محتار بين اوبترا و صني..ياريت يا باشمهندس سبعاوي تحل مشكلتي
يا جماعه انا معايا 88 الف جنيه ومش عارف اشتري نيسان صني موديل 2010 زي مبيقول بتاع المبيعات فى سمير ريان (ولا هيا موديل 2009 وهو بيشتغلني لان تاريخ صناعه الصاج مش موجود فى الليبل الى فى الكابوت ) ولا اشتري اوبترا 2010 بردو ( مش عارف ليه كل لما اسأله على عربيه يقولى موديل 2010 ) ماعلينا مش ده موضوعنا موضوعنا ان فى مميزات فى كل عربيه من وجهه نظري تعالوا نبتدي بالاوبترا :
1- عربيه فى ناس كتير اوي فى مصر مشترينها معني كده انها عربيه كويسه وعليها اقبال شديد
2- قطع غيارها متوافره فى كل مكان ( من الاخر معاك فلوس توكيل هتغير فى التوكيل ممعاكش انزل التوفيقيه او الحرفيين وشهيص نفسك هناك )
3- صالونها اوسع واكبر من النيسان صني ال EX
4- التابلوه بتاعها افخم بكتير من الصني ال EX
5- حجم العربيه اكبر من ال EX
6- مع واحد صحبي وهو شاب وانتوا عارفين سواقه الشباب جري على الطرقات السريعه وغرز ولازم الموتور يكون بيشد والعربيه تكون الاستابيلتي بتاعتها ممتازه وكان رد الراجل العربيه زي الفل من الموتور للتكييف للثبات للشد وجربتها ولقيتها حلوه اوي
طيب ايه العيوب بقي :
1- العربيه كوري من الاخر دايو وعمليه ان موتور دايو يركب على عربيه تانيه ده فى حد ذاتيه يقلق
2- العفشه بتاعتها حاسيتها ناشفه ومش سلسله
3- بسمع انها بتاكل بنزين كتير
4- سمعت من النت ان اعطالها كتير وتوكيلها وحش اوي ومعاملته للعملاء سيئه للغايه
5- خايف من الموتور بتاعها من اول شده او جري يفيص مني لاني مجنون فى السواقه يعني بحب العربيه تكون معايا وقت ماشد معاها تشد ومتقولش لا وقت ماريحها احس بنعومتها عايز موتور قوي والعفشه حلوه وناعمه وعايز تكييف جامد علشان الحر بقي ولا حر الخليج وعربيه تستحمل السفر كتير ومتاكلش بنزين كتير وعربيه تكون مش بتاعه شاب بس يعني تكون بتاعه عيله بردو (مش عارف اعتقد ان ده حقي اني اركب عربيه وادفع فلوس متهيألى اني مبطلبش المستحيل ولا مواصفات عربيه زي دي مستحيله فى مصر !! )
طيب سيبنا من الاوبترا يا معلم وهتقولى فكك من الكوري وبتاع ودي عربيه وحشه
ندخل على النيسان الصني بما انهم فى نفس السعر والاتنين مانويال
ايه المميزات بتاعه الصني الى هيا 2010
1- فول اوبشن (هيا هيا مع الاوبترا مختلفناش فى حاجات كتير )
2- العربيه ياباني يعني موتور وتكييف وعفشه زي الفل
3- لما ركبتها من جوه لقيتها حلوه وواسعه الى حد ما
4- قطع غيارها بردو متوفره بره التوكيل وجوه التوكيل ولو لقدر الله لو حصل حاجه ممكن تتصلح فى ساعتها
5- بتاع المبيعات بتاع سمير ريان قالى ان عفشتها عفشه رياضيه ومحدش بيشتكي منها لان كان فى عيب قبل كده ان العفشه بتاعه الموديلات القديمه مكنتش بتستحمل الهبد بتاع المطبات والطرق بتاعه مصر فتفادوا العيب ده وعدلوا العفشه بعفشه رياضيه فياريت حد يقولى الكلام ده صح ولا الراجل بيقول اي كلام وخلاص وخصوصا ان طرقنا هنا فى مصر ماشاء الله حرير ومفيهاش ولا مطببات ولا حفر ولا اي حاجه خالص .
6- حاسس ان العفشه بتاعتها انعم من عفشه الاوبترا وده واضح لما بهز المساعد الخلفي والامامي والعربيه واقفه
7- وفى الاخر الراجل قالى قبل متشتري هخليك تعمل تست سواقه للاوبترا وللنيسان وده مبعملوش مع اي حد وانا خايف اركب النيسان واطلع عنيها فى التست ده الراجل يموتني بما اني مسوقتش النسان بس انا مجرب الاوبترا وسوقتها ولقيتها اشطه شغاله ويجي منها (بس بردو دول 88 الف جنيه عايز احسن حاجه بيهم :stink[1]:)
العيوب بقي(اعتقد ان العيوب وضحت فى المقارنه بس اوضح عيوبها من وجهه نظري كاول نظره للعربيه ) :
1- عيب شفته فى المنتدي لقيت ان مفيش فلتر تكييف (ياصلاه النبي احسن ) طيب هل العيب ده اتصلح فى الموديل الجديد الى ممكن اشتريه اذا ربنا كتبلى نصيب فيها باذن الله
2- عيب شفته تاني انه العربيه بتهبد فى المطبات ولازملها رجلشه فى علبه الدريكسيون (ياحلولى )
3- سمعت ان التقفيل المصري وحش اوي وبيبان فى الازاز من اول 5000 كيلو !!
4- سمعت ان العربيه بتاكل بنزين (يعني معدل استهلاكها كام كيلو فى الصفيحه ؟؟؟ علما بان العربيه مانويال ومش هشغل التكييف وعايز اعرف مع التكييف هتعمل كام كيلو فى الصفيحه ( ده كله داخل المدينه وبره المدينه ))
5- سمعت ان التوكيل بردو مش جامد اوي
6- فى واحد كنت اعرفه اشتري العربيه دي بعد مستلمها بيفتح التكييف مبيفتحش راح لبتاع تكييفيات يشوفلوا العيب منين قالوا ده فى سلكه مفصوله ( احد المكونات المصريه ضفيره الكهرباء (لا صنع اليابان ولا الصين ده بتاع بلدنا ومبيتكسرش يا خوفي من التقفيل المصري يا بدران ) )
طيب جميل اوي بعد الكلام الكتير ده كله عايز اعرف الخلاصه من كل الناس الى جربوا النيسان لان انا مقتنع بيها كعربيه حلوه باذن الله هتعمر معايا وياريت اعرف رأي الشباب ايه عن العربيه لاني شاب ولازم اعرف رأي شاب زيي يعرف يعني ايه لما يسخن مع واحد فى طريق سفر وفى وسط البلد وغرز ويعرف يعني ايه لما مزاجه يكون رايق ويشغل اغاني سلو وميبقاش عايز يسمع اي صوت فى العربيه غير صوت الكاسيت بس ويعرف يعني ايه لما اهله يرغموه يسافروا بعربيته ويحطوا شنط فى العربيه كانهم معزلين مش رايحيين مصيف وده طبعا بيأثر فى حموله العربيه ومطبات الهواء فى الطرق السريعه يعني هل من مطب هوا مع الحموله الواحد يحس ان الكاوتش بيحك فى الكارتيره ولا سوست المساعد بتخبط فى بعضيهم ولا ايه ويعرف كمان يعني ايه لما واحد صحبه يقولو عربيتي عطلت ويروح ياخده ويفاجئ ان معاه 6 كمان ويبقي فى 6 ركبين العربيه ده غير السواق طبعا (اي نعم هما مش 6 تخان بس بردو حموله ) .... بردو بعد ده كله انا بعت عربيتي القديمه علشان عايز اجيب عربيه جديده تستحملني 10 سنين قدام ان شاء الله وتكون عربيه العمر مشتكيش منها ويوم ماصلحها لو حاجه باظت فيها احس اني فعلا صرفت عليها فلوس بس بردو الواحد بيتعرض لمواقف كتير والعربيه بتثبتله انها اصيله ولا عربيه فكسانه ومتستهلش المبلغ الى دفعه فيها لاني اتخنقت من عربيتي القديمه من كتر معدلت فيها ولعبت فى العربيه بجد والله نفسي فى عربيه تستحملني ومصرفش عليها وفى نفس الوقت اكون راضي عن ادائها ومش محتاج اعدل فيها حاجه .... معلش طولت عليكوا بس حسيت اقولكوا كل حاجه نفسي فيها لاني لقيت الناس هنا فعلا بتفهم وياريت الافاده من الجميع وبالاخص المهندس حاتم ( السبع ) والمهندس سبعاوي