اتمنيت انى اموت لانى اكتشفت بعنى اية مصرى ............
انا هادخل فى الموضوع على طول
.
.
.
.
.
.
.
.
وانا هاتكلم بالتفصيل الممل فياريت محدش يتضايق
من 3 ايام استقبلنا صديق والدى هوة وبناتة (3 بنات) (هما من الكويت المهم ...)
وكان هايحجز فى فندق بس والدى مارضاش وقالة الدور الى تحت كلة فاضى
وبعد الحاح وافق و كان بناتة اول مرة فى حياتهم ينزلوا مصر (اعمارهم 16-18-21)
وطبعا اول يوم كنا مقضينة فى البيت وقعنا واتكلمنا وكان البنات بيتكلموا انهم من امانى حياتهم انهم يشوفوا مصر ومعجبين جدا بزحمتها وان الناس دايما مبتسمة حتى مع المشاكل والنيل والجو الجمييل والكورنيش والخروجات ووو واتفقنا انى هاخرج معاهم ويشوفوا الاماكن دى وبجد سعادتهم ماكانتش تتوصف (لان والدهم راجل محافظ جدا ومكانش عاوز يخرجهم بس كالعادة وبعد الحاح وافق ) لدرجة انهم ماناموش لحد الصبح فضلوا صاحيين فى البلكون مستنين الخروج وبعد الافطار المصرى الى والدتى اصرت انها تعملة ليهم (لانى قلت اننا هانتكلم بالتفصيل فلازم اقول الفطار كان فية اية ؟)
اطباق فول مصرى معتبر بالزيت الحار وزيت الزيتون والزبدة والسمن البلدى
بيض مقلى بالبسطرمة وزبادى بلدى وسلطة خضراءو جرجير وبقدونس ومربى فراولة وعيش بلدى وعصير ليمون والاكل عجبهم جداااااااااااا لدرجة انهم اخدوا طريقة تدميس الفول فى البيت
ووالدى وابوهم خرجوا للشغل وراحوا رمسيس طبعا استغلينا الفرصة ورحنا معاهم ومن هناك ناخد تاكسى لسيتى ستارز (طبعا العربية كانت مش هاتكفينا فاخدنا عربية واحد صاحب بابا وادينالة عربيتنا يقضى بيها مشاويرة وكانت تويوتا افانزا) ونزلنا هناك واخدنا تاكسى من عند الاسعاف (لان والدى كان مستعجل ومش هاينفع يوصلنا)
شاورت لتاكسى (ابيض واسود نوبيرا ) قلتلة سيتى ستارز طبعا هوة ماكانش معبرنى وبص للناس الى معايا وقالى هاخد 100 ج قلتلة ربنا يكرم اصلك ومتشكرين وشاورت لتاكسلى تانى قالى الى تدفعة قلتلة 25 (دى اكتر حاجة باروحها فى العادى ب15 وب 20 لما يكون الدنيا زحمة ) قالى لا يا هندسة انا مش هاخد اقل من 80 ج وطبعا كان باصص للناس الى معايا سيبتة وشاورت لتاكسى العاصمة كان معدى وركبنا ووصلنا ب ............................................18.35 ج شفتوا الفرق طبعا دة غيير المكيف ونجوم اف ام
واتفقت معاة انة هايجيلنا بعد 5 ساعات ويودينا الحسين ورحنا الحسين واول ما نزلنا البنات قالوا هانحط الحاجات الى اشتريناها فيين فلقيت سواق التاكسى قالى يافندم حط حاجتك فى العربية وخد رخصتى انا مش هاتحرك من هنا واخد الرخصة وقلنالة ساعتين بالكتيير ونرجعلك والبنات واتفرجوا على البازارات وخان الخليلى وكل شوية يطلع واحد من بتوع البازارات والمحلات ويقول اتفضلوا عندى وووو وبجد مفيش اى احترام للناس وقعدنا على الفيشاوى شربنا قهوة جميلة وجيت احاسب لقيتة بيقولى حضرتك 52 ج قلتلة لية مش القهوة فى المنيو ب 5ج يعنى 20 ج ورسوم خدمة يعنى مش هايعدوا ال30 قالى لا حضرتك شفت المنيو بتاع المصريين وحضرتك المفروض تحاسب بمنيوا الاجانب 40 ج (4 فناجين قهوة ) و7ج زجاجة ماء ك و5ج ضريبة طبعا (وكنت ناوى اموتة ولا حاجة ) بعد شد الكلام وقلتلة طيب ماورتنيش المنيو دى الاول لية قالى حضرتك مصرى وانا جبتلك المنيو لانى عرفت انك مصرى اما هما ماكنتش اعرف انهم عرب وحضرتك هاتحاسب زى حسابهم لان دى الاغلبية ودى القوانين هنا (وورانى ورقة متعلقة فى مكان سرى ومكتوب فيها (يتم احتساب الاسعار على حسب فئتين الفئة الاولى مصرى والفئة الثانية اجنبى)(وحسبى الله ونعم الوكيل) ودفعت وانا دمى محرووووووق لان دة نصب وعديت الموضوع لان الناس اتلمت والى حصل حصل ورجعنا التاكسى وقت للراجل ودينا على الاسعاف ورحنا هناك وركبنا عربيتنا وروحنا اكتوبر وطبعا طول الطريق كانت فية ضحكات غريبة جدا بين الوالدين ولما نزلنا من المحور كدة قبل هايبر بشوية قالولنا انهم اتفقوا بكرة اننا كلنا هنروح الاسكندرية(لان فية حاجات للشغل لازم يجيبوها من هناك وهايخدونا معاهم) طبعا البنات كانت عنيهم بتدمع من الفرحة وانا كنت بافكر فى المشاكل الى هاتحصل والاحتقار للجنسية المصرية مش عارف لية .....
المهم ووصلنا وجهزنا شنطنا ورحنا انا ووالدى والضيوف
وحجزنا فى فندق هلنان فلسطين
ووقت الحجز انا ووالدى الاوضة بتاعتنا كانت ب اى 140 دولار لمدة يومين
ونفس الاوضة للضيوف حجزوا اوضتين كانت الاوضة ب 160 دولار لان عليها ضريبة سياحة والراجل مارضاش يخلى والدى يدفع حجز الفندق ودفع هوة
(وخلى بالكم من ان الدفع بالدولار لان الراجل هوة الى حجز باسمة ودفعونا انا ووالدى بالدولار لان البوكيتينج بنفس الاسم ونفس الخدمة )
وطبعا طلعنا غيرنا هدومنا ونزلنا نتمشى على كوبرى ستانلى ولما رجعنا الفندق كان الساعة حوالى 4 العصر والبنات كان نفسهم يتمشوا على البحر حفاة الاقدام (زى بطلات الافلام المصرية القديمة زى شادية وسعاد حسنى ووو) وطبعا الوالد رفض ولكن كالعادة بعد الالحاح وافق بس ينزلوا بالعبايات والطرحة والماء مايتعداش الكعبين يعنى يدوب على الرمل وطبعا وافقوا ونزلنا نتمشى وقلنا هانروح الشاطى الكبير الى جنب السينما (مش فاكر اسمة ) لانة مليان حيوية و ناس ورحنا وشافوا بتاع الفريسكا وجبنا فريسكا بجوز الهند والسمسم وطبعا بيقولى الواحدة ب 5 ج يا باشا قلتلة اولا انا مش باشا انت الى باشا وثانيا دى حتى فى ارقى الشواطى فى العجمى مابتتعداش ال1ج وقالى اصل حضرتك ماكنتش اعرف انك ابن بلد والمهم وحاسبتة ب1 ج للواحدة و خرجنا من الشط ورحنا الفندق ونمنا من التعب وصحينا تانى يوم وقلنا هانروح القلعة وبعدها المتحف بتاع الاحياء المائية وبعدين المكتبة رحنا القلعة ومالحقناش المتحف لانة بيفتح متاخر لانة كان فية صيانة ورحنا المكتبة دخلنا لقينا ان التذاكر للمصرى تقريبا 10 ج والاجنبى 60 ج تقريبا مش فاكر لان والدى الى دفع ودخلنا واول حاجة اخدوها الكاميرات لان التصوير ممنوع ولقينا فية اكتر من قاعة ممنوع دخولها للمصريين وفية قاعات للاطفال وووو كانت خروجة مالهاش اى لازمة وخرجنا واتمشينا على الكورنيش لحد ما اليوم خلص ورجعنا الفندق جهزنا حاجتنا ورجعنا البيت فى اكتوبر (تصوروا انى اكتشفت ان البيت المكان الوحيد الى كنت واخد حقى فية اكتر من الاجنبى)
واليوم عدى ووصلناهم بعدها للمطار وكلة تمام بس والله قى بعض الاوقات كنت عاوز
الارض تنشق وتبلعنى
او انى اموت بسرعة
او انى ارجع بالزمن لورا علشان ماعملش حاجات عملتها
عارفين لية ...........لانى مصرى ايوة
لية التاكسى يطلب فلوس زيادى يعنى السياح دول حايخلوا الكاوتش يتاكل بسرعة مثلا ولا حاجة
طيب لية لما رحنا مطعم واكلنا كان فية اسرة مصرية قاعدة قبلنا والمقبلات كانت نازللهم قبل ما احنا نقعد والاكل بتاعنا احنا وصلنا قبل ما اكلهم يوصل والراجل عمل مشكلة فى المطعم وانا سامعة بيقول للجرسون (يعنى علشان هايزودك فى التبس شوية تعمل معايا كدة ياخى تعالى قولى زودلى التبس وهازودهولك بس تجيبلى اكلى ) وانا كنت باتمنى الموت فى اللحظة دى لان الراجل عندة حق
لية الاسعار بتاعة المصريين اقل من الاسعار بتاعة الاجانب يمكن هما يباكلوا اكتر (بالعكس)
لية لما اكون باحجز تذاكر سينما وواقف فى الطابور والاقى الراجل بيقولى كام تذكرة يا باشا مع ان فية واحد مصرى قدامى (يمكن ما اخدش بالة منة مع انة اتخن منى ب10 مرات ) ولما اقولة الراجل المصرى دة واقف قبلى بيحسسنى انى شتمتة بالاهل والراجل الى فى الطابور قدامى يقولى شكرا (يعنى اية شكرا شكرا لانى سمحت لية ياخد حقة يعنى لو كنت اخدت التذاكر قبلة ما كانش فتح بقة وطلب حقو ولا اية ..... )
لية فى المطار لو مصرى سال سؤال بيجاوبوا علية ماعرفش والتكشيرة المعروفة ولو واحد اجنبلى سال بيقول نعم وممكن يوصلة لحد هناك
طيب لية لما اروح اشرب عصير فى محل العصير .... العصير بتاع المصرى ييجى فى كوباية مكسورة (غالبا ) والاجنبى يجيلة عصير فى كوباية جديدة مش ابن البلد اولى ولا دة كوسة
بجد انا عارف ان فية ناس هاتدايق من كلامى دة ولانى طولت بس بجد لية نحط نفسنا فى الارض مع اننا المضروض نكون فوق السحاب دة مصر ام الدنيا وتم ذكرنا فى القرأن ومصر البيت بيتك وبلد السياحة الترفيهية الثانية على الوطن العربى بعد الامارات والاولى عالميا فى سياحة الاثار
.
.
.
.
.
ودلوقتى بعد ما الاعضاء شافوا الموضوع ممكن حد فينا يعمل حاجة لبلدة ولا ها نرد على الموضوع ونقول شكرا ونكمل قعدة على النت .... وانا بجد اسف لو كنت طولت عليكم