مشكلة فى السوستة

**sbs** · 05-08-2009 04:35 AM

السلام عليكم ورحمة الله
اولا احب اسجل اعجابى بأحلى منتدى فعلا انا حاسس ان كل الاعضاء اخوة وبيحاولو يساعدوا بعض على قد ما يقدروا .... انا مشكلتى انى معايا عربية الشعب 128 ومن كام يوم وانا ماشى سمعت صوت جامد فى العربية من ورا زى مايكون حاجة اتكسرت وبعدين وانا ماشى بقيت اسمع شخللة مش عارف من ايه رحت للعفشجى وبعد ماشافها قالى ان السوستة اتكسرت وراح مغيرها المشكلة بقى ان العربية بقت عالية جدا من ورا وبتهبد معايا فى اى مطب الراجل قالى ان ده طبيعى وحتريح مع الوقت والحقيقة انا مش مستريح للكلام ده لان العربية بقت عالية جدا فيا ريت لو حد عنده خبرة فى الموضوع ده يريحنى ويقلى الكلام ده صح ولا اودى العربية لواحد تانى وهل فى تأثير على عفشة العربية من العلو ده؟؟؟؟
انا اسف على الاطالة بس حبيت اقول المشكلة بالضبط زى ما حصلت

**yahiahelaly** · 05-08-2009 04:53 AM

الراجل دة بيتكلم صح بلنسبة لانها عالية وهتهبط مع الوقت بس لموضوع الهبد دة معرفش سببة اية ممكن عشان السوست جديدة والمساعدين قديمة

**sbs** · 05-08-2009 04:29 PM

المشاركة الأصلية كتبت بواسطة yahiahelaly

الراجل دة بيتكلم صح بلنسبة لانها عالية وهتهبط مع الوقت بس لموضوع الهبد دة معرفش سببة اية ممكن عشان السوست جديدة والمساعدين قديمة

الف شكر على مرورك واهتمامك

**aYaBooY** · 05-08-2009 06:47 PM

العلو بتاع العربية بيكون ليه حدود يعني مش عالية اوي و كونها تهبط مع الوقت ده بيحصل في ال 128 بس المفروض متهبدش
روح ليه هو تاني و اطلب انه يهبطلك السوستة شوية علشان العربية متهبدش
و كتر الهبد ده بيخلي العربية تتكسر

**sbs** · 05-08-2009 06:53 PM

المشاركة الأصلية كتبت بواسطة ayabooy

العلو بتاع العربية بيكون ليه حدود يعني مش عالية اوي و كونها تهبط مع الوقت ده بيحصل في ال 128 بس المفروض متهبدش
روح ليه هو تاني و اطلب انه يهبطلك السوستة شوية علشان العربية متهبدش
و كتر الهبد ده بيخلي العربية تتكسر

شكرا اخى العزيز بس المشكلة انى لسه جديد فى العربيات ودى اول عربية اركبها ومعنديش اى خبرة بمشاكلها والف شكر على اهتمامك

**shadei200** · 31-08-2009 02:59 AM

اية يعنى سوست يعنى اسنبرسات

**samirayad** · 02-09-2009 02:19 AM

1- النوع الأول من السوست المستخدمه فى نظام تعليق السياره
هو النوع الحلزونى كما بالشكل

2- النوع التانى ( أقل أنتشارا ) ويوجد بكثره فى السيارات الربع نقل
وعائلة الفيات القديمه وكذلك السيارات الشاهين
هو النوع الورقى فى نظام التعليق الخلفى كما بالشكل

**sbs** · 05-09-2009 11:18 PM

[QUOTE=samirayad;3871963068]1- النوع الأول من السوست المستخدمه فى نظام تعليق السياره
هو النوع الحلزونى كما بالشكل

2- النوع التانى ( أقل أنتشارا ) ويوجد بكثره فى السيارات الربع نقل
وعائلة الفيات القديمه وكذلك السيارات الشاهين
هو النوع الورقى فى نظام التعليق الخلفى كما بالشكل

الله ينور يا باشمهندس هو فعلا الياى الورقى ده هو اللفى عربيتى وبعد ما خليت الراجل يوطيه شويه حسيت بفرق والف شكر للافادة

**samirayad** · 06-09-2009 12:40 AM

الله يخليك

**ousama_samer** · 20-10-2016 11:52 AM

أولا : سوست فيات 128 الفبريكة "اللى طالعة من المصنع" بتبقى عباره عن ورقتين فوق بعض بعرض العربية من ورا

الورقة الاولى اللى هى الأم ودية لو فبريكا "أصلية" بتبقى رفيعة لكن "قوية جدااا"

والثانية أقل فى الطول بحوالى 5 سم وبتبقى اسمك من الورقة الأم بملى او 2 ملى بأقصى حد وبينهم شامبر جلد" كوتش داخلى بيتقطع وبيتحط بين الورقتين" لمنع الصوت الناتج عن اى احتكاك وبيبقوا متقنطرين بارتفاع 20 سم بالظبت

أولا شغل العفشة الخلفية للفيات 128 والريجاتا وال 127 بيعتمد على السوست بشكل اساسى اكثر من المساعدين لذلك انا كتبت الموضوع ده علشان الكل يعرف يظبت السوست بتاع عربيتة ويحافظ على عمل المساعدين بشكل جيد وتخليهم يقعدوا عندك مدة اكبر

أولا قبل ما تعمل شغل عفشة" مساعدين او مقصات ورا للعربية " لازم تظبت الوسوت كتالى

لو انت مش بتحمل فى العربية ورا ناس احجمها كبيرة او مش بتحط حاجات فى شنطة العربية اوزنها ثقيلة يبقى الحل الأمثل ليك هو نظام ورقتين يعنى النظام الأصلى بتاع العربية ذى ما هى نازلة
ورقة أم + الورقة الثانية " أصغر من الأم فى الطول بحوالى 5 او 6 سم بيتقنطروا بأرتفاع 20 سم بالظبت" بينهم شامبر داخلى +شحم+ 2 افيز محترم يمسك الورقتين ويوضع تحت الافيز قطعة من شامبر لكاوتش داخلى بيتم قصها بنفس حجم الافيز لمنع الصوت الناتح عن اى احتكاك فى المستقبل

لو انت بتحمل أكثر من شخصين على الكنبة اللى ورا او بتحط اشياء ثقيلة فى الشنطة بيبقى الحل بتاعك انك هتذود ورقة سويته

ورقة أم + الورقة الثانية اصغر من الورقة الأم + ورقة ثالثة اصغر من الثانية "بيتقنطروا او 19 سم أو يارتفاع 19.5 على اقصى حد بالظبت" بين كل ورقة شامبر داخلى بحجم كل ورقة +شحـــم+ 2 افيز محترم يمسك الورقتين ويوضع تحت الافيز قطعة من شامبر لكاوتش داخلى بيتم قصها بنفس حجم الافيز لمنع الصوت الناتح عن اى احتكاك فى المستقبل

لية احنا خلينا فى ال3 ورقات القنطرة بأرتفاع اقل من الورقتين وذلك لسببين رئيسين

أولا : نظام الورقتين بيبوط أسرع من نظام الثلا ورقات

ثانيا: علشان متحسش بخشانة شديدة فى العفشة من ورا لو اخد مطب او نقرة وانت ماشى أو صوت دب

ملحوظة لو قنطرت السوست سواء ورقتين او ثلاث ورقات اكثر من الأرتفاع المكتوب فى الموضوع هتحس ان العربية خشنه جدا فى المطبات والمساعدين مش هيشتغلوا بكفءه لان المساعدين هيبقوا مفرودين على الأخر