الله ينور عليك .. خلونا واقعيين يا جماعة .. أي حد يقدر يشتم .. الموضوع مش متطلب منصب ولا إمكانيات معينة ولا هو exclusive لحد .. و في بلدنا مفيش قانون ممكن أي حد يشتم أي حد .. و طبعاَ مفيش أخلاق .. يعني اللي حاسس إنه عايز يشتمك هيشتمك سواء راكب مرسيدس أو كارو .. الشتيمة بتقلل اللي قالها مش اللي إتشتم ولا تعني أي شئ إذا صدرت من هؤلاء المختلين عقلياَ راكبي السيارات في مصر .
انا قبل كدة علي كوبري أكتوبر واحدة راكبة X5 كانت طايرة مش أقل من 110 و جت لزقتلي إكصدام في إكصدام و تقليب نور عشان أعديها .. و اللي يعرفني منكم عالحقيقة يعرف إن الحركة دي أكتر حركة بتجنني ... معديتهاش.. جت من جنبي و دلقت صفيحة زبالة من بقها .. عليت الكاسيت و شاورتلها "مش سامعك" .. جت قدامي و هدت من منزل العروبة لحد طريق النصر عشان تحبسني وراها .. .60 .. 40 .. و انا معاها و طافي النور عشان تشوف إبتسامتي العريضة .. و فجأة قامت فاركة و طالعة تقريباَ أما أعراض الذبحة إبتدت تهجم عليها .
الشارع ملئ بأنصاف البني أدمين و محاولة مجاراتهم خسارة و حرقة دم .. اللي يضايقك في الطريق .. علي الكاسيت .. شاورله انا مش سامعك .. إحدفله بوسة في الهوا .. تابع طريقك .
ملحوظة : لو زنقني و وقفنا و حب يعمل فيها أبو الرجال و يكسر حاجة في العربية و نزل يتخانق ؟ .. واحد عملها قبل كدة .. يا سلام عز الطلب .. متنزلش من عربيتك ولا تشتم ولا تتعصب، سنترلوك مقفول و بس طلع موبايلك و صوره فيديو عشان تبقي الجريمة بالصوت و الصورة مع إضافة مؤثرات صوتية "إنت بتعمل إيه يا مجنون !!! إعقل و إحترم نفسك!!!" .. و أتحدي لو لمس العربية .. و لو لمسها قوله إحنا سجلنا الفقرة دي و هنذيع غصب عنك .