مشكلة فى فرامل البيتلز

**smsmxxxxxx** · 12-08-2009 05:26 PM

السلام عليكم
اخوانى محبي البيتلز

العربية عندى فراملها كانت كويسة جدا
لكن لقيتها فجأة لما بهدى الاقيها بتقفش فرامل جامد
يعنى مبقدرش اهدى بيها خالص

وكمان عندى بدال الفرامل سايب ومكفي لقدام بس العيب ده موجود من زمان

تفتكروا ممكن تكون دى المشكلة

ولو عايز اغير بدالات الفرامل والدبرياش والبنزين ممكن اركبلهم بدالات لنوع تانى من العربيات ولا لازم بيتلز
وممكن الاقي البدالات دى فين وبكام

معلش تاعبكم معايا بس رأيكم مهم جدا بالنسبة لي

علشان اعرف اتعامل مع ميكانيكية شارع فيصل لان الجاهل عندهم فريسة حلال اكلها

اشكركم مقدما
محمد سالم

**ابوهاشم** · 12-08-2009 06:27 PM

على فكره
تقريبا والله اعلم انت محتاج تاخد هواء للفرامل
عند الميكانيكى وهتتظبط ان شاء الله
ودى شغلانه بسيطه جدا تخلص فى خمس دقائق
بالنسبه للبدلات هما الثلاثه بيبقو قطعه واحده
انا كنت شوفتهم فى الوكاله من فتره استيراد ب100 جنيه

**smsmxxxxxx** · 12-08-2009 07:11 PM

متشكر يا استاذ هاشم على سرعة ردك

**ahit** · 15-08-2009 03:00 AM

ممكن تكون الفرامل مشدودة جداً و بالتالى لازم تروح لميكانيكى كويس يراجعلك عليها و يرجليشهالك و إن شاء الله تبقى تمام.
بس المهم بعد ما يخلص راجع على فرامل اليد كويس.

و بالنسبة للدواسات هما 3 قطع طقم واحد و فيه منها 3 أنواع حسب الموديل بتاع العربية ( مسامير التركيب و أماكن ربط سلك الدبرياج و البنزين بتختلف بينهم فقط ) , و البيتل ماينفعش يركبلها دواسات مختلفة لكن ممكن تركب وش للدواسات زى ما انت عاوز نيكل أو كاوتش ( الكاوتش أفضل طبعاً ) و هاتلاقيها فى محلات الإكسسوار و بألوان و أشكال مختلفه كمان.

و الصور دى هاتوضح كلامى

**smsmxxxxxx** · 15-08-2009 10:58 PM

ربنا يخليك يا استاذ احمد
صورة اجزاء البدالات خطيرة استفدت منها جدا عرفت ان العيب فى سوستة بدال الفرامل
رحت النهاردة للميكانيكي قاللى دى شغلانة كبيرة اوى ولازم نرفع العربية
وننزل تحت لان البدالات بتتفك من تحت وشغل يوم كامل ليا لوحدى
مرضتش اقوله انى فاهم وقلتله هجيله يوم تانى

بجد مش عارف اشكركم ازاى لولاكم كان اشتغلني اشتغالة ما يعلم بيها الا ربنا

اخوكم محمد سالم

**ahit** · 16-08-2009 05:56 AM

السلام عليكم ورحمة الله وبركاته

يا أستاذ محمد إحنا إخوات فى الله و فى منتدى واحد و الهدف هو الإفادة لوجه الله تعالى
و الحمد لله إن حضرتك إستفدت و فدتنا بمشكلتك.

طبعاً الدواسات أو البدالات بتتفك من فوق و ليس من تحت العربية زى ما قالك الميكانيكى الله يسامحه و طريقتها سهله جداً و أنا ممكن أجيبلك فيديو بيشرحلك طريقة الفك و التركيب لكل موديل بس محتاجة إمكانيات و عده ممكن تكون مش متوفرة عندك.

و لو محتاج أى حاجة فى أى وقت كلمنى أو كلم أخويا و حبيبى هاشم و ربنا يقدرنا و نقدر نفيدك إن شاء الله.

أحمد حسن
0100058284

**smsmxxxxxx** · 16-08-2009 12:55 PM

ربنا يخليك يا استاذ احمد
ياريت تجبلى الفيديو اللى بيشرح طريقة الفك والتركيب
وانشاء الله اعرف اجيب العدة
وعلى فكرة انا غاوى اصلاح اى شئ بس على اساس سليم يعنى من كتالوج مثلا او رسم او فيديو تعليمي

وياسلام لو جبتلى فيديو فك الدريكسيون لانى عايز اصلح القطمة
او حتى افكه بمفتاح كام علشان اشتريه

وشكرااا
اخوكم محمد سالم