ايه الحلاوة دي انت طلبت تشتري كابل ولا ايه .............. اه من ورايا طيب ماشي بالتوفيق ان شاء الله يا محمد منورنا في القسم ياباشا
عرض للطباعة
ولا أنا مبسوط أوي منكم يا شباب الــ VW منورين والله فعلا الله يرحم أيام محمد إبيزا ،، فكرتوني بالمواضيع بتاع زمان
ويارب المشكله تتحل ويكون الموضوع بسيط ،،، بصراحه أنا ١٣٠٠ كربراتير فمش هقدر أفيدكم بمعلومات بس أنا متابع وفرحان أوي
وشكر خاص لأستاذ إيهاب منصور و m.mostafa80
بجد إنتوا عمركم ما إتأخرتوا عن مساعدة حد وربنا يوفقكم في حل المشكله
والله عندك حق يافادى فين ايام محمد ابيزا الراجل ده فعلا كان معايا من اول ماجبت العربية وكان معايا فى كل مشكلة لحد ماتخلص ومن يومها والقسم هدى عن الأول بكتير
المهم ياشباب اللى حصل كالتالى الصبح وددتها للكهربائى ووصلنا ببطارية ومدارتش بردو المهم فتحنا الطلمبة وشلنا الخرطوم لقيناها شغالة عادى بس الغريب والمفجأة انها طلعت ميه على بنزين المهم الكهربائى قالى كده الكهربا شغالة بتاعت العربية فارحت جبت ميكانيكى تعبان كده راح فاكك فلتر البنزين ونضفه وفضل بقى يسحب من التانك لحد ماطلع الميه وراح حاطط بقى بنزين بعد كده كشفنا على الخراطيم اللى بتودى للموتور لقناها بطلع بنزين عادى خالص ومفيش مشكلة وبردو مش عايزة تدور جه الراجل بتاع المفاتيح انا كنت فاكره هايشوف الكنترول زى برنامج الأعطال لكن طلع معاه جهاز صغير كده بيخش بيه ويعرف الكنترول على المفتاح وعشان تزيد العقد العربية طلبت البن كود وطبعا انا مش عارفه ولا الراجل فلحل قالى الإيمو وحوارات كتيرة كده فانفض واعتبرته مجاش اصلا
فانا بكره هانضف كده الرشاشات عشان تطلع الميه اللى فيها المهم ان الميكانيكى ده قالى العربية محتاجة بس تتوصل ببطارية وتفضل تدورها كذا مره عشان الرشاشات تنطر الميه وهاتدور عادى وانا مابقتش فاهم حاجة خالص وزهقت
المهم دلوقتى هو انا عايز اعرف المنظف بتاع الإنجكشن او الكربراتير ده اللى هانضف بيهم الرشاشات مش اسمه بردو wd40
تقريبا كده هو ازرق ومزيل للصدا
ويامحمد لو جبت الكابل يبقى اقولك مبروك لأن الميكانيكى بتاعى كان بيدور عليه ولقاه غالى جدا جدا بيعدى جامد فاجاب الصينى تقريبا رخيص وشغال معاه زى الفل
المهم بقى ساعدونى فى المسألة دى
[caution]
تنبيه بمخالفة القاعدة رقم 6 بند أ
ممنوع الكتابة باللون الأحمر
الرجاء مراجعة قوانين المنتدى
______________________
مشرف الأوروبى 1[/caution]
السلام عليكم
كده تقريبا انت خلصت نصف الحل وهو انك نضفت دورة البنزين لحد الموتور وناقص انك تنضف الرشاشات بالماسورة اللي قبلها وكمان بوابة الإنجيكشن وعشان تكون عارف انت فعلا محتاج wd40 لتنضيف الرشاشات هتتفك عادي بالماسورة بتاعتها وتنظفها و أنصحك تجيب ميكانيكي كويس فاهم عشان يعرف يعمل الحوار ده وبعدين تفك كمان البوجيهات وتغيرها بالمرة وتتأكد من عمل الموبينه وكابلات الكهرباء برضه بالمرة كل ده الميكانيكي هيبص عليه ويتأكد انهم مافيش فيهم مشكلة ولما كل ده يبقي تمام جرب ببطارية سليمة ودور وان شاء الله هتدور بدون اي مشاكل وربنا يوفقك وتخلص من الحوار ده
وما تنساش تبقي تعرفنا أخبارك اول بأول واحنا تحت امرك في اي حاجه نقدر نساعد بيها
الله يكرمك يا أستاذ فادي وربنا يجعلنا سبب في خدمة الناس لوجه الله فقط
وعايز اقلك اني اول ما اشتريت عربيتي من اكتر من سنة كنت ما اعرفش اي حاجه عن العربيات ولا الفولكس ولا ابيزا ولا غيره فقط كل اللي عندي اني مهندس صيانة ما كينات وانظمة كنترول والكترونيات وكهرباء واي حاجه تخص هذا المجال والحمد لله متوفر معايا العدة اللازمة لأي شئ ممكن تتخيله وبمساعدة الأخوة هنا في المنتدي قدرت اني اعمل تقريبا 70% من مشاكل عربيتي وافهم كل اجه فيها بفضل الله والمشاكل اللي بكبردماغي عنها هيا حاجات الميكانيكا اللي فيها فك وتركيب وشحم ووجع دماغ بروح لميكانيكي حبيبي بيخلص الموضوع وبكون مجهزله اللي هيغيره قبل ما اروح
في النهاية أفضال ناس كتييييييير هنا علي دماغي وهما اللي علموني ويجب اني ارد جميلهم
أستاذ محمد ابيزا و ابيزا و مهندس اسامة موسي واخويا محمد مصطفي
وربنا يجعله في ميزان حسنات الجميع ان شاء الله
تمام يا ايهاب بس دلوقتى انا اصلا الميكانيكى بتاعى بعيد اوى عنى فاللى بتعامل معاه ده ميكانيكى بس مش اوى فانا بجيب المعلومات من الميكانيكى بتاعى من على التليفون وبقولها لده عشان يعملها وهو قالى هاترش فى الخرطوم الداخلى للمسطرة دى هايطلعلك الرواسب من الخارجى
لسه هاعمل ده بكره ان شاء الله
والبوجيهات خليت الميكانيكى شافها النهارده قالى سليمة والبطاارية دى اصلا بقالها تلت شهور بس فاجديدة يعنى بس هى كد اعتقد نامت من كتر الدوارة فاهاشوف بكره كده هو الميكانيكى بيقولى من الأخر عربيتك عايزة بس تدور وتتوصل ببطارية وهادور بس انا مش مقتنع اول مره تواجهنى فعلا مشكلة غامضة اوى كده لازم تقعد تتبع فيها بقى عشان تعرف العيب
تمام كده علي العموم انا فقط كنت عايز حد بيفهم عشان اللي يفكه يعرف يركبه صح لأن فيه ناس كتير الله المستعان مش عايز اغلط
المهم موضوع البطارية ده مش انها جديدة ولا قديمة المقصود انها تكون مشحونة كويس بس وانت اكيد زمانك فضيت شحن بطاريتك من كتر المحاولات عشان كده محتاج بطارية مشحونه كويس فقط وان شاء الله كله هيبقي تمام بعد التنظيف وخليه كمان بعد ما تدور العربية ان شاء الله ينظفلك بوابة الإنجيكشن اللي تحت عمة الهواء وبكده ان شاء الله هتلاقي تحسن ممتاز في اداء العربية بس عايز اقلك ان ممكن بعد ما تنظف البوابة تلاقي ارتفاع شوية في عداد لفات الموتور ما تقلقش هتهدي تاني لوحدها بعد فترة حوالي اسبوعين بس صدقني انا لما عملت النظافة دي عندي فرق كتيييييييير في استهلاك البنزين والسحب وربنا يوفقك
طيب يا ايهاب هى البوجيهات تتعرف منين انها شغالة وطبعا لو البوجيهات باظت عمرها ماتدور ولا زق ولا اى حاجة صح ..؟؟؟؟
وبعدين موضوع البطارية انها ممكن تكون السبب مش معتقده خالص لأن امبارح بليل زقتها ورمتلها مجبتش اى حاجة ولا حتى صوت
بجدانا حاسس ان الموضوع ده هايطول اوى ومش هايبقى سهل لأنه معقد اوى ومرتبط بكذا حاجة
البوجيهات ما بتبظش خالص هيا بترطب او بتتهبب وده بسبب سوء حالة البنزين او سوء حالة المحرك داخليا واكيد طالما بتقول البنزين كان عليه مياه يبقي كل سنة وانت طيب فيهم غيرهم وريح دماغك بس خلي الميكانيكي يتأكد من وجود شرارة الإشعال في كل الكابلات بتاعت البوجيهات
البطارية لو بتقوم كهرباء العربية لما بتفتح الكونتاكت وكذلك المارش لما بتيجي تدور يبقي مافيش منها مشكلة لكن اللي اقصده انك بتحاول بيها بقالك يومين يعني خلاص شحنها فضي واكيد محتاجه شحن يا تشحنها يا تجيب كهربائي بطاريته يدورلك العربية
وبعدين الموضوع طول بسبب انك مش لاقي ميكانيكي فاهم يخلص الموضوع غير كده الموضوع ضرب منك في اكتر من اتجاه عشان كده محتاج صبر شوية وربك يسهلها ان شاء الله