق ليه ؟؟؟
بالنسبة للتأمين اعتقد هيقبل المقايسة عادى او هينزل منها حاجات بسيطة :) هما متعودين على كده :)

**ashouhdy** · 04-08-2009 08:52 PM

يا نهار ابيض و فل و ياسمين !!!
اولا الف سلامة علي الوالد والحمد لله بسييييييييطة
طبعا التوكيل بيستهبل عشان دة مش حيصلح دة حيغير يعنى حيشيل و يحط
و طبعا لما لقى التأمين اللى حيدفع قاللك غير كل تنتوفة ما العميل مش غرمان حاجة

ثانيا

طالما انت مأمن تأمين شامل ف من حقك التأمين يتحمل كامل تلفيات السيارة
ولكن
بما انك أخترت مكان التصليح فالشركة من حقها تحملك 10% من قيمة فاتورة الاصلاح

ثالثا

لو التأمين حيتحمل القيمة كاملة يبقى حيصلحها فى ورش تابعة للتأمين

رابعا

انا دلوقتى عرفت لية اللوجان نازلة بسعر رخيص مش عشان مغربى ولا ايرانى و تركى
عشان هم حيعوضوا فرق العر فى قطع الغيار المبالغ جدا جدا جدا فى سعرها !!!!!!!!!!!!!!!!!

دلوقتى اللى حضرتك تعملة او اللى كان المفروض يحصل
1) فى وقت الحادث تصور الوضع على ما هو علية
2)بما ان التلفيات عدت ال 5000 جنية تعمل محضر و يفضل وقت الحادثة
3)تاخد العربية و تطلع ع الشركة ذى ماهى تتصور و ياخدوا صورة المحضر
4) لك ان تختار مين اللى يصلحها لو توكيل تتحمل ال10% لو هما مش حتتحمل حاجة

والف سلامة والله الموفق

**alfa_we** · 04-08-2009 09:03 PM

الله يسلمكم جميعا
انا فى نيتى ان اعملها على حساب التأمين لان دا حقى
بس فى شركة تأمين فى الدنيا هاتدفع المبلغ المطلوب دا وفى خبطة مش مستهلة المبلغ دا كلوا
بجد كدة حرام
انا كنت فى شركة التأمين النهاردة وقالولى اعملنا مقايسة بالتلفيات
تخيلوا لما اروحلهم بكرة ويشوفوا المقايسة هايدفعوها على طول ؟

**ramy_gamal** · 04-08-2009 09:08 PM

اولا حمد الله على سلامه الوالد ثانيا التوكيل دايما بيغير عمرة مايصلح وبعدين الخبطه اللى فى الكبوت وراها عضم يعنى صعب يترد ولو التامين هيدفع المبلغ او اقل شويه وانت تدفع الباقى في سبيل انك تغير موش تصلح يبقى احسن كتير كان العربيه جديدة

04-08-2009 09:13 PM

حمداً لله على سلامة الوالد و قضاء أخف من قضاء

أنا من رأي الأستاذ / بشوي

بالنسبة للرفرف من الصورة صعب جدأً تلاقي سمكري يعدله و لو لقيت السمكري إللي يعدله حياخد مصنعية

جامدة فبالتالي تغييره أحسن (قطمه أحسن من نحته) ، أما الباقي فيتسمكر عادي طبعا غير برضه عضم

الأكصدام و سلاح الكارتيرة أنا مش شايفهم علشان أكتب لك رأيي ، كمان الإكصدام مش شايف إنه لازم يتغير .

**tofy_urban** · 04-08-2009 09:29 PM

قدر الله ما شاء فعل ,, ياباشا حمدلله علي السلامة و انا رأيي انك تودي المقايسة للتامين و شوف هايعملوه ايه لانك حتي لو تحملت 10% يعني الفين جنية بس لكن في المقابل كانك غيرت العربية بواحدة جديدة ,,, و التوكيل كده معروف انه هايبقي غالي

04-08-2009 09:35 PM

الرفرف الخلفي أنا على ما أتذكر من الصورة يتسمكر عادي ، و إيه حكاية القنطرة هو عجل العربية خبط في

رصيف ؟

لو المقصود بالقنطرة هي الجزء الصاج تحت الكبود و ماسك من الفانوس للفانوس برضه يستعدل (حسب الصورة) .

خلّي بالك لو الكبود إتغير مش حيكون موجود فيه الفلتو زي الفابريقة إلا لو حبوا يعملوا معاك واجب و شالوه من

هنا و ركبوه صح في الجديد .