نيسان ليفينا . . . ملاحظاتى بعد 3000 كلم
العربية بشكل عام ممتازة جداً، ملاحظاتى كالتالى..
- التكييف اللى مكنش عاجبنى اتحسن جداً لدرجة انى مرة لما نزلت من العربية النظارة شبرت.
- صوت العربية حاسس انه بقى أعلى شوية وغالباً ده بسبب تغيير الزيت (موبيل 1 - 10000 كيلو) اصحابى نصحونى بزيت شل أو توتال (قالولى انه فرنساوى مستورد) ، على اساس انهم بيخلوا صوت الموتور أهدأ، يا ريت لو حد يقدر يفيدنى بمعلومة.
- الكيك داون فاق كل توقعاتى بصراحه، مره كنت عاوز اهرب من زفة عربيات فى الشارع دوست على البنزين وفى ثانية الـrpm وصل لـ 5000 والعربية سحبت بشكل رهيب.
- استهلاك البنزين داخل المدينة عمره ما بيوصل معايا لـ 180 كلم فى الصفيحة (التكييف شغال صبح وليل) وعلى الطريق كويس دايما بيعدى 220 كلم فى الصفيحة (مره وصل لـ240).
- بالمناسبة العربية مفيش فيها مؤشر حراره، بس فيها انديكاتور ازرق لما العربية تبقى لسه ماسخنتش وواحد تانى احمر لو العربية سخنت (وربنا يسها ومشوفهوش منور ابداً).
- الفرامل حلوة جداً ونفعتنى كذا مره مع التاكسيات البشوات اللى بيقفوا يحملوا زباين فى نص الشارع.
- علو العربية كويس قوى بالنسبة للمطبات والبلاعات اللى فى شوارعنا (حد يعرف ايه الصعب فى ان البلاعة تبقى بمستوى الشارع؟ يمكن معضله كبيرة وعاوزة خبير ولا لجنة من الخارج!!) . ليا تجربة أليمة واحده مع المطبات فى مره كنت قلبت فيها العربية ميكروباص فكان معايا 4 أشخاص (يعنى متوسط 450 كيلو احنا الخمسه) وحوالى 25-30 كيلو فى الشنطة). ساعتها حسيت ان العربية هبطت ولبست مطبين تلاته على طريق المنصورة-القاهرة.
تحياتى للجميع