السلام عليكم ...
 يمكن دى أول مرة أشارك بموضوع و أخرج من طائفة المشاركين الصامتين .. و ده لسببين : الأول إنى أبارك للدكتور عمر ows212 صديقى العزيز و زوج أختى- برضه - بولى العهد الجديد ... اللى لسة مش عارفين إسمه عشان ما قرروش ...
السبب الثانى هو إنى عزمت و الحمد لله إنى أشترى سيارتى الأولى ... و بعد مداولات كثيرة و مفاضلات مابين الجديد اللى تشتريه و تشترى بيه دماغك و المستعمل اللى عامل زى البطيخة يا تطلع حمرا يا تطلع قرعة ... قررت الاتجاه نحو الزيرو ...و الحقيقة أنا محتار بين كذا خيار ..
الأول : دايهاتسو ماتيريا (حبيبة قلبى) أوتوماتيك
 الثانى: فورد فيستا الهاتشباك أوتوماتيك
 الثالث: فيات جراند بونتو أوتوماتيك
 الثلاثة فى نفس الفئة السعرية تقريبا ... و الثلاثة سعر اعادة البيع بتاعهم وحش و دى نقطة مش مهمة لأنى مش ناوى أبيع تقريبا وش غاوى تبديل كل شوية .. و الثلاثة متقاربين إلى حد كبير فى المواصفات.. و الثلاثة فيه كلام عن خدمة ما بعد البيع و أسعار قطع الغيار بتاعتهم ...

 السؤال الأول: أنا خايف من المشكلة اللى باسمع عنها بخصوص علبة الدريكسيون .. و باتساءل هل المشكلة دى برضه موجودة فى الماتيريا و لا لأ ؟؟
 السؤال الثانى: هل المفضل إنى أستنى لموديل 2010 فى الماتيريا و لا أتوكل على الله و خصوصا انه مافيش أية معلومات عن الموديل ده حتى التوكيل رحت سألته فى اسكندرية فوجدت الجميع لا يعرف عن ... و حسيت انهم عايزينى اشترى دلوقتى و خلاص ... دول حتى ماكانوش عارفين الميعاد اللى حتنزل فيه ...
 السؤال الثالث: ايه الافضل فى الثلاث سيارات اللى انا بافاضل بينهم مع الأخذ فى الاعتبار إن موضوع سعر إعادة البيع مش فارق كتير لو فيه حد عنده معلومات رجاء ما يتقلش عليا ...
شكرا للجميع