منذ حوالى ثلاث أسابيع كنت فى كارفور اسكندرية و بعدين و أنا خارج منه للطريق الصحراوى و بعدين الـ u-turn تمهيداً للعودة الى الكورنيش فوجئت بعد الـ u-turn بحوالى 10 متر براجل شكله بسيط و لابس جلابية و قاعد على رصيف الجزيرة الوسطى و حاطط ايده على خده ناظراً فى الأرض ... و على الأرض كرتونتين بيض مدشدشين و صفار البيض يملأ الأرض ... كان الوقت ليلاً و المنظر مايبانش أو يتضح الا لما تقرب منه ... أنا بدأت أستوعب الموقف دة بس بعد ما كنت مشيت لقدام مسافة كبيرة ... و فكرت أرجعله و أشوف ايه الموضوع لكن كان الـ u-turn الموجود أمام داون تاون قد مر بالفعل ... و ظللت أصارع نفسى لمدة طويلة فى ضرورة الرجوع اليه و ظللت أتذكر حديث رسول الله (ص) عن أن من فرج عن مسلم كربة من كربات الدنيا فرج الله عنه كربة من كربات يوم القيامة و حديثه عن أن الله فى عون المرء ما دام المرء فى عون أخيه ... و لكن كان المكان قد ابتعد كثيراً و فى الآخر قلت خلاص بقى العودة صعبة جداً ... و الحقيقة ظللت أعانى تأنيب الضمير طوال اليوم التالى ....

امبارح بالليل كنت فى كارفور مرة أخرى و سلكت نفس طريق العودة المعتاد ... و بعد الـ u-turn و فى نفس المكان بالضبط و بالمللى ... كان نفس الرجل يجلس على نفس الرصيف و كانت كرتونتى البيض المدشدشتين على الأرض و صفار البيض يملأ نفس المكان ...

بس خلاص ... لا أجد أى تعليق أضيفه على الموقف!!