إتجوزت وإنت عندك كام سنة؟؟؟؟؟

**DONYO** · 16-03-2008 03:59 PM

السن المناسب هو بعد 25 سنة وفور توافر القدرة المادية بس بحد ادنى 25 سنة علشان النضج

**dr.amr** · 16-03-2008 04:15 PM

المشاركة الأصلية كتبت بواسطة محمد ابراهيم 1

أولا اللى بياخد تكليف مبياخدش جيش والعكس صحيح
ثانيا ما دام مفيش حد حيساعدك يبقى عليك وعلى الزواج المبكر من واحده بنت حلال اصيله تستطيع التحمل معاك الفتره الأولى وتكون متطلبات الزواج منها مش كبيره وده موجود
وان شاء الله ربنا يوفقك ليها
اذا قصدت الخير
قال رسول الله صلى الله عليه وسلم
إطلبوا الرزق بالزواج
وقال أيضا
من تزوج إمرأه لمالها لم يزده الله إلا فقرا
وبإذن الله انت ليك مستقبل كبير لكن عليك بالصبر
ثالثا بالنسبه لموضوع الندم متقلقش كده كده حتندم

شكرا علي ردك
بس موضوع الجيش ده اول مره اسمع بيه
هسأل واتأكد بس انا شبه متأكد انب باخد الاتنين:o

**casperinoo** · 16-03-2008 07:34 PM

المشاركة الأصلية كتبت بواسطة محمد ابراهيم 1

أولا اللى بياخد تكليف مبياخدش جيش والعكس صحيح

انا اول مره اسمع الكلام ده ده بجد ياجدعان ولا ايه!

**zeyad1810** · 16-03-2008 07:50 PM

المشاركة الأصلية كتبت بواسطة dr.amr

طيب انا عيز اسأل حضرتك سؤال
واحد زيي في رابعه طب عين شمس
قدامي 4 سنين لسه في الكليه
وسنه جيش
يعني خمس سنين
يبقي المجموع 26 سنه علي اعتبار اني 21 سنه
طبعا اكيد عارف ان انا بتخرج من طب ممارس عام = صفر كبير
هشتغل تكليف في اخر الدنيا بمرتب حقير لمدة سنه مع ناس غريبه= 27 سنه
وعلشان اقدر اشتغل عايز كمان 3 او 4 سنين علشان اخد الماجيستير= 31 سنه
وبعد كده اكون نفسي واشتغل وبعد كده اتجوز اي حاجه والسلام يعني مش قبل 34 -35 سنه
يعني في حوالي 10 -15 سنه علي الجواز
تقدر تنصحني بحاجه اعملها لتقليل الفتره ده
انا مش شايفلها مخرج غير اني محطش موضوع الجواز في دماغي
انا ساعات بييجي عليا وقت افكر جديا ان مااتجوزش لأني معنديش وقت
وده بيسببلي حاله نفسيه سيئه وضيق شديد
مش عارف اعمل ايه لأني فعلا مضايق جدا وحاسس ان انا هندم علي كده كتير اوي
بس هعمل ايه ما باليد حيله
حسبي الله ونعم الوكيل
تخيل سيادتك علشان ادرس طب انا ممكن اقعد في الشارع من 8 صباحا الي 1 بالليل

بصراحة انت حالتك مشكلة بس ماينفعش تتعلم وتتجوز مع بعض يعنى اصبر لحد اما تخلص تعليم وربنا يكرمك بواحدة بنت حلال

**TaoTao** · 18-03-2008 02:32 PM

أنا تزوجت وانا عندي 26 سنة، وده سن مناسب من وجهة نظري، بالنسبة لموضوع الجوواز أو العربية افتكرت واحد صاحبي كان بيقولي أجيب الشقة ولا العربية؟ قلتله انت هاتجيب الشقة ليه؟ قاللي هشان اتجوز، قلتله: الجواز سنة مؤكدة بس العربية مش سنة مؤكدة. الراجل اقتنع. واحنا الاتنين لسة ماجبناش العربية :D:D

المشاركة الأصلية كتبت بواسطة Hazemabdallah

أنا و لله الحمد , اتجوزت من سنة , و انا عندى 27 سنة , بعد حوالى 5 سنين من التخرج . من هندسة عين شمس ..

أمال أنا لسه مجبتش عربية ليه

؟! ماهو كان الاختيار يا اما اتجوز , يا أما أجيب عربية , و انا اخترت الجواز , و الحمدلله اختيارى كان سليم

( عشان بس الحكومة واقفة جنبى :chain: ) , بس الدور دلوقتى بقى على العربية .

يا جماعة أنا بهزر طبعا , مفيش أحسن من الزواج و الاستقرار ..

و كما أوصانا النبى ( صلى الله عليه و سلم ) :
( يا معشر الشباب من استطاع منكم الباءة فليتزوج، فإنه أغض للبصر وأحصن للفرج )

**ehabradwan** · 19-03-2008 10:16 AM

انا اتجوزت و انا عندي 26 سنة من غير شقة و لا عربية
دلوقتي العربية جت لسه الشقة . ربنا ييسر
انا قاعد في قانون جديد على فكرة لحسن حد يفتكر ان انا قاعد فالشارع :) انا قصدي على الشقة التمليك
بس مش عارف ليه كل شوية افتكر سمير غانم في المتزوجون ( هاموت هاموت و اعرف مين اللي زقني )
انا بهزر على فكرة الجواز حلو باردو ( ساعات )

**blazer** · 08-10-2008 05:54 PM

والله الجواز دا نعمه من نعم ربنا علينا
بس المشكله فى التعقيدات اللى مجتمعنا عملها
يعنى اى حد بيفكر يتجوز هتتكلف مبالغ رهيبه
يعنى على الاقل شقه و متجهزه دا غير المهر و الشبكه والمقدم ومصاريف الفرح ......
ودا بياخر سن الجواز اوى عندنا
يعنى مش حرام اما بنت تتجوز و هى عندها 30 سنه وولد يتجوز و هو عنده 35-40 سنه!!!
دا بقى يعيش ازاى مع مراته ويبتدى حياه هيبتديها و هو عنده 50 سنه
انا شايف ان انسب سن للجواز هو 26 سنه
بيكون الواحد نضج فيه وفهم معنى المسؤليه
ولو كان بدرى عن كدا يبقى افضل لو اتوافرت الامكانيات الماديه

**D . a .\ AYMAN** · 09-10-2008 12:35 AM

المشاركة الأصلية كتبت بواسطة Hazemabdallah

و كما أوصانا النبى ( صلى الله عليه و سلم ) :
( يا معشر الشباب من استطاع منكم الباءة فليتزوج، فإنه أغض للبصر وأحصن للفرج )

المشاركة الأصلية كتبت بواسطة MTAK

أعتقد ان الزواج ليس له سن رقمى معين
انما الزواج بالنضوج

النضوج الذهنى
النضوج العاطفى
النضوج المادى
و اهمهم "من وجهة نظرى"

النضوج الدينى

و النضوج ليس مرتبط بسن معين ايضا
بل انه يتشكل حسب معتركات الحياه مع كل واحد

وفقكم الله لما فيه الخير

المشاركة الأصلية كتبت بواسطة ashalaby

السن المناسب هو السن اللى يكون فيه نضوج عقلى وعاطفى .. يعنى بصراحة واحد من شباب اليومين دول لو لسه فى الكليه وعنده مقدرة أنه يتجوز أكيد هيتجوز أول واحدة تدخل السكشن برجليها اليمين :)
زمان كان الصحابة بيتجوزوا من 14 و 15 سنة , بس كان الواحد منهم بيقود جيش مش أسرة
(الرسول صلى الله عليه وسلم اتجوز عنده 25 سنة ودا لأنه كان فقير)
وبصراحة الزواج نعمة نعمة نعمة لا يقدرها إلا من جربها بعد حياة العزوبية والبهدلة (خاصة لو رزقك الله بزوجة بنت حلال تجد فيها السكن والمودة)
وبصراحة كلام العزاب بتاع الحرية وحياة الإنطلاق دا بصراحة كلام فاضى بيصبروا بيه نفسهم (او بيضحكوا بيه على نفسهم) لما يتجوز ويلاقى كدا ان فى كائن قاعد مستنى تشريف سعادته عشان ياكل معاه ولما يلاقى ابنه أو بنته بتضحكله هيعرف إن حياته بقى ليها معنى وبجد هيندم أن متجوزش بدرى !!!
قابلت فى شغلى بعض الأشخاص (من الحرفين - واحد سواق نصف نقل والتانى سواء عربية فى شركة كبيرة) اتجوزا وعندهم 19 سنة , والله ثم والله وجدتهم مختلفين تماما عن غيرهم (مبيشربوش سجاير محافظين على الصلاة وفعلا حسيت انهم عاقلين جدا غير بقيه زملائهم )

كما أن لى نظرية شخصية إفتكاسية ..(الله سبحانة وتعالى حدد سن معين للبلوغ الجنسى ) لو دققت النظر قليلا فى من تزوج فى هذة السن أو قريبا منها لن تجدهم مروا بأى من مشاكل مرحلة المراهقة والتى أشعر شخصياً أنها مصطلح حديث , فلم نسمع عن مثل هذة المشاكل مثلا فى جيل الصحابة , ولم نجد فى إحاديث الرسول صلى الله عليه وسلم أو سيرة الصحابة ما يخص هذة الفترة (مع أهميتها وكثرة مشاكلها) وذلك لأنهم لم يعانوا منها , فالزواج يحل المشكلة الجنسية التى تكون المأرق الأول والثانى والثالث و ......
لمن هو فى هذة السن , كما انه يمارس سلطته فى إدارة أسرة فليس محتاج للتمرد لإثبات ذاته , وسيجد من المسئولية ما يلهيه عن سواه من سفاسف الأمور ويساعده على إكتساب الخبرة الحياتية والعمليه سريعا

لو قارنت بين واد عنده 10 سنين شغال تباع على عربية مكروباص وبين إبنك الى عنده 10 سنين وخريج مدارس لغات (صحيح ابنك يعرف أكثر فى الإنجليزى والعلوم و ......) بس هتخاف تخليه يعدى الشارع لوحده , التانى لو بات فى القسم أظنه هيعرف يتصرف !!

المشكله عندنا انك بتظل فى دوامة التعليم 20 سنة وبعدها تبدأ تتعلم الحياة لما تتخرج

من الأخر اللى يقدر يتجوز بدري ينجز وكما قال رسول الله صلى الله عليه وسلم
"يا معشر الشباب من إستطاع منكم البائة فليتزوج ,فإنه أغض للبصر وأحصن للفرج ومن لم يستطع فعليه بالصوم فإنه له وجاء" أو كما قال رسول الله صلى الله عليه وسلم

ولعلمكم مفيش كائن حيء اليومين دول بيظل أعزب لحد 30 وانت طالع , إلا في بلاد المسلمين وتأخير سن الزواج من مخططات الغرب , وهما بالظبط أول ما الواد والبت بيجيبوا 15 سنه بينجزوا علطوا (فطرة الله - شهوة ومفيش دين يحكمها أو عرف يفرملها )
إحنا بس الكائنات الحية اللى بتنيها للسن ده من غير جواز :(

تزوجوا ....
"ثلاثة كان حقاً على الله أن يعينهم منهم الناكح يريد العفاف "

الله ينور عليكوا بجد ... هوة ده الكلام المظبوط

المشكلة ان حتى الناس اللى بتقول السن لازم يكون من 24 على الأقل ... هية برضه صح لإنها بتقول كده لأن سن النضج في بلدنا المحروسة إتأخّر قوى عن الصح وعن المفروض بسبب نظم تعليم وتربية فاشلة فاشلة فاشلة .... من هنا لحد السنة الجاية

... الولايات المتحدة لما روسيا أطلقت قمرها الصناعي الأول في العالم إترعبوا لأن روسيا سبقتهم وأول حاجة عملتها انها غيرت كل نظم التعليم بتاعتها بما يكفل انهم يطلعوا جيل يقدر ينافس ويبتكر ويقود من وهو صغير وده فعلا اللى حصل لدرجة ان انا قرايبي اللى لسة في ثانوي هناك (HIGH SCHOOL) أكبرهم عنده 16 سنة لما بقابلهم بحس انهم ممكن يمشوا عشر بيوت أحسن مني بمراحل سواء من ناحية التفكير الإقتصادي السليم والتربية السليمة غير المعقدة وما الى ذلك من جميع الجوانب المهمة .... وشبابهم دلوقتي يقدر يمشي بلد لوحده ويقودها ويتخذ فيها قرارات مصيرية صحيحة لكن شبابنا بيقعد لمدة سنة أو أقل أو أكتر مش عارف هوة عايز يدخل كلية إيه (طب ولا هندسة ولا لأ علوم طب خلاص خليها صيدلة لأ طب انا ميولي أدبية ونفسي أتعلم فن ورسم ) وفي الآخر تلاقيه فشل لأنه دخل كلية مش هية اللى عايزها ومش هية ميوله أو لأن أبوه عارف مصلحته أكتر منه ودخله كلية غصب عنه هوة مش عايزها .... ونصرف مليارات على حاجات عبيطة ونيجي عند التعليم نقول أصل الميزانية والموارد قليلة

وفي الآخر عايزين إزاى سن الجواز يبقى بمجرد البلوغ تطبيقا لأحاديث الرسول الكريم صلى الله عليه وآله وسلم ... ده يادوب قوي على 20 - 25 سنة لو الدنيا كويسة معاه وأبوه ساعده شوية كمان وهوة كان طالع عاقل

المشكلة في البلد وفي الفكر الأوحد اللى بيحكمها وماشية بيه بقالها 30 سنة من غير أي تجديد أو إرتقاء بالمستوى

انا اتجوزت وانا عندي 27 سنة والحمدلله الفضل يرجع بعد الله سبحانه وتعالى الى والدي اللى ساعدني تقريبا بالشقة وبالعربية كلهم ولو ماكانش كده كان زماني لسة قاعد لغاية دلوقتي لم أتزوج

كان الله في عوننا جميعا
وربنا يصلح حال البلد والشعب والأمة لما يحب ويرضى

**mo7amed_omara** · 09-10-2008 04:30 AM

انا عندى 23 سنة و لسة طبعا
بس انا عامل خطة للموضوع دة حلوة خطة دى ويارب تكمل على خير و اكون لقيت شغل الاول
انى اخطب على 25 و الجواز على 27 سنة إن شاء الله

وربنا يسهل و ييسر الحال لكل الشباب و يجدو الوظيفة المناسبة لهم التى تقدر تفتح بيت و تكوين اسرة

**zakiali** · 09-10-2008 11:59 AM

المشاركة الأصلية كتبت بواسطة dr.amr

طيب انا عيز اسأل حضرتك سؤال
واحد زيي في رابعه طب عين شمس
قدامي 4 سنين لسه في الكليه
وسنه جيش
يعني خمس سنين
يبقي المجموع 26 سنه علي اعتبار اني 21 سنه
طبعا اكيد عارف ان انا بتخرج من طب ممارس عام = صفر كبير
هشتغل تكليف في اخر الدنيا بمرتب حقير لمدة سنه مع ناس غريبه= 27 سنه
وعلشان اقدر اشتغل عايز كمان 3 او 4 سنين علشان اخد الماجيستير= 31 سنه
وبعد كده اكون نفسي واشتغل وبعد كده اتجوز اي حاجه والسلام يعني مش قبل 34 -35 سنه
يعني في حوالي 10 -15 سنه علي الجواز
تقدر تنصحني بحاجه اعملها لتقليل الفتره ده
انا مش شايفلها مخرج غير اني محطش موضوع الجواز في دماغي
انا ساعات بييجي عليا وقت افكر جديا ان مااتجوزش لأني معنديش وقت
وده بيسببلي حاله نفسيه سيئه وضيق شديد
مش عارف اعمل ايه لأني فعلا مضايق جدا وحاسس ان انا هندم علي كده كتير اوي
بس هعمل ايه ما باليد حيله
حسبي الله ونعم الوكيل
تخيل سيادتك علشان ادرس طب انا ممكن اقعد في الشارع من 8 صباحا الي 1 بالليل

والله يابني انت جيت علي الجرح ... انا زميلك الدكتور عبدالرحمن انا طبيب بشري نائب أطفال اتخرجت سنه 2002 ومن ساعتها لحد دلوقتي وانا متلطم في مصر ورا الطب ده بقالي 7 سنين اهو اول ما اتخرجت تكليفي كان في اسوان !! أيوه في اخر بلاد المسلمين سلمت امري لله ورحت استلمت وكان ده في شهر 7 يعني في عز الولعه وكان المرتب 240 جنيه !! ايوه ميجيبوش عيش وحلاوه وطبعا الوالد كان بيساعدني لحد ما دخلت الجيش وبرده كان بيصرف عليا يعني شحط عنده 26 سنه وكنت لسه باخد المصروف من والدي وبعد كده نقلت تكليفي وانا في الجيش ورحت الجيزه قعدت فيها سنه و 3 شهور برده كان المرتب حقير ومكنش في وقت اشتغل شغل خاص لأني كنت بذاكر الماجستير سعتها ومن سنه 2005 لحد دلوقتي وانا بشتغل في الماجستير فرست علي مرتين وسكند علي مرتين ودلوقتي بحضر في الرساله خلاص فاضلي 6 شهور وطبعا الشغل الخاص مش حاطط دماغي فيه اوي يعني عشان الماستر لآن لازم اتفرغ للدراسه والفلوس اللي انا حوشتها كلها جبت بيها عربيه . ودلوقتي بقضي فترة النيابه في بني سويف بقالي سنتين وفاضلي كمان سنتين. لازم تشيل فكره الجواز دي من دماغك دلوقتي عشان تقدر تعيش ومعلش هي دي ضريبه الدكاتره .. بس إن شاء الله هتعدي كل اللي في سنك في سنه واحده بس بره مصر طبعا . لأن البلد دي مش بتقدر مهنة الطب .. في البلاد الأفريقيه الطيبيب الشاب بياخد من الف الي الفين دولار . احنا اقل دوله بتدي مرتبات في العالم للأطباء وبيطالبونا اننا نحضر شفتات ونسهر طول الليل ونستحمل رزاله العيانين وقلة أدبهم ........... حاليا انا عندي 30 سنه بشتغل في احسن مستشفي اطفال في مصر غير المستشفي الحكومي .. دخلي الحمد لله تمام .. عندي شقه تمليك في مكان متميز وعربيه جديده بس معنديش وقت اجوز الصراحه . شغلي ودراستي واخدين كل وقتي والجواز في الحاله دي يبقي حرام شرعا متهيألي مش بكون في البيت غير نص يوم بس . عموما يا زميلي الطريق صعب بالنسبه لينا سيبك من اللي بيقول انا اجوزت وانا عندي 18 سنه واللي اجوز وهو في اللفه وكده يعني متقارنش نفسك بحد لأنك غير أي حد انت انسان متميز مستواك العقلي فوق الجميع محدش يقدر يعمل اللي انت بتعمله أبدا لأنك انسان موهوب . مترميش نفسك في اي جوازه وخلاص او اي بنت تترمي قدامك ترضي بيها . اصبر ان الله مع الصابرين واستعن بالله ولا تعجز .

مشاهدة نتائج الإستطلاع: إتجوزت وإنت عندك كام سنة؟

الموضوع: إتجوزت وإنت عندك كام سنة؟؟؟؟؟

LinkBack

أدوات الموضوع

عرض

-

-

-

-

المواضيع المتشابهه

محمد الطويل....كل سنة وإنت طيب

طنانى باشا .................... كل سنة وإنت طيب

عيد ميلادي الـ 30..كل سنة وإنت طيب يا أبو العيال

علشان تركن الفيليشيا بتاعتك فى الممنوع وإنت مطمن

كل سنة وإنت طيب يا حبيب قلبي، إن شاء الله.

الكلمات الدلالية لهذا الموضوع

المفضلات

المفضلات

ضوابط المشاركة