الموضوع: لماذا تهاجم السيارات الصيني؟؟؟

يا جماعه العربيات الصيني بقالها في السوق فترة قليله قوي علشان نحكم عليها حلوة و لا وحشة وبصراحه معظم الاخوة اللي اشتروها بيشتكوا من حجات مستحيل تطلع في عربيه جديدة و دة عن حوالي 5 اصدقاء اشتروها
وبصراحه برضة سوابق الصين مع الشرق الاوسط مش ولابد في حاجات كتير يعني قبل ماتنزل العربيات الكوري كانت المنتجات الكوري نازله قبليها والناس كلها بتشكر فيها
لكن الصين فاهمه سوق الشرق الاوسط كويس جداااااااااا و عارفين اننا بنبقي عايزين كل حاجة وبارخص الاسعار فهما بيوفروا دة كل الامكانيات و باقل الاسعار معادله صعبة جدا اشك اوي فيها لانها اكيد علي حساب الكفائة يعني الاسبيرانزا كنسبة و تناسب مع الاخوة اللي اشتروها و الاخوة اللي اشتكوا منها نسة كبيرة اوي علي عربيه لسة جديدة
موضوع الفتيس سمعت فيه شكاوي كتير جداااا
موضوع ان العربيه خفيفه دة انا شوفته بعيني لم ركبت مع جاري و شفت الباب خفيف اد ايه ة صاج العربيه ضعيف اد ايه واوحدة جارتي عملت حادثة تعتبر جامدة بس مش لدرجه ان التوكيل يقولها total lost يعني تصليحها من التلفيات يتكلف اكترمن 70% من تمنها
موضوع الشكمان اللي بيتخرم من اقل حاجة دة شوفته مرتين مع اتينين جيراني

دة غير استغلال التوكيل فعربيه المفروض انها فئة بسيطة في الخمسينات يعني اسعار صيانتها و قطع غيارها عاليه جدا
انا رأي ان الاخوة بتمهلوا شوية لما العربيه تثبت نفسها في السوق يعني ممكن تجيب عربيه بياعه (سهله البيع يعني ) تقعد بيها 4 او 5 سنين تكون الاسبيرانزا بانت علي حقيقتها ياما عربيه كويسة و فرصةحلوة و لا مقلب تاني للشعب الغلبان دة
علي فكرة انا مجربتش لعربيه علشان ادي راي قاطع فيها لكن دة من كلام حوالي 5 معاهم العريه و بيفكروا يبيعوها
اللي اقدر اقوله ان العربيه فعلا صاجها ضعيف جداااااااا

ممكن استفسار؟
الإخوة اللي كانوا في التسعينات بيقولولك :
إوعى الكوري - دي عربيات ورق - الهيونداي لأ - الدايو لأ - حد برضه يجيب كوري
دلوقتي الكوري بقى فرخة بكشك
والناس دي دلوقتي هية نفسها اللي راكبين الكوري وهما برضه اللي بيقولو نفس الكلام عن الصيني
والله العظيم احنا شعب غريب
بصو في المنتديات وفي اقسام المقارنات بين العربيات الاسبيرانزا والهيونداي الفيرنا مثلا
الناس تقولك لأ أصل الصيني مش أمان ومانجحش في اختبارات الأمان الأوروبية
طيب ماتكلمونا على معاملات الأمان اللي في الفيرنا ولا اللانوس ولا الماتريكس ولا الالنترا ولا ولا

الناس من كلامها تحسسك إنها عربيات قمة قمم الأمان
وانا شايف انها ماتفرقش كتير عن الاسبيرانزا

وبالنسبة للتوكيلات كلها أسعارها غالية

الفرق الواضح لحد دلوقت في صالح الكوري انتشار قطع الغيار
وانا شايف ان الاسبيرانزا دلوقت ابتدت قطع غيارها تنتشر بشكل كبير

وعلى فكرة أنا معايا اسبيرانزا a516 عاملة 20000 كيلو وزي الفل في السحب (وخلي بالكو وزن العربية فاضية 1290 كجم) عشان بس محدش يتكلم عن السحب والثبات بشهادة 2 من اصحابي معاهم فيرنا وماتريكس راااااااائع

المشاركة الأصلية كتبت بواسطة justs

يا عم بلاش بس الحمقه دي . اتقي الله في ايه ، هو انت شوفتني غلط في حد او ما شابه ... ايوة بقارنها بالفوانيس واللعب والكاسيتات والمراوح وكل الحجات الصيني اللي بتضرب بعد استخدامها بشوية وكلها حجات في منتهى السوء .. وازبل اللي بيصنعوه بيبعتوهولنا ..

في معظم المنتجات ( ما عدا السيارات حتى الآن ) ، الصين لها عدة مستويات للجودة ما يصلك هنا منها هو اقل مستوى ، بالنسبة للمركات العاملية زي توشيبا ونوكيا وغيرهم لما يعملوا مصنع لتجميع منتجاتهم في الصين لتوفير اليدي العاملة فده بيكون تحت اشرافهم وده موضوع تاني ، لكن الصين عموما لم تنتج سيارة صينية تستحق حتى كلمة سيارة .. وكلها عربيات زبالة فيها شوية شخاليل وزمامير بيسموها كماليات واصلا بتضرب بعد الاستخدام بايام او اسابيع وبيضحكوا بيها على الناس اللي بتهيص بالحجات دي واللي عاوزين يركبوا عربيت فيها كل حاجة وعشان امكانياتهم مش سامحة فيروحوا يشتروا عربية فيها الكماليات دي وبسعر قليل اسمها عربيات صيني ، والأفضل انهم يستغنوا عن الكماليات دي في مقابل الأساسيات ويشتروا حاجة محترمة بنفس السعر ولكن اقل في الكماليات .. لكن شعبنا اسهل سعب يتروق ويجري ورا شكل او كماليات ..

وحتى لو الصين وصلت لمستوى جودة معقول وعربياتهم نزلت دول محترمة زي امريكا ، بردو هجيلك ازبل مستوى منها بناءا على رغبة المستوردين اللي هيبعولك المنتج بنفس سعره بره او اغلى وفرق رهيب في الجودة والفرق في كرشهم .. يعني الصين عمرها ما كانت ولا هتكون الدولة اللي منتجهم الواحد يشتريه ثقه وهو عارف انه زيه زي بره .. واينعم حجات كتير بقت صيني وبنشتريها عشان مفيش بديل ليها .. لكن لحد العربيات مينفعش لأن دي مخاطرة بالأرواح ومبالغ كبيرة بتروح في الأرض.

مخاطرة بالأرواح وشخاليل
ايه ياراجل ده

انت بتقارن الصيني بالمرسيدس والbmw ولا ايه

هاتلي اي عربية كوري او ماليزي أو من اي بلد في نفس فئة الاسبيرانزا أو البريليانس تكون أأمن

اتفرج على حوادث الهيونداي والدايو الشيفروليه وقوللي ايه رأيك

بسم اللة الرحمن الرحيم
الحمد للة العربية a 516 معايا من سنة و 8 شهور الحمد للة كويسة جدا الصاج اجمد من اى سيارة فى الفئة المماثلة سحبها كويس فى السفر ثبات كويس جدا العربية لحد دلوقت عملت بيها 80000 كيلو عيبها الوحيد من وجهة نظرى التوكيل و الصيانة بة