للمحترفين فقط كورسا 94 ولا جولف 2

**BASHAR** · 27-10-2007 04:47 PM

عايز حد متخصص من الساده الاعضاء يفيدنا كورسا 94 ولا جولف 2

**fahd_628** · 27-10-2007 04:53 PM

انا رأى جولف 2

موتور اقوى و ممكن تسقت الموتور ال 1800 بسهولة فى بورسعيد و بتبقى صاااااااروخ

ثبات اعلى من الكورسا

شكل احلى فى رأى

اوسع من الكورسا

بس طبعا الكورسا موديل احدث

بس رأى انك تدور على جولف 2حالتها نضيفة و فابريكة دواخل و خلى واحد يكشفلك عليها كويس و يكون ثقة لحسن كل الشباب مبهدلينها

و ربنا يوفقك

**Abdallah** · 27-10-2007 05:32 PM

كورسا موديل 94 وجولف 2 احدث موديل فيها 90
الكورسا عربية كويسة بالنسبة لشاب او اسرة صغيرة ولكن قطع غيارها مكلفة شوية ومواتيرها معقدة شوية وانصحك لو هتجيبها يبقى تجيب موتور 1200 لأن مواتير الكورسا ال 1000 و ال 1400 مليانة حساسات واعطالها رخمة شويتين ولكن فى المقابل هتاخد صالون حديث وتابلوه حديث وتكنولوجيا احدث.

جولف 2 موديل 90 عربية كويسة بالنسبة لشاب او اسرة صغيرة قطع غيارها فى المتوسط ولكن معمرة وصاج محترم يعيبها قدم الشكل وقدم الصالون والتابلوه وقدم التكنولوجيا ولكن فى المقابل هتاخد ثبات عالى على السرعات وهتاخد عربية مفهومة عند الصنايعية وهنتاخد عربية حمالة قسية ومواتير طويلة العمر.

انا اختار الجولف 2 .

**ahmed1981** · 27-10-2007 06:04 PM

المشاركة الأصلية كتبت بواسطة Abdallah

وجولف 2 احدث موديل فيها 90

جولف 2 أحدث موديل فيها 1992

**sab3aawy** · 27-10-2007 06:58 PM

لو بنفس الحالة يبقى الجولف 2

الجولف 2 تنتمى الى تكنولوجيا فولكس فاجن، وهى تكنولوجيا تقوم على الغبداع والجودة قبل العامل الإقتصادى، اما تكنولوجيا جنرال موتورو فتقوم بالاساس على العامل الإقتصادى قبل الجودة

لذلك ، وحتى لو كانت الجولف من جيل اقدم فانا افضلها عن الكورسا

**ahmedsrs** · 27-10-2007 07:01 PM

الجولف احسن بكتير

**Karim_Monir** · 27-10-2007 07:59 PM

انا من عشاق الجولف
اقل موتور فيها 1300 زي الصاروخ جنب ال 1000 او 1200 بتاع الكورسا
الاوبل الميكانكي بتاعا فاكر نفسة دكتور هونا وقطع غيارا غالية فعلا جديد واستيراد
خليك في جولف وبالذات لو 1600 مع طقم 15 جنوط وماتزودش عشان العفشة وشوية بوية ميتالك نضيفة بتبقي عروسة
بحس انها العربية التي لا تشيخ

**hazem_khidr** · 27-10-2007 09:38 PM

بحس انها العربية التي لا تشيخ

كريم باشا جاب الخلاصه
في موديلات كده بيبقي تصميمها فلته و مهما بيقدم بيها العمر بتلاقي ان شكلها لسه جميل و من امثال الموديلات دي الجولف و البي ام الفئه التالته موديلات الجيل التالت .
الي جانب قطع الغيار ارخص و متوفره و عربيه ماسكه نفسها بس لو حالتها نضيفه