استشارة في النضارة ؟؟؟

**MRBEBO** · 23-08-2009 05:53 AM

كل سنة والجميع بصحة وسعادة ان شاء الله

انا بلبس نضارة طبية علطول ... وعندي مشكلة

المشكلة ان النضارة بتعمل علامات مكان المخدات بتاعتها في وشي

طبعا ده نتيجة الاستخدام لمدة طويلة + الشمس + العرق ... الخ

المشكلة ان العلامات دي ابتدت تبقى جروح وخايف تسيب اثر في وشي

مع اني عملت العدسات بلاستيك علشان وزن النضارة يبقى خفيف وميعلمش ومفيش فايدة

على فكرة انا رحت لمحل نضارات من فترة كبيرة علشان قررت اني اعمل نضارة الشامبر بتاعها بلاستيك

علشان طبعا البلاستيك مفهاش مخدات زي المعدن

بس لقيت ان كل الموديلات الموجودة من البلاستيك حاجات انتيكة ومش شبابية خالص ( انا على فكرة 28 سنة) يعني موديلات لفوق 60

فياريت اقتراحتك وبلاش موضوع العدسات اللاصقة لاني مش مستريحله نفسيا

وياريت لو في ماركة كويسة ومش غالية وتنفع للاستخدام اليومي تقولولي عليها

**A.Saad** · 23-08-2009 02:26 PM

انت ممكن تغير ظبط المخدات

**Dr.SherifMansy** · 24-08-2009 02:08 PM

المشكلة بسيطة و كلها تتلخص فى مسألة اختيار الشنبر

اولا وزن العدسات مش هو السبب الوحيد لأرتفاع وزن النظارة ، ما تنساش وزن الشنبر نفسه ، فلما تعمل العدسات بلاستيك ده مش كفاية

مطلوب منك لفة محترمة على محلات النظارات لأختيار نوع مناسب ، و على فكرة وضع المخدات مهم لأن ممكن تكون زانقها قوى على مناخيرك فبتعمل المشكلة دى ، بلاش تنقى شنبر معدن و فكر فى البلاستيك زى ما انت فكرت ، و على فكرة فيه منها شبابى مش كلها بتاعة بابا جدو ، انت محتاج تدور شوية

ثانيا لو عايز شنبر معدن دور على حاجة تكون خفيفة ممكن يكون شنبر شكله خفيف لكن دراعاته تقيلة مثلا فبلاش منه

ثالثا فيه مخدات اشكال و ألوان ، نصيحتى ابعد عن الصغيرة و فكر فى المخدات الكبيرة لأنها بتوزع وزن النظارة على مساحة أكبر و بالتالى الأثر الناتج عنها اقل ، و فيه مخدات بتكون بشكل نصف دائرة يعنى موصلة المخدة اليمين بالمخدة الشمال من فوق و دى بتكون كويسة برضه انها بتوزع الوزن من على جوانب الأنف الى الجوانب و القمة كلها سوا

لو ماعندكش استيجماتيزم فكر فى الشنابر الفريمليس Frameless فيه منها انواع تقريبا مالهاش وزن يذكر و لكن ماتنفعش لو فيه استيجماتيزم

الموضوع محتاج شوية تدوير و تحت امرك فى اى استفسار
و فى انتظار ردك
و تحياتى

**maka** · 25-08-2009 03:23 AM

لو ماعندكش استيجماتيزم فكر فى الشنابر الفريمليس frameless فيه منها انواع تقريبا مالهاش وزن يذكر و لكن ماتنفعش لو فيه استيجماتيزم

ممكن اعرف مينفعش ليه

**shery103** · 25-08-2009 05:03 AM

المشاركة الأصلية كتبت بواسطة maka

ممكن اعرف مينفعش ليه

+11111111111111111

انا برضو عايزة اعرف مينفعش ليه

انا بلبس نضارة من حوالى 3 سنين ، بس مش على طول ، لما بكون مثلا مركزة فى حاجة بعيدة ، و عندى استيجماتيزم فى عين واحدة

، و النضارة بتاعتى frameless ، فكنت عايزة اعرف ليه مينفعش !!

**Dr.SherifMansy** · 25-08-2009 08:55 PM

السبب بسيط جدا
الأستيجماتيزم يعنى العدسة ليها قوة و زاوية معينة
و الشنابر الفريمليس بتكون سهل انها تتعوج (twist)و بالتالى زاوية العدسة تبقى اتغيرت فتبقى النظارة بتاعة واحد تانى
علشان كده لازم نظارة تمنع الحكاية دى non-twistable
و تحياتى

**Dr.SherifMansy** · 27-08-2009 03:41 PM

المشاركة الأصلية كتبت بواسطة ams

شكرا يا دكتور شريف
هو انا عندى سؤال اعزك الله
هو انا المفروض اغير النظارة او اكشف كشف جديد ليها كل قد ايه ؟

الحقيقة دى نقطة مهمة و دايما فيها لبس و سوء فهم

المفروض اى حد بيبلبس نظارة يكشف عليها سنويا مرة واحدة ، و لكن ازاى ؟؟
مش معنى كده انه ياخد كشف جديد كل سنة ... لأ

.. كده غلط
المفروض انه يكشف على لوحة العلامات بالنظارة (اللى هو مفروض انه لابسها على طول ما بيقلعهاش) و نشوف كل عين على حدة ثم الأثنين مع بعض
لو كل عين 6/6 (مسموح تغلط فى علامة او اثنين ، مش مشكلة) و الأثنين معا 6/6 و مافيش ضيق أو عدم راحة من النظارة يبقى كله تمام و نستنى السنة اللى بعدها ، و لو حاجة من دول غلط يبقى ناخد كشف جديد أحسن

أما بالنسبة للكشف الجديد فالمفروض انى اعمله كل فترة و دى بتختلف أساسا حسب المرحلة العمرية ، يعنى مثلا :
من سن 4 - 6 سنوات باعمل كشف جديد كل 6 شهور
من سن 7 - 16 سنة يبقى كل سنة كشف جديد
من سن 17 - 25 يبقى الكشف كل سنتين
فوق 25 سنة يبقى كل 3 سنين ، و لو مش متضايق منها و شايف كويس ما فيش داعى للتغيير

طبعا فيه عوامل تانية ممكن تغير الجدول ده و لكن دى راجعة للطبيب حسب حالة كل مريض
و لكن عموما هى دى القواعد اللى المفروض ان المريض يتبعها

و تحياتى

-

الموضوع: استشارة في النضارة ؟؟؟

LinkBack

أدوات الموضوع

عرض

-

-

-

-

-

-

المواضيع المتشابهه

استشارة

عاوز اعرف النضارة دى اوريجينال ولا كوبى؟؟؟

استشارة

عدد 2 استشارة

استشارة

الكلمات الدلالية لهذا الموضوع

المفضلات

المفضلات

ضوابط المشاركة