الماروتى بتحطولها بنزين كام و استهلاكها كام فى الصفيحة ؟
الماروتى بتحطولها بنزين كام و استهلاكها كام فى الصفيحة ؟
في هنا اخ اسمح ((محنش)) بيحط للماروتي بنزين 80
انا بحطلها 90 استهلاكها 330 داخل البلد
لو حطيت 80 السحب هيضعف معاك وهتحتاج تظبط كهربا
الكتالوج بينصح ب90 بس واحد صاحبى بيحط80 بس بتسقف معه اذا قرص عليها
انا جبت ماروتي الحمد لله زيرو في الكتالوج بينصحوا انك تستخدم بنزين 91 او ما هو أعلى انا اول مره اسمع ان فيه 91 بس على العموم الفرق بسيط بين 90 و 92 علشان كده اقل شيء ممكن تحطه لها 92 مينفعش 90
فى الكتالوج عندى بينصحو ببنزين رقمه الاوكتانى لايقل عن 85 ,, العربيه 2009,, مش عارف اتغيرت بقت 91 ولا ايه ؟؟
و عموما انا بحطلها 80 و وطيت الكهربا شويه
الأستهلاك حوالى 300 فى الصفيحه بالقرص و الزحمه
بكده من كلام الكتالوج اكيد الافضل ان يتحطلها بنزين 92
شوف يا صديقي العزيز الافضل هوا 92 لها سحب جامد صوت ماتور اقل عند القرص عليه
ودة عن تجربه فعلا عنى كنت بحط 90 قلت اجرب 92 لاقيت فرق زي ما قلت لك بالضبط
اي ان فى المرتبه الاوله 92 بعدة 90 واذا لاقيت ان صفحيه مثلا بتعمل معاك قليل هتروح تضبط عند مكانيكي بيفهم وخلاص ع كدة
اما 80 فهو يحتاج الى ضبط كهرباء غير قلته فى البلد يعنى مش هيسعفك فى اي مكان زي 90او92 غير انه تاثير كتير وحش ع ماتور
وبالتوكيل ينصحو بعدم وضع 80 العربيه كل ما اعتنيت بيها فى مكانيكتها هتديك كتير وهتحسها بنفسك وانت ماشي بيها
والله اعلم تحياتى...
شكرا للجميع
عربيتي 2009 و بحط 80 حتى من قبل ما اضبط كهربا
شغالة كويس السحب ضعيف بنسبة بسيطة و بتسقف لما تقرص عليها
ليه تقرص عليها اساسا؟ هو انت جايب كرولا - انت جايب عربية ببلاش تقريبا
مرة كنت طلبت منهم ضبط الكهرباء ف التوكيل و بعد كدة حسيت ان التسقيف اقل بس لسة موجود
الفرق فى سعر البنزين كبير و لو بطلت تقرص العربية تمام التمام
انا هاستمر على كدة كام سنة و تعالو نشوف النتيجة كمان سنة مثلا جايز اكون انا صح
جزيل الشكر للاخ m7nsh
90
يا جماعة انا لسه جايب ماروتي زيرو ، انا جبتها طبعا لأن حجمها صغير و استهلاكها قليل بس الغريب انى لما حسبت لقيتها بتعمل 20 لتر 200 كيلو و انا حاسس ان كده كتيير قوي عليها ، يا ترى أيه العيب او السبب
علما أني مسافرتش بيها ده داخلالقاهرة فقط
العداد عامل 600 كيلو لغاية دلوقت
ايه المشكله اللى عندي؟؟؟
ده بسبب :
التليين ثم التليين ثم التليين
انا اول ما جبتها كانت بتعمل معايا نفس المعدل بتاعك ده بالظبط
مع الوقت و بعد ما تكسر اول الف و تغير زيت التليين و فلتر هتلاقى الدينا ظبطت ان شاء الله
و مبروك عليك يامعلم بس عاوزينك تعرفنا بنفسك كده و بتدرس ولا ايه ؟
فى موضوع متثبت عن الماروتى ,, ابقى عرفنا بنفسك فيه هناك
صحيح ابقى بالهداوه عليها الفتره دى ,, بلاش قرص ع الموتور ,, بلاش فرك وامريكانى ,, بلاش تخميس ,, بلاش كبس فرامل جامد
بدل فى كل الغيارات ,, متمشيش على سرعه ثابته فتره كبيره ,, غير من سرعتك كل شويه و خلى نقلاتك كالتانى
0 اول طبعا
10 تانى
30 تالت
50 رابع
السلام عليكم m7nsh
شكرا على ردك ريحتني والله
وأحب اعرفك بنفسي
أخوك كمال مهندس كمبيوتر - القاهرة - 29 سنه - "اي حاجاه في الكمبيوتر انا تحت أمرك"
بس على فكره انا مش بعمل كده خالص
انا قريت في الكتالوج كاتبين ان ينصح أن في أول 1000 كيلو متعديش السرعه عن 100 فقلت كويس ومبزودش عن 80
خصوصا انى لسه متعلم سواقه جديد يعني مفيش قرص ولا جري ولا أمريكاني ولا حتى اعرف بيتعمل ازاي
مكتوب في الكتالوج انهم بينصحوا بنقل السرعات كالاتي
أول 0 الى 30
التاني 10 الى 50
التالت 20 الى 90
رابع 30 الى اعلى سرعه
اهلا بيك يا بمشهندس كمال تشرفنا بيك
شوف يا صديقي العزيز كتالوج كاتب الاستخدام دة بالنسبه للبئيه العام للدول بالخارج وفى كمان تناسب فى الاستخدام بين دول
بالنسبه للجو ودرجه حراراته ووهكذا بالنسبه لنا فى مصر الاجواء حار وكونك تعمل زي ما متكوب صعب جدا عربيه
شوف اتفق مع محمد فيما قالو لك وهوا الاستخدام الامثل بعد الاطلاع ع كثير من مواضيع الخاصه بهذا الامر
الاول من 0 الى 10
ثاني من 10 الى 40
ثالث من 40 الى 60-70 كبيرة اوي
رابع من 70 لما نهاياا وللعلم كونك عاديت ال100 فدة بيزود من استهلاك البنزين
وانت هتلاحظ ان صصوت ماتورك علي جدا اصلا من بعد 90 دة اللى الخلاصه اللى عرفتها
ولك طبعا الحريه كلها انك تاخد بيه اولا
والف مبروك العربيه تحياتى...
والله انتم ناس زى العسل والواحد بيستفاد من كل رد هنا
جزاكم الله خيرا جميعا
وكل سنة وانتم طيبين
اتشرفت بيك يا بشمهندس والله فرصه سعيده جدااا :)
موضوع متعديش 100 ده مظبوط طبعا 100 %
بس كنت عاوز اقولك ان ده رينج النقلات يعنى الرينج اللى المفروض تنقل فيه
يعنى طبعا هو مش قصده انك تنقل تانى على 30 ,, هتلاقى العربيه بتجعر منك و مش هتعرف تسكتها :I_angr1[1]:
او التالت على 50 نفس القصه
النقلات اللى قلتها المقصود بيها عدم التحميل على الموتور بحيث لفاته تكون هاديه و ميكونش فى racing للمحرك ,, لأن فكره حوار التلييين ده اصلا ان مهما بلغت كفائه التصنيع فعمرها مبتوصل 100 % ,, بيكون فى بروزات خفيفه او خلوصات فى المحرك او مجموعه الفتيس بتتظبط فى فتره التليين ,, عشان كده القرص غير مستحب طبعا فى اول فتره فى عمر المحرك ( انك تنقل من اول لتانى مثلا على 30 بالماروتى يعتبر قرص )
بعد ما فتره الألف كيلو تعدى و تغير زيت و فلتر ,, الدنيا هتفتح معاك شويتين ,, و تقدر تعتبرها مدارس فى النقلات
مدرسه السواقه الهاديه : نفس نقلات التليين 10 - 30 - 50
مدرسه السواقه الاقتصاديه : 20 - 40 - 60
مدرسه السواقه الرياضيه (حرق ) : 30 - 55 - 80 فى الحدود دى
الباشمهندس سبعاوى هو اللى كان افادنا من فتره قديمه شويه بمواعيد النقلات دى ,, و فعلا هى من انجح النقلات للماروتى
ياريته بس يرجع يشارك معانا ,, ويكون اللى مانعه عننا خير
اتمنى اكون قدرت افيدك يا كيمو ,, وكل سنه و انت طيب يا هندسه
ماروتى 2007 قعدت حوالى 6 شهور بستخدم 90 وبعدين بقيت بحطلها 92
وماشاء الله السحب زى الفل وبتعمل حوالى 265 كم فى الصفيحة
وفى فرق جامد جداً عن الــ 90 فى السحب وصوت الماتور والفرق بسيط جداً فى السعر 2 جنيه فى الصفيحة
خاليك فى المضمون احسن وحافظ على عربيتك والماتور وحط 92
ana ba7oot 92
wel 22 litre by3mlo 365
بحط لها 92 وبتعمل حوالى 300-320 جوة البلد
انا جايب ماروتي 2009 زيرو ومن اول ما جبتها وانا بحط بنزين 92 بس عندي استفسار
التانك بتاع الماروتي كام لتر
والصفيحة تعمل كام لتر
واحسب ازاي الصفيحة عملت كام كيلو
ممكن الشرح
1- التانك بتاع الماروتى بياخد بالظبط 28 لتر ( زى مالكتالوج بتاعها بيقول وأنا عن نفسى مابزودش أبداً عن 25 لتر وأنا بمون - لأن هية طبعاً بيبقى فيها شوية -علشان أترك فراغ مناسب للتمدد يعنى مابفولش أبداً لغاية الغطاء دايماً أتحكم فى كمية البنزين لترك الفراغ المناسب للتمدد )
2- الصفيحة (20 لتر) تقريباً بتعمل معايا حوالى 265 كم ( سواقة داخل المدينة طبعاً السواقة على الطرق السريعة بسرعات شبه ثابتة وتوقفات قليلة جداً الصفيحة تعمل معاك مسافة أكبر)
3- علشان تحسب الصفيحة تعمل كام كم
تستنى لغاية لما البنزين يشطب على الآخر تقريباً المؤشر ينزل شوية عن العلامة حوالى 2 - 3 مم وتمون 20 لتر بس ، وبعدين تصفر عداد الرحلات من الزرار
الأسود اللى جوة التابلوه وتعيش حياتك فى السواقة لغاية لما ييجى المؤشر تانى عند نفس العلامة تقريباً وتقرأ العداد عمل كام كم ! بس خلاص !
4- ممكن من الكتالوج بتاع الماروتى تعرف كل حاجة عنها وزنها - أبعادها - ومواعيد الصيانة وأيه اللى بتغيره
ربنا يحافظلك عليها ويوفقك
فى طريقه كمان بعد اذن استاذ خالد اعتقد انها اكثر دقه
انت الأول تروح مفول العربيه و تصفر عداد الرحلات و عيش حياتك لأخر التفويله و بعدين روح بنزن تانى ,, وشوف انت حطيت كام لتر بنزين و بص فى عداد الرحلات
فرضا انت لقيت انك حطيت 20 لتر ,, و بصيت فى العداد لقيت نفسك ماشى 300 كيلو ,, اقسم 300 على 20 يطلعلك اللتر بيعمل معاك كام كيلو ,, طبعا فى الحاله دى 15 كيلو / اللتر
انا قريب عملت معدلات كويسه جدا وصلت ل 16.4 كيلو فى اللتر وده كان اعلى حاجه جبتها ,, و كمتوسط 13 14
ايه دة ناس حلوة منورة هنا نهاردة كل عام وانتم بخير عيدكم مبارك يا رجاله
وكلامكم فل الفل واصلي جداا
واد يا محنش واحشنى ...
شكررررررررررررا لكل الردود والاهتمام بس هتقال عليكم شوية طب لو حصل وكان في زيادة في استهلاك البنزين عند المعدل الطبيعي ايه اللي المفروض يتعمل يعني ابدا اشك في ايه في السيارة
عمى اللورد انت كمان واحشنى جدا والله و كل سنه و انت طيب معلش متأخره :(
ميمو باشا ابدأ اول حاجه شك فى رجلك !! ايوه مش بهزر طريقه السواقه نفسها عليها عامل كبير جدا فى استهلاك البنزين ,, الرجل التقيله ع الدواسه استهلاكها غير العاديه غير اللى بيحسس عليها
ييجى بعد كده حجات كتير .. نوع البنزين وجودته - الشكمان لو فيه مشاكل - فلتر الهوا لو بقاله فتره طويله ماتنضفش - اعتقد لو كهربه العربيه عاليه عن اللزوم برده ده بيسبب كده - الحرق ع النقلات - كتر الطلعات ( اللى هو تتحرك بالعربيه من السكون - عشان كده دايما فى البلد نتيجه للزحمه و كتر الوقوف و الحركه البنزين بيتاكل اسرع من الطريق ) - غير كده خد عندك حموله العربيه و شكل الطريق و اتجاه الرياح معاك فى المشى !! شكلنا كده غوطنا جامد !
قصر الكلام : عايزين استهلاك كويس للبنزين : بلاش فرك و امريكانى بلاش حرق تابع الصيانات و خليك حنين مع الدواسه
اتمنى اكون افدتك يا ميمو باشا و اهلا بيك منورنا :)
ايه ياعم كل ده كلامنا عربي علشان نفهم علي العموم انا بشكرك جدا بجد معلومات هامة علي العموم العربية لسه 2009 ومغير زيت وفلتر وبحط بنزين 92 بس المدام اللي بتركبها وبصراحة مش عارف استهلاك البنزين معها ازاي علشان كده سالت عن طريقة حساب البنزين علشان العربية ممكن تقعد في الجراج 3 او 4 ايام محدش يتسخدمها حتي الاستخدام بسيط جدا مشاوير بسيطة يعني المدرسة ومش كل يوم زيارة الاهل مثلا كل 10 ايام يعين استهلاك العربية خفيف جدا جدا جدا
ميمو باشااا شوف اذا مدام جديدة فى السواقه يبقى اساسي هيكون محمله ورجلها تقيله ع الدواسه ياباشاا تمام دة حاجه
حاجه تانى
بخصوص ركن العربيه المدة اللى بتقول عليها دي مش مستحبه نهائي للبطاريه وخصوصاا اننا دخلين ع الشتاء فالازم ع الاقل كل يومين لو مش هتمشي بيها تنزل تسخنها وهيا وقفه وتسبها لاكن فى الصيف عادي لان كدة كدة جو حر وزي ما شباب قالو لك بتعتمد ع المشاورير والثبات والحركه من الاخر الزحمه كتير والاشرات الوقفه دي هما اللى فيهم الشفه لسحب البنزين بكثرة
العفو ياميموباشا ,, و الحته اللى قالك عليها لوردنا مظبوطه جدا
هتبقى تحتاج تدورها كل فتره كده عشان البطاريه متنامش
على فكره انا افتكرت حاجه بمناسبه موضوع البطاريه ,, انا بعد ما جبت العربيه بفتره بسيطه عديت اكشف على ميه البطاريه وكانت محتاجه تتزود ,, لأن الركنه الكتير فى المعرض و الرطوبه تقريبا كانو اثرو عليها
ابقى حضرتك خلى المدام لو ينفع تعدى على اى حد بتاع بطاريات و تقوله يكشف على الميه و هو هيتعامل و مش هياخد اكتر من 5 جنيه ده لو شقلب البطاريه خلاها تقول بابا وماما حتى !!
و ممكن طول ما مفيش مشاكل فى الدواره و الحياه سليمه الموضوع ده ينفضله بس انا عملته من باب الأحتياط رغم ان مكانش فى مشاكل بالنسبالى بس اداء البطاريه اتحسن فعلا بعد تظبيط الميه
ملاحظه عابره حبيت بس اضيفها
تمام يا مححنش باشااا
فعلا لازم كل شهر ع الاقل تروح تعمل كشف ع الميه والديمنو عند اي حد بتاع بطاريات وكاوتش
ومش هكيمل كمان ال5 جنيه هههههههههه
والله ياشباب انتوا بتفتحوا عين الواحد علي حاجات هامة جدا زي حكاية الكشف علي البطارية طب بالمناسبة يعني البطارية اللي في الماروتي الزيرو جافة ولا لا وايه الفرق والمفروض تتغير كل اد ايه؟؟
ثانيا بالمرة يعني سؤال علي الماشي الكاوتش اللي في الماروتي الزيرو تيوبلس ولا عادي وايه برضه الفرق ؟؟؟
وشكرا