المصري اللي على حق..يقول للغلط لأ..والله!!
بسم الله الرحمن الرحيم
مش هأطول عليكم بس أعتقد في كتير منكم شاف أعلانات سكك حديد مصر اللي بتتذاع حاليا في رمضان
و بتناقش سلبيات كتير في القطارات من تخريب و قمامة و سلوكيات و تزويغ و غيرها كتير
وفي الأخر بيعترف بأن الأعلان طبعا مش هيغير حاجة لكن انت اللي هتغير و تقول للغلط لأ
يعني الهيئة يا جماعة عايزانا نغير من أنفسنا و نغير الناس كمان
يعني الراجل اللي بيزوغ ده تقفش فيه و تمنعه
والست اللي قاعدة عالوابور بتعمل فول تروح تمنعها
و اللي بيرمي زبالة و يخربش القطر تقوله لأ
دي فلوس و فلوسك و تمنعهم و ما قالوش بئى المنع يبئى بالأيد و لا باللسان و لا بلقلب
يعني لو قالي ((وانت مال أهلك خليك في حالك)) هل أضربه و لا أسكت ولا اعمل ايه!!!
اما الهيئة الموقرة فخلاص جابتلكم كام قطار جداد و كفاية كده هتنهبوا
مش مسؤولة انها تعين مراقبين و كمسارية و امن و نقط مراقبة و تفتيش و تمنع هيه بوابير الجاز و الكلام ده
ليه هيه مش هيئة مصرية و على حق و لازم تقول للغلط لأ
و بأيديها سلطة قانونية تفرض غرامات و عقوبات و حبس و مرمطه للمخربين
ولا احنا مننا فينا نسلك أمورنا بئى مع بعض......انا جبتلكم قطورات اهوه و انت وأسطفلوا ياكش تولعوا انتو و هيه!!!!
موقف غريب فين العشرة جنيه الغرامة مثلا زي زمان بتاعة المترو لا كان حد يفكر يعدي من غير تذكرة ولا يشرب سجارة ولا يرمي ورقة ولا يبصق و لا يكتب و كله كان ماشي محترم لأنك عارف انك هتتغرم في لحظتها
دلوقت عربية الستات حتى مليانة رجالة!!!وباظ المترو
انا لا اعتقد ان مسؤليتي لوحدي علشان أبئى مصري على حق اني أتخانق مع اللي يرمي زبالة أو يزوغ من الكمسري لأني من حقي أنعم بالأمان لا حد يأذيني ولا أأذي حد
ده ما يمنعش ان الدين النصيحة واحنا اللي لازم نغير من نفسنا الأول علشان البلد تتغير لكن ما تشيلك الهيئة ايدها خالص كده بدون أي ردع للمخطئين و تقولك انت اتصرف!!!!!!
التغيير مطلوب لكن ما ينفعش من غير قانون و نظام و ردع و عقوبة...اللي بيتخالف مرة على حاجة بأخد باله تاني مرة منها لو كان له عقل و قلب واعي...
و فتكروا مثال المترو..لما بطلوا يعاقبوا الناس بطلت تلتزم...وده حال الفراعنة..محتاجين العين الحمرة في أغلب الأحيان علشان يمشوا مظبوط لأن الغلط دمه خفيف و الصح تقيل على قلبنا و ماخدناهوش في المدرسة
و يجعله عامر...........و رمضان كريم