الموضوع: عاجل جدا يا سكوداوية/ إستشارة سريعة من الأوكتافياوية بخصوص ميكانيكي في الإسكندرية

بص يا ريس احسن حاجه انك تروح التوكيل و متخفش من الاسعار
لانك هتاخد قطعة الغيار اصلى و عليها ضمان و الكلام ده عن تجربه
وكمان اللى بيفك و يركب عارف هوا بيعمل ايه يعنى مش هيصلح حاجه و يبوظلك 20 حاجه جمبها
وانا بتعامل مع نور الدين الشريف اللى على الصحراوى امام منصور شيفروليه وبصراحه ناس محترمه جدا و فاهمه جدا و لما هتبقا زبون عندهم بيتعملك نسبة خصم على المصنعيات و قطع الغيار كمان
خليك فى المضمون و ما تغامرش بعربيتك لان انا اتفزلكت مره وكنت عايز اغير اسطوانه و دسك و رلمان بلى
فسألت فى التوكيل قالى 1250 جنيه تقريبا
فسألت بره جبتهم ب 650 جنيه وفرحت جدا انى و فرت الفرق ده
بس رحت لميكانيكى معرفه علشان يركب
اولا فك كل حاجه فى العربيه علشان يعرف يطلع القديم و يحط الجديد و ضيعلى شوية مسامير و فبرات و كسر شوية حاجات
والاهم انه نسى يربط كابل الارضى اللى راكب فى الموتور فبوظ الدينامو و البطاريه و دينامو جديد بدل اللى باظ وعطلنى 3 ايام و دفعت اد اللى كنت هدفعه فى التوكيل مرتين وبس

ألف شكر يا باشا علي الرد وممكن آخذ ده في الإعتبار طالما إن فيه ناس جربت و بتأكد إنها تجربة كويسة.

المهم إني واجهت رحلة الشقاء والعذاب بس قدر الله وما شاء فعل. أنا كنت بأتعامل مع ميكانيكي من سنة 2000 في العربية 128 و كان بيصلح عربيات ثانية بس لما الواحد يكون هو الزبون إكتشفت إنها بتفرق. يعني بطريقة أكثر وضوحا قام بتغيير فلتر زيت وفلتر هواء وزيت للعربية وسير تقسيمة وبوجيهات وفلتر بنزين و بعدين إكتشفت إن العربية مخنوقة في المشي زي ما وضحت. و بعدين حمايا شار عليا إني أروح للمهندس ماجد ولقيت عنده عربيات سكودا كثير والكارت بتاعه بيقول مركز سكودا متخصص. ساعتها إكتشفت إن الميكانيكي بتاعي ما ينفعش يشتغل في العربية بعد كده لأنه ساب فلتر البنزين معلق من غير ما يربطه في الأفيز بتاعه أو يبيت الخراطيم في مكانها. وبعدين حط العربية علي الكمبيوتر وإستخدم برنامج كشف عن عيب في حساس الكامة. طيب يا عم إيه الحل، قال تجيب حساس كامه إستعمال. إتصلت بتاجر إستعمال تعاملت معه قال لي ده لازم يجي جديد لأن ما فيش حد حيبوظ موتور علشان يديهولك. كلامه معقول وإداني رقم تليفون تاجر قطع غيار أصلية. لما قلت للمهندس ماجد عليه قال إنه راجل محترم. قلت خلاص جديد جديد أحسن. الصبح لما روحت علشان أشتري الحساس (480 جنيه) خطر ببالي أسأل علي رأيه في المهندس ماجد وبعد ما شرحتله كل حاجة الراجل بكل ذوق نصحني بعدم أخذ قطعة الغيار وأروح لمحمود بتاع شارع النصر وكلمهولي. بعد الفطار روحت له و لقيت بسم الله ما شاء الله، أمم أمم وعربيات a5 و a4 و جولف وحاجات كده. المهم إن الراجل بتاع قطع الغيار كلمه تاني و بعد ما حكيت له قام الصنايعي قال لي إن المشكلة مش حتكون حساس ولكن المشكلة هي التقسيمة اللي كانت غلط خالص من الميكانيكي بتاعي. بعدين حطها علي الجهاز (جهاز التوكيل) و قبل ما يجرب إكتشفت الفرق لأن rpm بقي يعدي 5 وكان الأول بيوصل 4 بالعافية. وقفل العربية يابني و إتفضل يا أستاذ إنت دلوقتي حتركب أوكتافيا. طب والعيب بتاع الحساس، لا ده مش عيب حساس لأن التقسيمة الغلط علي وضعها كانت تدي نفس العيب. كام يا عم. 40 جنيه وإديت 20 جنيه للصنايعي وأول ما ركبت العربية وطلعت بيها إختلاف شاسع. بجد ربنا يباركله.

أنا حبيت بس أشارككم التجربة.

شوف ياعم انا عن تجربة احسن ميكانيكى اسكودا فى اسكندرية محمود فى اخر شارع النصر ولو محتاج كهربى فى زميلة فى نفس المكلن محمد الدش

المشاركة الأصلية كتبت بواسطة kogee

شوف ياعم انا عن تجربة احسن ميكانيكى اسكودا فى اسكندرية محمود فى اخر شارع النصر ولو محتاج كهربى فى زميلة فى نفس المكلن محمد الدش

ألف شكر يا باشا، ما هو ده إللي أنا روحت له. ربنا يسترها معانا ومنحاتاجش بس بجد محترف

المشاركة الأصلية كتبت بواسطة hanyreload

ممكن عنوان الميكانيكى ده بالتفصيل جزاكم الله كل خير.

عنوانه آخر شارع النصر أمام جرين بلازا (قبل السكة الحديد) علي اليمين. ولو سألت ألف من حيدلك. بس يا ريت تقولنا إيه الأخبار.
بالتوفيق يا باشا.

المشاركة الأصلية كتبت بواسطة احمدعبدالعزيز

من الاخر و مفيش غيره فى اسكندريه خبره وامانه وقطع الغيار عنده كلها المهندس / احمد هريسه متخصص فولكس وسكودا فى محطه الرمل امام شركة فيات ....


ونصيحه بلاش ماجد اللى فى صفر خلف دار المسنين



.

والله يا أبو حميد أنا أعرف ناس راحوا عند هريسة بس مشكلته إنه حراق نااااار. إنت عندك حق بالنسبة لماجد (الحمد لله نفدت منه). لو عندك تجربة مع هريسة ممكن تقولنا ونستفيد منك وجزاك الله كل خير.
كل سنة وإنت طيب يا باشا.