عـلـى أى اسـاس يقوم المواطن المصرى بشراء سيارته الجديدة ؟؟

السلام عليكم ..:

هطرح عليكم سؤال يا جماعة و يا ريت كل واحد يقول وجهة نظره فيه ..

على اى اساس يقوم المواطن المصرى بشراء سيارته الجديدة ؟؟

تفتكروا كل واحد لما بيشترى عربية جديدة بيشتريها بناء عن ايه , و الموضوع ده محصور فى المصريين فقط .

انا مش عايز التجارب الشخصية و لكن انا بتكلم بصفة عامة على كل الناس .

ليه لما اللانوس نزلت اكتسحت شوارع مصر ؟؟ ليه لما الفيرنا نزلت اكتسحت شوارع مصر كلها ؟؟ ليه كل سنة تلاقى عربية او اتنين المسيطرين على البلد كلها ؟

فين ثقافة المشترى او المستهلك ؟ هى الناس بتقلد بعض و خلاص و لا فعلا العربيات دى تستحق الثقة العمياء .

يعنى السنة دى اكتر عربيتين انتشروا فى الوقت الحالى هما النيو سيراتو و رينو لوجان .

بمجرد ما اعلن عن نزول اللوجان و انا شايف انها منتشرة انتشاااار رهيب و لسه لما الحاجزين يستلموا و هكذا ..

هما المصريين بيشتروا العربية على اساس ايه نفسي افهم .!

هل علشان شكلها حلو و الناس هتبص عليه طول الوقت ؟

و لا علشان العربية رخيصة فيتوكل على الله ؟

و لا علشان العربية حققت مبيعات عالية فالكل يشتريها و يطمئن على اعادة البيع و قطع الغيار ؟

و لا علشان ايه بالظبط ؟

ثقافة القطيع

للأسف فيه ناس كتير بتجيب العربية لمجرد انها منتشرة

و لا بيشوفوها من جوة و لا من برة و لا بيروحوا معرض يتفرجوا عليها و لا بيعرفوا مواصفاتها و لا اوبشناتها الا طشاش

لمجرد انهم يعرفوا تلاتة اربعة تانيين جابوها و عاجباهم


و عشان كده عربيات زي فولفو حالها مش ماشي

و عربيات زي فيرنا ماشية زي اللوز

سعر + انتشار (على اساس ان قطع الغيار هتبقى فى السوبر ماركت)+ شكل مقبول + تقليد اعمى وعلى السمع
زى ال 128, اللانوس, الاكسنت, النوبيرا, الفيرنا,اللانسر بوما

انا رأيى ان المستهلك المصرى ثقافتة محدودة فى السيارات ، عشان كدة الغالبية العظمى حوالى 75% بيختاروا على اساس :
1-تحديد السيارات الاكثر انتشارا فى حدود ميزانيتة
2- يسأل ميكانيكى او اى حد على العربيات اللى اختارها ( و غالبا اللى سألة برضة مش فاهم )
3- يشوف اية الشكل اللى عاجبة
4- و طبعا الكماليات اللى بتزغلل العين فى عربيات لا تساوى قيمتها ( مثل بعض انواع الصينى )

و النسبة الباقية هى اللى بتقارن و تحاول تعرف كل حاجة قبل ما تشترى و دول موجودين فى منتدى نايل موتورز:w6266d

كل عربية و ظروفها
الفرنا و اللانوس بسبب سعرهم , عربيات كويسة صحيح بيظهر فيهم عند بعض الناس عيوب تقفيل بس بالمقارنة للسعر مفيش غيرهم و كويسين , اكيد كل واحد فينا يعرف حد عنده لانوس او فرنا و بقالها كتير معاه و كويسة.
اللوجان انا شايف انها منتشرتش و لا هتنتشر لان التوكيل ضرب الناس على قفاها جامد لانه نزل العربية منغير جمرك و ضرب فرق الجمرك فى جيبه.
الكيا السيراتو الجديدة انتشرت علشان شكلها حلو اوى و سعرها مناسب جدا لفئات كتير و سعرها قليل اوى اساسا بالنسبة للامكانيات بتاعتها و شكلها رهيييب و عليها ضمان 5 سنين فتلاقى عليها حجز بالشهور.
الالنترا انتشرت علشان عربية كويسة و سعرها مناسب جدا و سمعتها كويسة و شكلها حلو و خصوصا اول ما نزلت مكنش فى عربية بالسعر دا بالحلاوة دى
اللانسر اعتمادية + قطع غيارها عند البقال زى ما بيقولو و رخيصة فى قطع الغيار + شكلها كويس من بره و جوه + سياسة القطيع عند البعض يقولك دى يابانى مش هيرجع تانى و الكورى كوخ وحش , الكوريين دول ناس كوخ وحشين و قصيرين اما اليابانيين ناس حلويين و فاهمين.

بس هى دى العربيات المنتشرة اوى فى مصر
غير كدا فى الفئات العالية مرسيدس و bmw علشان ملهمش منافس فى مصر لان لهم مصنع تجميع
فى الفئة فوق ال200 الف , مفيش غير الpassat عربية شكلها رهيييب و فيها امكانيات رهيبة اخر فئة.
بين 150-200 مفيش غير الجيتا و الاوكتافيا و ممكن نقول شوية سوناتا

العربيات اللى بتنزل مصر قليلة بسبب الضرايب و الجمارك + لازم تكون تحت ال1600cc فالمنافسة محسومة
مركة زى فولفو انا شايف العربيات شكلها وحش و سعرها مبالغ فى جدااا , زى مثلا S-40 ب 200 الف مانيوال , طيب ليه الهبل دا , فى احسن منها فى كل حاجة اساسا و ارخص كمان , دانا افضل السيراتو عليها بكتير جدا فى كل حاجة.


عموما علشان تبقى عارف الشكل عنصر مهم جدااااا عند المصريين ماعدا فى العربيات اللى اقل من 70 الف , يعنى ممكن واحد يشترى عربية علشان شكلها حلو بس بغض النظر عن الكفائة.

اكتر حاجة بتحكم موضوع شراء سيارة جديدة هو الامكانيات المادية
المتاحة وكل ما الامكانيات المادية قلت كل ما شريحة الناس كترت
يعنى ما ينفعش عربية بــ 150000 الف نقارن انتشارها بعربية
تمنها 60000 الف طبعا دى حتنتشر اكتر ودة راجع للحالة الاقتصادية
لمعظم افراد الشعب .
*وفى ناس بتشترى عربية بمجرد انها انتشرت ودة شيء طبيعى اومال
هى انتشرت ليه اكيد مش عشان وحشة ( سياسة القطيع )
*وفى ناس بتبحث وبتقرأ وبتروح تتفرج على عربيات وتعمل مقارنات
بينهم فى حدود الامكانيات المتاحة لدى المشترى وبتحدد هى عايزة ايه
من العربية وحتستخدمها فى ايه وتستخير ربنا وبتتوكل على الله بس
* بس لازم نتفق على حاجة ان مش معنى ان عربية سعرها رخيص
ومنتشرة يبقى دى سياسة قطيع وخلاص لا ممكن تكون عربية
كويسة وبتخدم شريحة كبيرة من المستهلكين وانتشارها وسعرها القليل
ما يعتبروش عيوب دى مزايا .
وكل سنه وانتم طيبين ورمضان كريم
وشكرا يا باشا على الموضوع الجرئ

السعر اولا
خصوصا ان معظمها سيارات فى سعر 60000جنيه كاش
واغلب اللى اشتروهم بالتقسيط يادوب
فى نفس الوقت اللى بنفس السعر ده تشترى جولف استعمال
موديل 98 مع الفرق طبعا ان اللى بيشترى قسط لازم يشترى زيرو
علشان شروط الضمانات
لكن لو رجعنا للافضل انا لو معايا المبلغ كاش
اشترى جولف او تويوتا استعمال افضل من الماركات اللى كلها مشاكل
والاسم انها زيرو بس ياترى هتعمر كام سنه

اقتباس:

---

المشاركة الأصلية كتبت بواسطة som3aa

اللوجان انا شايف انها منتشرتش و لا هتنتشر لان التوكيل ضرب الناس على قفاها جامد لانه نزل العربية منغير جمرك و ضرب فرق الجمرك فى جيبه.
.

---

انا لا اتفق مع حضرتك والكلام اللى حضرتك بتقوله ليس له اى علاقة بالصح
وبلاش موضوع القفى دة علشان لو اعدنا نشوف الحاجات اللى بننضرب فيها
على افانا مش حنخلص كلنا
وكل سنة وانت طيب ورمضان كريم

اقتباس:

---

المشاركة الأصلية كتبت بواسطة som3aa

اللوجان انا شايف انها منتشرتش و لا هتنتشر لان التوكيل ضرب الناس على قفاها جامد لانه نزل العربية منغير جمرك و ضرب فرق الجمرك فى جيبه.
.

---

عشان محدش ينضرب علىافاه وهو بيشترى اللوجان دى اسعار اللوجان فى المغرب
سعر لوجان "مانوال" من دون أي كماليات يبلغ 9291 دولاراً أمريكياً :w6266d
والطراز الثاني 10853دولاراً.:w6266d
الطراز الثالث "فول أوبشن" بسعر قدره 12369 دولاراً.:w6266d
احسب واولى ايه رأيك

الانتشار و توفر قطع الغيار و سهولة الصيانة و سعر اعادة البيع

اقتباس:

---

و عشان كده عربيات زي فولفو حالها مش ماشي

و عربيات زي فيرنا ماشية زي اللوز

---

yes

بس الفولفو برضه غالية اوي يا احمد باشا

لكن الفيرنا عشان اصلاً في الفئة السعرية دي مفيش غير :
فيرنا
لانوس
أفيو
و اسبرانزا
.... و اه صح افتكرت .. اللوجان كمان

الحقيقة انا شايف ان احسن هي الفيرنا (ايام ما كنا بنشتري.. مكنش في لوجان... انا معرفهاش)
ممكن تقول شكلها من جوة وحش و تابلوه فقير ..
هقولك محدش متوقع اكتر من كدا في فئة زي دي
العربية سهلة في الصيانة بتاعتها.. مراكز صيانة بالهبل لهيونداي في كل مكان
موفرة في استهلاك البنزين و تكاليف تشغيلها منخفضة.. فعلاً عربية إقتصادية
وغير دا العربية الحمد لله فاقت توقعاتي.. مكنتش متوقع انها هتكون حلوة كدا.. (بعد الكلام اللي سمعته ايام الشراء عن الكوري و التقفيل و ... و ..)

عشان كدا هي منتشرة
فولفو اية بس اللي عايز تقارنها بالفيرنا يا راجل يا طيب

:D

للمرة المليون الوكيل ما ضربش في جيبه جمرك اللوجان

و فرق السعر بيننا و بين المغرب ده ضريبة مبيعات و رسم تنمية

لان اتفاقية اغادير لغت الجمرك بس ما لغتش الضرائب و الرسوم

الى جانب ان مكونات العربية متجمركة و هي داخلة المغرب أصلا !!!!!

سوق السيارات في مصر لم ينفتح إلا حديثاَ .. و لوقت طويل كان مفروض علي الناس ماركات و سيارات بعينها
و إن يبقي عندك إختيار و إتنين و تلاتة في الفئة السعرية دي حاجة حديثة جداَ علي الشعب المصري !

لذلك فا انا شايف إن عامة الناس ماشية مع ثقافة "اللي موجود"
انا عايز عربية في حدود كذا .. موجود إيه ؟ لانوس و فيرنا
حلوة الفيرنا ؟ أه عندنا 9 في العمارة
تبقي حلوة ! أكيد يعني الناس دي مش هترمي فلوسها في الأرض ! توكلنا علي الله .

واحد تاني يقولوله فيه لانوس و فيرنا .. حلوة اللانوس ؟
أه عندنا 11 في العمارة
طب هو انا يعني هفهم أكتر من الناس دول ؟ دي عربية متجربة ! هي لانوس مفيش غيرها

و مع الوقت هيختفي فيرنا و لانوس و يحل محلهم في الحوار لوجان و عربية تانية مثلاَ .. و إلي ما لا نهاية !

رأيي في الموضوع ده إن المصري كان متعود يجيب العربية المفروضة عليه لأن مفيش إختيارات غيرها -زي ما مفروض عليه حاجات كتير- و لذلك اما بقي في إيده الإختيار .. جري ورا اللي مفروض عليه يشوفه في الشارع كل أربع ثواني ! و من باب الونس برضه ميحسش إنه العبيط الوحيد اللي إشتري العربية دي .. لأ دي عربية مالية الشوارع يعني أثبتت نفسها !

ده طبعاَ بالنسبة للناس اللي بتشتري عمياني و سمك في ميه زي ما بيقولوا .. إنما ناس كتير إشترت لانوس و فيرنا بعد دراسة و معرفة إن دي العربية اللي هتلبي إحتياجاتهم .

الموضوع بيبدأ بواحد بس عنده شخصية و مغامرة يقول العربية دي داخلة دماغي .. باقي الناس عينيها تبرق و تلاقي .. و انا كمان .. و انا كمان .. و انا كمان .. و انا كمان .. !!

اقتباس:

---

و من باب الونس برضه ميحسش إنه العبيط الوحيد اللي إشتري العربية دي .. لأ دي عربية مالية الشوارع يعني أثبتت نفسها !

---

انا لما جيت اشتر ى الماتيريا بابا كان بيقولى انا بامشى فى الشارع ادور على اى عبيط غيرى دفع ال 109 ونص الف فى عربيه قد كده هو مكانش شافها غير فى بعض الصور ومره واحده فى الشارع ولما جبتها وركب وجرب فسألته تانى هااااااااا قالى انا عمرى ماكنت متخيل انها بالوسع ده ولا بالجمال ده ودلوقتى بقى يطمع فيها كتير ويحكى ليها عن صحابه ولما كنا فى المعموره كان يكلمنى ويقولى تعالى اصل فلان كان عاوز يشوف عربيتك هههههههههههههههههه

اقتباس:

---

المشاركة الأصلية كتبت بواسطة madoo

ولما كنا فى المعموره كان يكلمنى ويقولى تعالى اصل فلان كان عاوز يشوف عربيتك هههههههههههههههههه

---

قول له عربياتنا ما بتنكشفش عالغريب هههههههههههههههههههههه

أنا أعتقد إن نظام التقسيط هو الأساس وهو اللي بيحدد العربيات اللي الناس بتشتريها وبتقبل عليها وبعد فتح النظام ده على مصراعيه ف أغلب البنوك بالفوايد ومدد التقسيط الطويلة اللي بتصل ل 7 سنوات في بعض البنوك بقى في ماركات محددة هي اللي منتشرة ودي اللي قسطها بيبقى قليل على مدة طويل زي اللانوس والفيرنا زاللانسر وغيرهم , ناس كتير مش بتهتم تعرف أي تفاصيل عن العربية اللي هتشتريها ولكن لازم دايما تسمع جملة "ودي لو على خمس سنين يبقى قسطها كام في الشهر":F_eyeb1[1]::F_eyeb1[1]:

الخلاصة
* حسب العربية دي ماشية ازاي في السوق وقطع غيارها واعادة بيعها !!! لو معهوش فلوس

* حسب العربية ورفاهيتها وكمالياتها وفخامتها !!!!! لو فلوس كتير وفي زيادة عن تمن العربية بكتير ومش فارق دخلة التوكيل بكام والصيانات الدورية بكام ولما آجي ابيع هاخسر أد ايه هجيب الفولفو والفورد

هو القفى ده هيستحمل ايه ولا ايه

على حسب الشكل الخارجى اللى بيشبع التباهى والغرور وحتة فشخرة
+ الإنتشار الواسع + قطع الغيار الرخيصة + سعر بيع عالى عند إعادة البيع

اقتباس:

---

للمرة المليون الوكيل ما ضربش في جيبه جمرك اللوجان

و فرق السعر بيننا و بين المغرب ده ضريبة مبيعات و رسم تنمية

لان اتفاقية اغادير لغت الجمرك بس ما لغتش الضرائب و الرسوم

الى جانب ان مكونات العربية متجمركة و هي داخلة المغرب أصلا !!!!!

---

اقتباس:

---

عشان محدش ينضرب علىافاه وهو بيشترى اللوجان دى اسعار اللوجان فى المغرب
سعر لوجان "مانوال" من دون أي كماليات يبلغ 9291 دولاراً أمريكياً
والطراز الثاني 10853دولاراً.
الطراز الثالث "فول أوبشن" بسعر قدره 12369 دولاراً.
احسب واولى ايه رأيك

---

معلش يا ringoo مكنش قصدى ان اللى اشتروا اللوجان ناس عبيطة مثلا و لا اى حاجة بالعكس انا شايفها احسن بكتير اوى من الفرنا و اللانوس و غيرهم فى الفئة دى .

بالنسبة للتوكيل ضرب الناس على قفاها و لا لأ فهو ضربهم جامد اوى , و معظم التوكيلات (لو مكنش كلهم) فى مصر ضربوا الناس على قفاها للعلم و انا طبعا واحد من الناس اللى اتضربت على قفاها طبعا زيى زى غيرى

للمرة المليون هوضحلكوا موضوع اللوجان دا و علشان الناس تبقى فاهمة ليه العربية غالية فى المغرب
العربية غالية فى المغرب علشان عليها جمرك + ضريبة , انا مش عارف كام فى المية بالظبط بس هشرحلكوا
العربية المرسيدس الC-280 بتتجمع فى مصر , العربية تمنها فى الخليج (نسخة طبق الاصل من المصرى بكل حاجة ) بما يعادل 240 الف جنيه مصرى , العربية بتتباع فى مصر ب 448 الف جنيه مصرى ليه؟ لان فى مصر جمرك + ضريبة على العربيات المجمعة فى مصر بيوصل ل 55% من تمن العربية , يعنى مفروض العربية تتباع فى مصر ب 372 الف جنيه مصرى او اقل بكتير + التوكيل بيحط من عنده 75 الف زيادة عن مكسب الوكيل فى السعودية لانه عنده مصنع تجميع يعنى زى المحتكر لو مشتريتش من عنده او من عند bmw مش هتشترى اساسا عربية كدا , فبالتالى العربية اللى تمنها 240 الف بتتباع ب 448 الف , طيب دلوقتى مرسديس من كام سنة كانت صدرت 200 عربية مرسيدس E-class خارج مصر قبل كدا و bmw ناوية تصدر للسودان , طيب تفتكروا لما يصدروا العربية هيصدروها بالسعر العالى دا و لا السعر الاصلى بتاع العربية و ارخص كمان؟؟ طبعا السعر الاصلى و ارخص طيب ليه؟؟
علشان 1- العربيات المصدرة مبيدفعش عليها ضريبة مبيعات و لا جمارك و الكلام دا فى اى دولة مش مصر بس , بتسترد الجمرك + الضريبة عند التصدير , 2- التوكيل بيتنازل عن المكسب الزيادة (اللى هما كمثال المرسيدس الC-280 ال75 الف) لانه فقد الميزة التنافسية اللى عنده و هى الحماية بالجمرك و الضريبة يعنى لو مستوردوش العربية من مصر بسعر ارخص هيجيبوها من المانيا فبالتالى المصنع فى مصر بيبيع لدولة تانية بسعر ارخص من المانيا و يقبل بهامش ربح قليل, طيب سنة 2019 ان شاء الله لما الجمارك هتتلغى مصنع مرسيدس هيقفل؟؟ لا طبعا هيستمر فى الانتاج بس هيبيع باسعار ارخص من المستوردة من المانيا او على الأقل نفس السعر بالظبط علشان محدش يجيب العربية من بره لانه هيكون فقد الميزة بتاعته الرئيسية اللى هى الجمرك فهينزله الخليجى و الالمانى من عربيته!!

نفس الكلام بالنسبة للوجان , اللوجان من ارخص العربيات اللى فى العالم و عليها جمرك + ضريبة قليلة فى المغرب علشان كدا بتتباع بسعر 11000$ بمعنى اللوجان اساسا ارخص من الياريس و الاكسنت حتى لما كان عليها جمرك , الياريس فى امريكا ب 11500$ و الاكسنت فى امريكا بتبدا من 10000$ , يعنى معنى كدا ان اللوجان اغلى من الياريس و الاكسنت لأ طبعا ,اللوجان ارخص بكتير بس عليها ضريبة + جمرك فى المغرب و دا اللى وصلها ل 10-11 الف دولار , نفس الكلام بالنسبة للفرنا فى مصر , الفرنا ب 65 الف مع ان لو معلهاش جمرك و لا ضريبة ممكن تتباع مثلا ب 40-45 الف جنيه .

طيب دلوقتى اللوجان هتتصدر من المغرب لمصر , هتشيل منها الجمرك + الضريبة هيبقى سعر العربية رخيص جداااا (انا فاكر ان هدف صناعة اللوجان هو صناعة عربية تمنها 5000 يورو و عملوها تبدا من 6000 يورو و بتوصل ل10 الاف يورو حسب الكماليات و الجمارك فى الدول نزلت فيها

Dacia Logan - Wikipedia, the free encyclopedia

اقروا كويس الكلام اللى هنا

بعدين العربية لما تيجى مصر بتمنها الاصلى خالص (اللى هو سعر المصنع) مفروض يضاف عليها 20 % ضريبة و تتباع فى مصر بالسعر دا , و نحسبها بالعقل عربية كان عليها جمرك + ضريبة 60% كانت بتتباع ب 70 الف جنيه شالوا الجمرك اللى هو 40% اتباعت ب 63 دا كلام ؟؟؟
ارجو تكونوا فهمتوا النقطة دى
بس طبعا الكل بيتاخد على قفاه يعنى مرسيدس ال 75 الف دول ما هم قفا برده و كدا على معظم العربيات.

يعنى مفيش حد احسن من حد , كلنا عندنا ختم النسر :)

المواطن المصري يقوم بشراء سيارته الجديدة علي أساس هام و مهم جدا و هو رأي المدام اللي بيعجبها الشكل و اللون اللي يليق مع شكل و لون الفستان و الجزمة و الشنطة و الموبايل و مش مهم المواصفات و السعر و الكلام الفارغ ده

اقتباس:

---

المواطن المصري يقوم بشراء سيارته الجديدة علي أساس هام و مهم جدا و هو رأي المدام اللي بيعجبها الشكل و اللون اللي يليق مع شكل و لون الفستان و الجزمة و الشنطة و الموبايل و مش مهم المواصفات و السعر و الكلام الفارغ ده

---

:D

اقتباس:

---

المشاركة الأصلية كتبت بواسطة SE_coralsea

المواطن المصري يقوم بشراء سيارته الجديدة علي أساس هام و مهم جدا و هو رأي المدام اللي بيعجبها الشكل و اللون اللي يليق مع شكل و لون الفستان و الجزمة و الشنطة و الموبايل و مش مهم المواصفات و السعر و الكلام الفارغ ده

---

ودا يدل على ان المصريين رجاله وبيقفوا وقفة رجالة :_Alshmokh23[1]:

اقتباس:

---

المشاركة الأصلية كتبت بواسطة أحمد كمال

قول له عربياتنا ما بتنكشفش عالغريب هههههههههههههههههههههه

---

:b4_388::b4_388::b4_388::b4_388::b4_388:
انت ترضالى الاذيه ههههههههههههههههههههه؟ تخيل لما يرجع هيعمل ايه ؟

الفكره كلها ان المستهلك المصرى بيفضل الشكل وفى نفس الوقت الانتشار دى كل الفكره والاغلب تقليد فيه ناس كتير بتحب تقلد وده فى كل حاجه مش فى العربيه بس فى الشكل والمظهر كمان.

الموضوع ده هايل..
اةلا لعلمكم لا توجد ثقافه شراء سياره فى مصر الى عند نسبه 10% من المشترين ودول ان هتكلم عليهم فى الاخر..
الشعب المصرى عنده مبادىء لن يغيرها ابدا وديه متحكمه فيه مش فى شراء سياره فقط بل فى حياته عموما...
-شراء سياره جديده حتى لو كاش بيعتمد على ان المشترى شاف العربيه ديه مع صاحبه او جاره ومعارفه وبالتالى كل معلوماته بناء على اراء شخصيه بحته مش راى فنى لان كل واحد بيفتى زى ماهو عايز..وده بيعمل تشتيت للمشترى واخيرا بيضطر يجيب الحاجه الى مع الناس هديكو مثال...
فى كل محافظه من محافظات المحروسه ستجد انتشار نوع او اثنين من السيارات بصوره ملحوظه وده سببه طبعا ثقافه يعم مالناس كلها ركباها ..
نيجى للسعر مش معنى انك مش معاك فلوس كتير انك متقيمش العربيه اللى تشتريها بمعنى يعنى لو معاك 80000 الف حتشترى ايه..
طبعا كله حيقول لانسر ..اكسنت....مثلا...بالرغم من وجود سيارات احسن فى الفئه السعريه جين ..ديهاتسو..
لو معاك 130000 الف حتقولى رينو ..مازدا..بالرغم من وجود نيو سيراتو...
الى اقصده العربيات كزيسه لكن قيمه الجين بالنسبه للمبلغ المدفوع ممتازه..وكذلك النيو سيراتو..

نيجى للى بيفهموا ...اه بيفهموا لكن بيخافوا يعنى عارف كل حاجه عن العربيات وايه الكويس وايه الوحش وفى الاخر معظمهم بيشترى بمبدا لا يا عم العربيه ديه مش منتشره قطع غيارها غاليه..توكيلها فاشل..(على فكره مفيش توكيل عدل) المفروض الى بيفهم يشترى السياره اللى تعجبه بدون دخول فى تفاصيل زى ديه انا عارف ان فى ناس ستتعترض على كلامى بس اوضح الاول
-لا يعنى عدم انتشار السياره عدم اعتماديتها والدليل ..البرافو والليون..سيارات ممتازه
-قطع الغيار غاليه وايه الجديد ماكل قطع السيارات غاليه طب لو ماركه محترمه قطعه الغيار حتعيش معاك ..عن تجربه
التوكيل وحش معظمنا بيصلح بره التوكيل علشان التوكيل سىء او غالى حبتين ثلاثه..

واخيرا اسف على الاطاله...

اقتباس:

---

الى اقصده العربيات كزيسه لكن قيمه الجين بالنسبه للمبلغ المدفوع ممتازه

---

معلش المعلومة دى غلط 100%

ثقافة القطيع للأسف

اقتباس:

---

المشاركة الأصلية كتبت بواسطة seaman

الموضوع ده هايل..
اةلا لعلمكم لا توجد ثقافه شراء سياره فى مصر الى عند نسبه 10% من المشترين ودول ان هتكلم عليهم فى الاخر..
الشعب المصرى عنده مبادىء لن يغيرها ابدا وديه متحكمه فيه مش فى شراء سياره فقط بل فى حياته عموما...
-شراء سياره جديده حتى لو كاش بيعتمد على ان المشترى شاف العربيه ديه مع صاحبه او جاره ومعارفه وبالتالى كل معلوماته بناء على اراء شخصيه بحته مش راى فنى لان كل واحد بيفتى زى ماهو عايز..وده بيعمل تشتيت للمشترى واخيرا بيضطر يجيب الحاجه الى مع الناس هديكو مثال...
فى كل محافظه من محافظات المحروسه ستجد انتشار نوع او اثنين من السيارات بصوره ملحوظه وده سببه طبعا ثقافه يعم مالناس كلها ركباها ..
نيجى للسعر مش معنى انك مش معاك فلوس كتير انك متقيمش العربيه اللى تشتريها بمعنى يعنى لو معاك 80000 الف حتشترى ايه..
طبعا كله حيقول لانسر ..اكسنت....مثلا...بالرغم من وجود سيارات احسن فى الفئه السعريه جين ..ديهاتسو..
لو معاك 130000 الف حتقولى رينو ..مازدا..بالرغم من وجود نيو سيراتو...
الى اقصده العربيات كزيسه لكن قيمه الجين بالنسبه للمبلغ المدفوع ممتازه..وكذلك النيو سيراتو..

نيجى للى بيفهموا ...اه بيفهموا لكن بيخافوا يعنى عارف كل حاجه عن العربيات وايه الكويس وايه الوحش وفى الاخر معظمهم بيشترى بمبدا لا يا عم العربيه ديه مش منتشره قطع غيارها غاليه..توكيلها فاشل..(على فكره مفيش توكيل عدل) المفروض الى بيفهم يشترى السياره اللى تعجبه بدون دخول فى تفاصيل زى ديه انا عارف ان فى ناس ستتعترض على كلامى بس اوضح الاول
-لا يعنى عدم انتشار السياره عدم اعتماديتها والدليل ..البرافو والليون..سيارات ممتازه
-قطع الغيار غاليه وايه الجديد ماكل قطع السيارات غاليه طب لو ماركه محترمه قطعه الغيار حتعيش معاك ..عن تجربه
التوكيل وحش معظمنا بيصلح بره التوكيل علشان التوكيل سىء او غالى حبتين ثلاثه..

واخيرا اسف على الاطاله...

---

الله ينورعليك مفيش كلام يتقال بعد دة رد فى الصميم تسلم ايديك :S_thum1[1]:

اقتباس:

---

المشاركة الأصلية كتبت بواسطة eslam_nagy

ثقافة القطيع للأسف

---

اقتباس:

---

المشاركة الأصلية كتبت بواسطة أحمد كمال

ثقافة القطيع

---

انا شايف ان سياسة القطيع مش شىء و حش ابدا هى بس طريقة للاختيار
يعنى ليها مميزات و عيوب زى اى طريقة تانية و اكيد بتلبى حاجة اللى بيتبعها من انه مش عاوز يشغل دماغه بامكانيات العربيات او مواصفاتها و البحث ده غير انه بيلاقى قطع الغيار متوفره و الميكانيكية فاهمين فيها و سعر اعادة البيع جيد ده الحلو الوحش بقى انه ممكن بنفس الفلوس يجيب حاجة امكانياتها اكبر و اقيم

عن نفسى لما جيت ادور على عربية عشان والدى اتبعت طريقة انى البى الحاجة اللى هو عاوزها للحد الاقصى -و طبعا مفيش حاجة ببلاش او كامله- فشوفت هو عاوز ايه فى العربية و الفلوس المتوفرة قد ايه و اخترت العربية اللى تناسبه و عشان كده هو متقبل عيوبها و على قلبه زى العسل لانها بتعمل الحاجة اللى هو عاوزها كويس قوى

على اساس ربك لمل يريد وربنا يستر

انا قعدت شهرين اعمل فحص شامل على عربيات مصر كلها فئة من 70 الف الى 100 الف لغاية مستقرت على تويوتا يارس

التقليد و الفشخرة
التقليد و الفشخرة
التقليد و الفشخرة
التقليد و الفشخرة
التقليد و الفشخرة
التقليد و الفشخرة
التقليد و الفشخرة
التقليد و الفشخرة
التقليد و الفشخرة
التقليد و الفشخرة