تقريـر صيـانة ال 15000 للأوبتـرا بالمـركز الرئيـسى بالهـرم

**Hosam_Optrawy** · 19-08-2009 12:45 AM

السلام عليكم ورحمة الله وبركاته

تم بحمد الله اليوم عمل صيانة ال 15 الف للأوبترا اوتوماتيك بالفرع الرئيسى بالهرم

كنت حاجز من اسبوع بالتليفون وكان ميعادى النهارده الساعه 1.30

رحت فى الميعاد والمهندس استلم منى العربيه

وقلت له صيانة 15000 + تغيير زيت موبيل 1 عشر الاف وفلتر

وقاللى ان العربيه هاتخلص حوالى الساعه 4

وعمل أمر شغل وادانى تكت عشان اشرب مشروب مجانى فى الاستراحه

وموضوع الاستراحه دا هاقولكم عليه بس بعد تفاصيل الصيانه

المهم استنيت فى الاستراحه وفعلا العربيه خلصت الساعه 4

وعلى ما دفعت ومشيت كانت حوالى الساعه 4 ونص

يعنى الموضوع خد حوالى 3 ساعات

ودى اول مره اقعد فيها المده دى

فى الصيانتين اللى فاتوا ال 5 وال 10 قعدت ساعه ونص مش أكتر

المهم تفاصيل الفاتوره

184 ( تكاليف صيانة ال 15000 )

33.75 ( فلتر زيت )

4.25 ( مواد ومستلزمات مستخدمه )

22.20 ( 10% ضريبه مبيعات )

235 ( زيت موبيل 10000 )

الاجمالى 479.25

دا أكبر مبلغ دفعته فى الصيانه من ساعة ما جبت العربيه

واللى مغليها المصنعية ( 184 جنيه )

بس الحمد لله انا راضى عن الصيانة والخدمه بشكل عام

وغسلوا الموتور وحطولى أفيز على الطاسات مع ان مكنش عليهم :)

ـــــــــــــــــــــــــ ــــ

نيجى بقى لموضوع الكافيتيريا أو الاستراحه عشان فى اعضاء اتكلموا عليه

الاستراحه بقى جواها كافيه PASQUA ودا كافيه معروف بيقدم مشروبات ووجبات خفيفه

وطبعا لو طلبت حاجه هتبقى بسعر عالى عن المحلات العاديه

وانا مش شايف ان دا فيه اى شئ غريب او عيب

لأن أولا انت مش مجبر تطلب حاجه وانت قاعد

ثانيا المهندس بيديك تكت تشرب بيه مشروب مجانى ( شاى - نسكافيه - بيبسى - عصير )

عايز انت تطلب حاجه زياده يبقى تدفع ودا طبيعى جدا

ـــــــــــــــــــــــــ ـــ

أخر حاجه عايز اتكلم عليها هى الكروز

كان فى هناك اتنين واحده ملاكى قاهره والتانيه ملاكى بورسعيد

وواضح انهم مش جايين يعملوا صيانه تقريبا عندهم مشكله

انا كنت واقف اتفرج من بعيد وشفت المهندس بيركب العربيتين ويجربهم

كان بيكبس بنزين ويطلع جامد

ملاحظتى كانت ان الموتور صوته عالى والطلعه مش قويه

تحس انها تقيله

دا كان انطباعى لما شوفته وهو بيجرب العربيتين

وبالصدفه وانا معدى من جنب الكروز الملاكى قاهره

سمعت صاحبها بيقول للمهندس دى بتعمل 120 كم فى الصفيحه !!!

طبعا انا ذهلت من الرقم اللى عمرى ماسمعته قبل كدا

والمهندس استلم منه العربيه وقال له هيشوف فيها ايه

وان دا ممكن يبقى بسبب ان العربيه لسه فى الأول وبتلين

وانه لازم ميعديش 80 وكدا

انا ياجماعه مش قصدى انى اسوأ سمعة العربيه

انا شفت حاجه حصلت قدامى وقلت احكيلكم

والله على ما أقول شهيد

**Hosam_Optrawy** · 19-08-2009 01:21 AM

المشاركة الأصلية كتبت بواسطة totaman

الف مبروك يا حسام باشا وعقبال
صيانة المليــــــــــــــــــون
انا كمان خلاص قربت على صيانة 15000
طيب مسالتش على موضوع التزيق اللى فى الدركسيون ده ايه ؟؟؟
وشكرا على التفاصيل الجميلة
معلش سؤال كمان
انا لو حبيت اغير زيت موبيل 1
ايه البديل ولا هوة يعتبر احسن حاجة ؟؟؟؟
يا ريت تفيدنى فى الموضوع ده

الله يبارك فيك

الصراحه انا مسألتش على موضوع التزييق

لان الصوت مبيظهرش معايا كتير ومش مسببلى مشكله

ومعتقدش كمان ان عندهم حل للموضوع ده

واعتقد ان زى ما نادر حلل الموضوع ان دا شئ طبيعى

بالنسبه للزيت المهندس سألنى عايز تغير زيت ايه

قلت له موبيل

والصراحه مسألتوش ايه انواع الزيوت التانيه

وانا الصراحه متعود على موبيل من زمان وهو كويس

لكن ممكن يبقى فيه أفضل منه وانا معرفش

أصل انا مجربتش غيره

**momenhamdy** · 20-08-2009 12:50 PM

الف مبرووووووووووووك يا حسام باشا علي الصيانه

وربنا يديك خيرها و يكفيك شرها

بالنسبه للكروز معزم العربيات في الدفعات الاولي بيكون لسه فيها حاجات مش مفهومه اوي يعني و ممكن يكون سوء لطريقة القياده اثناء التلين

ولكن انا عندي ليك سؤال حضرتك بتقول ان كان في عربيتين العربيه الي هي ملاكي بورسعيد كان تقريباً فيها نفس المشكله و لا كاتنت بعيده عنك و حضرتك ملاحظتش

تحياتي حسام باشا و رمضان كريم

**Hosam_Optrawy** · 20-08-2009 06:11 PM

المشاركة الأصلية كتبت بواسطة dew drops

طيب هو انت اللى طلبت غسل الموتور ولا هما اللى غسلوه لوحدهم ولو انا مش عايز اغير زيت فى مشكلة ؟

لأ انا مطلبتش

غسيل الموتور شئ اساسى فى كل صيانه

ولو مش عايز تغير زيت مفيش مشكله

قول له صيانه بدون تغيير زيت وفلتر

وياريت تبقى تشارك معانا على طول ياباشا

لان فى اعضاء كتير عندها اسئله واستفسارات عن السبارك ومحدش بيرد :)

**Hosam_Optrawy** · 20-08-2009 06:18 PM

المشاركة الأصلية كتبت بواسطة momenhamdy

الف مبرووووووووووووك يا حسام باشا علي الصيانه

وربنا يديك خيرها و يكفيك شرها

بالنسبه للكروز معزم العربيات في الدفعات الاولي بيكون لسه فيها حاجات مش مفهومه اوي يعني و ممكن يكون سوء لطريقة القياده اثناء التلين

ولكن انا عندي ليك سؤال حضرتك بتقول ان كان في عربيتين العربيه الي هي ملاكي بورسعيد كان تقريباً فيها نفس المشكله و لا كاتنت بعيده عنك و حضرتك ملاحظتش

تحياتي حسام باشا و رمضان كريم

مؤمن باشا ازيك ؟

الله يبارك فيك ويباركلك

بالنسبه للكروز الملاكى بورسعيد انا معرفش كان ايه مشكلتها

لكن المهندس ركبها مع صاحبها وكان بيجربها زى ماجرب الملاكى قاهره

كان بيكبس ويطلع بيها وطلعتها كانت بطيئه

لكن بصراحه مسمعتش صاحبها بيشتكى من ايه

وكل سنه وانت طيب رمضان كريم :)

**M.Osman** · 12-05-2010 04:04 PM

ألف مبروك على الصيانة يا حسام باشا... و عقبال ال999,999 كم

**Hosam_Optrawy** · 12-05-2010 06:11 PM

المشاركة الأصلية كتبت بواسطة speed828

الف مبروك للصيانة
بس بعد اذنك
المكيف عامل ايه في الصيف ده
بعد ال15000 كيلو
وعلبة ادريكسيون
واخيرا
ممكن نكان الصيانة فين في شارع الهرم بالظبط ومن الساعة كام لكام

والف مبروك مرة تانية

الله يبارك فيك

التكييف قوى وتبريده ممتاز

علبة الدركسيون لحد دلوقتى الحمد لله سليمه مفيهاش مشاكل

مكان الصيانه مش فى الهرم دا فى طريق مصر اسكندريه فى الكيلو 4.5 بعد فندق الواحه

المشاركة الأصلية كتبت بواسطة m.osman

ألف مبروك على الصيانة يا حسام باشا... و عقبال ال999,999 كم

الله يبارك فيك ياباشا

-

الموضوع: تقريـر صيـانة ال 15000 للأوبتـرا بالمـركز الرئيـسى بالهـرم

LinkBack

أدوات الموضوع

عرض

تقريـر صيـانة ال 15000 للأوبتـرا بالمـركز الرئيـسى بالهـرم - انشر الموضوع فى :

-

-

-

-

-

المواضيع المتشابهه

فحص السيراتو sx بعد 15000 كم ؟؟؟

صيانال 15000 ل m11

صيانة 15000

تقريـر : ما تريـد معرفتـه عن الرينـو سانديـرو

صيانة 15000 كم

الكلمات الدلالية لهذا الموضوع

المفضلات

المفضلات

ضوابط المشاركة