الموضوع: اتخنقت دلوقتى و انا جاى و ندمان انه حصل فى رمضان

المشاركة الأصلية كتبت بواسطة tananybasha

الموضوع ده فتح عينى على كذا حاجة بس الأول اشكر كل اللى شاركوا فيه بدون تحيز لأحد
1. مشكله اللى حصل معايا انى بطبعى هادى جداً فى السواقة بس لما توصل لسب دين و شتيمه يبقى اللى يحصل يحصل
2. انا فعلاً غلطت لما كنت هاسحب المسدس و زى ما قلت انا متطلعطوش من5 سنين
3. لو كانوا رجاله او عيال او شباب كان زمان عربيتهم سليمه و هما مشرفين فى قسم الحالات الخاصة بالتطبقين و الهرم ( اقرب مستشفيات لمكان الواقعه ) بس عشان بنات طلعت غلبى فى العربية
4. باكررها لو الموقف اتكرر معايا تانى هاكرر اللى عملته بس بدون اللجوء للسلاح الا لو اترفع عليا سلاح و ده يبقى وضع تانى ( دفاع عن النفس )
5. اعيد شكرى لكل من تخيل نفسه فى موقفى و لم يأخذ ان الموضوع عباره عن بلطجة منى و خلاص و مبروك الفضيه للعضوه ( نور القمر ) و يا محمد يا اسامه تعتقد ان هاجى فى بلدى و وسط اهلى بسلاح ما السلاح هناك كتير ابقى اخد حته من اى حد منهم و الا تبقى عيبه
الف شكر ليكم جميعاً مع العلم بأن الدين حرم الأعتداء فى الأشهر الحرم الا اذا اعتدى على المسلمين و وجب على المسلمين حتى و ان كانوا فى الأشهر الحرام رد الأعتداء و لو الساده اخدوه انه يعتبر اعتداء على الدين مش على شخصى عن طريق سب الدين اللى هو كفر صريح ( فى اعتقادى الشخصى ) مش هيلوموا عليا و فى مواقف مينفعش فيها الهدوء من اى نوع و الا يعتبر خنوع و ضعف و قبول بقلة الأدب

انا فعلا كنت متضايق منك في اول الكلام
لكن لما لقيتك في مناقشة وبتقبل بقية الاراء انبسطت فعلا
انا حاسس بيك انت لقيت نفسك في الشارع قريب من منطقتك ولقيت حثالة بيشتموك
بغض النظر عن ايه اللي جابك جنبهم ثاني بعد ما كانوا عدوك


انا عايز اقولك حاجه ونفكر بيها مع بعض

هل انت زعلان عشان هما بنات وعملوا كده
بمعنى هل سر زعلك انهم كانوا بيعملوا كده عشان هما بنات ولو كانوا ولاد كنت مثلا حتقول ياللا عالم هبلة وتطنش
اصل انا لاحظت في ردود مش قليلة ان الناس بتعلق على انهم بنات مش محترمة
رغم اني بشوف كل يوم شباب في العربيات بتعمل كده كل يوم ادام عربيتي وبيكونوا على وشك انهم يحكوها ومعرفش ازاي ربنا بيسترها وانا الي اتعلمت امسك اعصابي



طيب معلهش لو كانوا اولاد وزي انت ما قلت حيكونوا في العناية المركزة
طب ليه منقولش انه انت بعد الشر اللي كنت حتكون في المستشفى
لو كانوا ولدين وواحد منهم عرف يسبقك وضربك مثلا على راسك او اي منطقة حساسة في جسمك ادت إلى فقدانك الوعي مثلا

اصل انا شفت في الحوادث ناس كثير تكون رايحه تتخانق الادرينالين بيصورلك انك اسد
وبعدين تفاجأ ان قوة الادرينالين بتروح بسرعة عشان بتشتغل بسرعة
نلاقي داخل علينا واحد عنده كسو ر مضاعفة في جسمه كله ويقول لنا انا مش عارف ازاي انضربت
لاحظ ان عدد العضلات والالياف العضلية واحدة عند كل الناس فالموضوع نسبي وقوتك قريبة جدا لقوتي....

الحاجه الثانية
البنات دول زي ما حضرتك قولت كانوا بيسبوا الدين, ودي كفاية عندي انهم يستاهلوا الدبح
انا معاك لان والدي وانا صغير سالته لما سمعت حد لاول مرة في حياتي بيشتم الدين قالي هو كده يستاهل الدبح
, المهم لما كبرت وعرفت جارنا ده وبقيت بقيس له الضغط لقيته بيبدأ يصلي ويعرف ربنا ومش حاطط في دماغه انه مش عشر سنين سب الدين وكنت بفكر هل الراجل ده لو انا دبحته حيبقى صح .

انا قصدي اقولك واعتقد انك حتفهمني لانك مصري زيي , هل اللي بيسب الدين في مصر كافر مثلا يستحق ان تقتله؟
هل وهو في لحظة الشتم بيكون حاطط في دماغه انه بيشتم الدين ولا بيشتم حضرتك.
بمعنى لو انت مثلا اخدته على جنب وقلت له هو انت كده بقيت كافر مثلا ومتصليش اكيد حيبص لك باستغراب دين ايه اللي انا كنت بشتمه؟؟؟

يبقى الغلط على الناس اللي عايزه قطع لسانتها اللي خلت الدين يبقى زي اللبانة ويتحط في الشتايم ومبتبقاش عارفه هي بتقول ايه؟

وربنا ينتقم من اللي عمال بيشتم الشتايم دي ويعلمها للعيال الصيع في الشارع.

انا عن نفسي لو اتشتمت في الشارع بالدين حقف في نص الشارع واصرخ واقوله :
الدين اللي انت شتمته ده حيشهد عليك يوم القيامة وانا حشهد عليك والناس دي كلها حتشهد عليك وحسيبه وامشي.
انا معرفش اذا كان هو ده الرد الديني المناسب ولا لأ بس اعتقد اني حعمل كده..

الحاجه الثالثة واعذرني اصل انا دكتور اعصاب
حضرتك ساكن في خاتم المرسلين يعني في شارع موازي لشارع الهرم وفيصل


من طريقة حكاية حضرتك عن سواقة البنات وطريقة كلامهم والهيستيريا الي شتموا بيها وسبوا الدين في وسط الشارع انهم ببساطة زي مانت كمان عارف : بنات ...... وكمان شاربه
شاربه ايه من طريقتهم في السواقة وتخصصي اقدر اقولك انه يا خمرة يا بانجو على اساس ان الحركة بتاعتهم كانت بتحك في العربيات.
يعني هما سكرانين طينة حتى لو مش باين عليهم لان حالة غياب المخ في السكران مش بتكون زي ما التليفزيون بيجيبها دا ممكن تلاقي اللي بيسوق جنبك سكران
بمعنى اصح هما مش دريانين باللي هما بيقولوه وممكن لما يفوقوا يفاجأوا ان الازاز مكسور.

مع العلم ان ياما حصل ان مريض سكر ارتفع عنده السكر وبدأ يخرف ولما ركب الاتوبيس افتكروه سكران وهاتك يا ضرب
بس طبعا حنستبعد ده في حالة حضرتك عشان هما اتنين ومفيش اتنين السكر باظ عندهم في نفس الوقت...


على العموم الحمد لله اللي جت على اد كده
واقعد حضرتك مع نفسك وعشان خاطري بلاش حكاية الموضوع ده لو اتكرر حعمل كده ثاني
عشان ربنا يسترها عليك المرة الجاية

ولك تحياتي واحترامي

على فكرة انت للاسف موقفك صح 100% وللاسف لان الاشكال دى من البنات ماينفعش معاهم غير العنف لان احنا لو بصينا على ردود فعل بنات الناس فى اى حادث كبيرها تنزل تقولها كلمتين لو عرفت وتكلم ابوها على التليفون وخلاص احنا بطبيعتنا بنتجنب العراك شوية انما اللى تنزل تشتم راجل بالافاظ لايتجرا عليها الا راجل (اسفة فى التعبير صايع )
الى تعمل كده واحدة من الاتنين واحدة مسنودة اوى (موش متربية ) او واحد ة موش محترمة والاشكال فى الستات ماينفعش راجل يقف يرد عليا بجد ممكن تبهدلة بقلة ادبها تعرف لو راجل كان التعامل معاها اسهل وللاسف دول موش بيخافو الا لما يلاقو اللى قدامهم يعمل حاجة مايتوقوهاش
وعلى فكرة انا مقتنعة بموقفك اكتر لان واضح من كلامك انهم ماعملوش حاجة كرد فعل يعنى لو ليهم حق وانت غلطان ماكنوش سابوك اساسا

الحاجة الوحيدة اللى شايفة انك غلطان فيها انك تشيل سلاح لان ده خطير جدا