مشكلة في فتيس نوبيرا اوتوماتيك

**samirayad** · 19-08-2009 04:02 PM

تصدق كلام مقنع

طيب الحمد لله ...أن بقه فيه سبيل للأقناع

بس معني ايه التفويت دا علشان ابقي واضح مع حضرتك

أى فتيس أوتوماتيك بيبقى جواه مجموعة كلاتشات بتعمل بنظرية التعشيق الهيدروليكى من خلال ضخ الزيت من الpressure line
الخارج من طلمبة زيت الفتيس الى الفلف بودى ومن خلال السولونويد المعين (لمرحلة تعشيق معينه )
بيتم توجيه الزيت لتعشيق الكلاتش ده
بيتكون من أيه الكلاتش
مجموعه من الأقراص الأحتكاكيه ( أقراص صلبه زى أوجه الديسك والفلام مثلا فى الفتيس المانيول )
(وأقراص متيله ....عليها تيل زى بتاع الفرامل بتاع مواتير الكهرباء الكبيره .....أو زى تيل أسطوانة الدبرياش العادى )
لما بيحصل تفويت نتيجة هبوط ضغط الزيت مثلا على بستم تعشيق الكلاتش المعين
الوجه الصلب بيفرك الوجه المتيل ويحرقه ولونه يسود وتتولد سخونه عاليه جدا بسبب الفرك ده ويتحرق الزيت
يعنى الأوجه الأحتاكيه باظت .....يعنى حصل المراد وحصل التفويت
يبقى الفتيس ...........كل سنه وأنت طيب
لأن تكلفة تغيير الكلاتشات والسيلات بتبقى عاليه جدا

**WalidAdel** · 20-08-2009 02:06 AM

المشاركة الأصلية كتبت بواسطة samirayad

طيب الحمد لله ...أن بقه فيه سبيل للأقناع
أى فتيس أوتوماتيك بيبقى جواه مجموعة كلاتشات بتعمل بنظرية التعشيق الهيدروليكى من خلال ضخ الزيت من الpressure line
الخارج من طلمبة زيت الفتيس الى الفلف بودى ومن خلال السولونويد المعين (لمرحلة تعشيق معينه )
بيتم توجيه الزيت لتعشيق الكلاتش ده
بيتكون من أيه الكلاتش
مجموعه من الأقراص الأحتكاكيه ( أقراص صلبه زى أوجه الديسك والفلام مثلا فى الفتيس المانيول )
(وأقراص متيله ....عليها تيل زى بتاع الفرامل بتاع مواتير الكهرباء الكبيره .....أو زى تيل أسطوانة الدبرياش العادى )
لما بيحصل تفويت نتيجة هبوط ضغط الزيت مثلا على بستم تعشيق الكلاتش المعين
الوجه الصلب بيفرك الوجه المتيل ويحرقه ولونه يسود وتتولد سخونه عاليه جدا بسبب الفرك ده ويتحرق الزيت
يعنى الأوجه الأحتاكيه باظت .....يعنى حصل المراد وحصل التفويت
يبقى الفتيس ...........كل سنه وأنت طيب
لأن تكلفة تغيير الكلاتشات والسيلات بتبقى عاليه جدا

كلام جميل جدا ياباشمهندس والله
بس السؤال بقي دلوقتي ماشي الزيت اسود و خلاص و الفتيس كل سنه و انت طيب
اولا
هل بقي اغيرله زيت ولا امشي زي ماقالوا في التوكيل لحد مايقف خالص
ثانيا
هل اللي حصل ده عمر افتراضي للفتيس ولا سوق استخدام من صحبي (اشك) ولا هو فعلا عييييب و الراجل قال بدل مايغيره في الضمان او حتي يقولي داعيب تصنيع اقوله الفتيس باظ و سيبه و ماتجيش جنبه و اهو فتيس لازم يتصلح في الضمان و انا حورت علي صاحب العربيه و يولع هو و الفتيس و العربيه اصلا

معلش الاسئله كتيييير بس انا مضايق دانا عمال اقوله حس و مس في الفتيس دا علشان هو بيتلكك اصلا قوم لما احنا بنحس و نمس فييييييه باظ بردوا

**samirayad** · 20-08-2009 01:38 PM

هل بقي اغيرله زيت ولا امشي زي ماقالوا في التوكيل لحد مايقف خالص

دى ترجعلك ......
بس طبعا لازم حتغير الزيت ....
دا لو كان الفتيس لسه محمل وشغال ....والكلاتشات لسه فيها الرمق
والعربيه بتسحب وماشى الحال .....ولو عاوز رأيى ...غيرله الزيت وشوف نظام الفلتر
أصل برضه تكاليف تغيير الكلاتشات عاليه
طالما ناوى تبقى تغير بفتيس تانى .....ومممكن تعمل مقارنه بين تكلفة الأصلاح وشراء فتيس أستعمال

هل اللي حصل ده عمر افتراضي للفتيس ولا سوق استخدام من صحبي (اشك) ولا هو فعلا عييييب

هو مش سوء أستخدام ولاحاجه ...لأن من كلامك الراجل بيستعمل الفتيس بسلاسه ...لا فيه نظام أمركه ولا ديالوله
المشكله فقط فى عدم الألتزام بمتابعة قياس منسوب الزيت مثلا
أو الأهتمام بدورة تبريد الزيت ....وقد يكون هناك أهمال فى ميعاد تغيير الزيت مثلا ...(على فكره ده بشكل عام )
صاحبك بقه أهمل حاجه من دول غالبا

**WalidAdel** · 20-08-2009 03:09 PM

الفتيس شغال كويس و الحمد لله و السحب كويس بردوا مافيش اختلاف هو كان بس المشكله في الصوت اللي بيطلع في النقله الاولي دي زي ماتكون بحه و حكه صوتها مش ظريف

هل بقي لو غيرت الزيت ممكن الفتيس مايشتغلش زي مالتوكيل بيقول ولا دي فتيه منهم

و بعدين زي ماقولت لحضرتك احنا بنعمل الصيانات في التوكيل حتي اخر مره في صيانة ال 40 الف دفعنا حوالي 3400 جنيه تغيير مقصات و صيانه و كده و بعدين هو مش المفروض طالما انا ملتزم بالصيانه بتعة العربيه في مواعدها هما يبقيوا يبصوا علي زيت الفتيس و الفلاتر و كده و لا لازم انا اقولهم
اصل انا كنت قولت لصاحبي خالي الصيانات في التوكيل علشان الفتيس و كده و بلاش نروح لميكانيكي و يفتي في الفتيس ولا حاجه التوكيل بيشوف و لو في حاجه بيعملها اضمن من اي ميكانيكي تاني

**samirayad** · 20-08-2009 03:21 PM

و لا لازم انا اقولهم

لازم تقولهم .....
أنا عربيتى مانيوال وقربت أطلع من الضمان ...وعمرهم مابصوا على زيت الفتيس المانيوال
التوكيلات دايما مابيبصوش لمصلحة العميل
مصلحتهم بس هى بيت القصيد .....يعنى دى اللى تهمهم
ولو عاوز رأيى للمره التانيه ....غير الزيت وظبط المقاس صح (يمكن ربنا يسهل ) والأمور تبقى تمام فى كل النقلات وأطمن على سربنتينة تبريد الزيت وشوف نظام الفلتر

**WalidAdel** · 20-08-2009 03:45 PM

اخر حاجه بقي ياباشا دلوقتي لو جيبنا فتيس استيراد هل هايبقي بختك يابو بخيت و يقعد في العربيه كام شهر و يطير زي الفتيس دا ولا بيبقي كويس و هايدفع فييييه فلوس و نبقي نعمل الصيانات بتاعته و هايقعد في العربيه مده كويسه يعني

**samirayad** · 20-08-2009 06:45 PM

اخر حاجه بقي ياباشا دلوقتي لو جيبنا فتيس استيراد هل هايبقي بختك يابو بخيت و يقعد في العربيه كام شهر و يطير زي الفتيس دا ولا بيبقي كويس

أى حاجه used بتبقى فعلا بختك يا أبو بخيت

و هايدفع فييييه فلوس و نبقي نعمل الصيانات بتاعته و هايقعد في العربيه مده كويسه يعني

ماهو علشان كده .....المفروض لما نشترى أى حاجه من نظام ( بختك يا أبو بخيت )
نخدها عن تجربه ......ونمسك معانا جزء من ثمنها
على مانشوف البخت عامل أزاى
هههههههههههههههههه