فى رأى أعضاء المنتدى و من تجربتهم
ما هى المدينة المصرية الأكثر إحتراما للمرور ؟
1- القاهرة
2- الأسكندرية
3- الإسماعيلية
4- بورسعيد
5- السويس
6- أسيوط
7- الأقصر
8- المنصورة
9-طنطا
10- أخرى
عرض للطباعة
فى رأى أعضاء المنتدى و من تجربتهم
ما هى المدينة المصرية الأكثر إحتراما للمرور ؟
1- القاهرة
2- الأسكندرية
3- الإسماعيلية
4- بورسعيد
5- السويس
6- أسيوط
7- الأقصر
8- المنصورة
9-طنطا
10- أخرى
المفروض كنت تحط الجيزه معاهم:10D5C8~1107:
فى الطرااااااااااااااااااااا ااااااااااااااااااااااااا اااااوه:B4_592:
ميعرفوش يعنى ايه اشارات اساسا
هجامين مش سواقين (انا بتكلم على الميكروباصات ونص الملاكى علشان متزعلوش:wink:)
عن تجربتى المحدودة... الاسماعيلية...السويس
المدينة الوحيدة اللي بحس إن فيها مرور شوية .. مرسي مطروح .. رغم إنها في الصيف الناس بتبقي فوق بعض .
طبعاَ القاهرة و إسكندرية مينفعش يتقال إن الناس بتسوق فيهم أصلاَ .. الباقي مجربتش أسوق فيهم .
اسكندرية المفروض تتشال من القائمة !!!!
هو طبعا بحكم انها مدن صغيرة الحجم مقارنة بالقاهرة و الإسكندرية و الجيزة هتلاقي مدن زي بورسعيد و السويس و اسماعيلية و مرسي مطروح و سيناء و مدن الصعيد زي الأقصر الغردقة يمكن مافيهاش مشاكل مرورية زي القاهرة و دا مش عشان الناس بتحترم قانون المرور لكن عشان العدد اقل بكثير من القاهرة فالدنيا ماشية
و يمكن الأقصر زيادة شوية عشان كم الأمن الي بيها عشان تأمين السياحة
دي وجهة نظر ممكن تكون صح و جائز ان تكون خطأ
طبعا الاسماعيلية
اشارات و نظام و ناس محترمة واللي مساعدهم ان البلد محدودة و ملمومة
و كذلك بورسعيد نفس الشيء اشارات و كأنك طلعت بره مصر
طبعا القاهرة والجيزة و اسكندرية و المنصورة و الكلام ده لا يقارنوا و عيب علينا اننا نعتبر فيهم مرور أصلا
انا ماروحتش غير السويس زمان & واسكندرية طبعا على طول
برضة بزرميط بس ارحم بكتييييييييير من القاهرة وبحس انهم منظمين عالأقل في اسكندرية لما تدي اشارة بنسبة 90 % هتلاقي اللي وراك احترم اشارتك والتقاطعات
بس على طول الواحد بيفوق من الوهم !!!! كلنا مصريييييييين ( فهلوة وجدعنة وشهامة وكله عايز يلحق )
مفيش و لا مدينة في مصر بتحترم القانون
أنا بأسوق في بورسعيد ..... الأسماعيلية ...... السويس ......... و سيناء
هي الدنيا ماشية علشان مفيش زحام زي القاهرة ..... إنما أحترام .......لا لا لا لا لا لا لا لا لا ........
أحنا منعرفش يعني أيه نظام في مصر ............. كله بطيخ بطيخ ....................
طبعا القاهرة و الجيزة و الأسكندرية و المدن الزحمة .............. زبالة الزبالة بتبان أكتر من أي مدنية تانية علشان الزحام ...... مش علشان بقية المدن محترمة ........
و تحيا ج ع ع
العجل فى بطن امه :vctry:
مصر كلها بتحترم المرور
طبعا
متستغربوش
ايوة
مصر كلها بتحترم المرور
فقط عندما يكون ظابط المرور واقف او فى كمين او رادار
تلاقى كل عربية التزمت بالقانون
احترام القواعد المرورية ثقافة ووعي وروح جماعية وسعة صدر وتركيز فلو في حاجة من دي متوفرة يبقى في محافظات بتحترم المرور أكثر من غيرها
الواقع إن في محافظات ومدن أقل كثافة وازدحاما من غيرها فممكن تحس فيها براحة أكبر في السواقة، إنما مسألة التزام فلأ طبعا
مطروووووووووووح طبعا
عمري ماشفت في حياتي سواق تاكسي يبقي مركب زيون و الزبون مستعجل و الساعه 2 صباحا و الشارع مفيهوش عربيه واحده و يقف في الاشاره مع انها لا بكاميرا و لا دياولو
انا كنت هعيط ساعتها
الأقصر
أولاً: مدينة مش زحمة
ثانياً: علشان السياحة و شكلها يبقى حلو
دي حتى الحنطور بيقف في الإشارة من غير عسكري
الوادي الجديد عن تجربة بس مش موجوده فلخيارات
بورسعيد لذيذة .. والسويس هادية بردوو
بس ياريت المنصورة تتشاال من القائمة!!
علشان الحنطور فى الاقصر بيرخص نمر واخر حاجة سمعتها ان نمر الحنطور وصلت 25 الف جنية دة تمن النمرة لانة بينزل فى برنامج بعض الافواج السياحية زى ال insight & trafalgar وغيرة وبالتالى بيرخصولهم نمر انا شغلى فى الاقصر وتقريبا مقيم هناك وشايف ان الاقصر كويسة فى احترام المرور ودة مش بسب التشدد الامنى بالعكس مفيش كماين كتير ابدا فى الاقصر ولكن بسب قلة ايوة قلة عدد السيارات دى حتى النمر لسة معدتش الاربع خانات هناك دى اكتر حاجة بينما فى طنطا مثلا عدينا السبع خانات .
وطبعا طنطا احترام المرور فيها زفت الزفت حتى مع صغر حجمها ولكن كترة العربيات عملت خنقة فظيعة .
شرم الشيخ بلا منازع هناك المرور مرور ..... ماعدا شوية السكرانين بتوع قبل الفجر بس بيتمسكو
بصراحة مش عارف اقول اية..
زي ما عضو قال.. لما يكون في عسكري او رادار كله بيلتزم
:( المنصورة بقت وحشة جداً جداً فعلاً ..:(اقتباس:
بس ياريت المنصورة تتشاال من القائمة!!
بورتو أبو عجوة..
انا بشوف شرم الشيخ أفضل
يمكن للتواجد الأمنى المكثف فيها
والقواعد الصارمه والطرق الجميله
ليه حضرتك دايما شايف ان البلد زباله وشويه همج ومفيش حد فى الدنيا فاهم حاجه , على اعتبار ان البلد دى حد تانى ساكن فى الشقه اللى جنبنا !!!!
على فكره الاسلوب ده للأسف منفر وبيضايقنى شخصيا مع احترامى ليك , قد يكون دايما بيقابلك مواقف تضايق بس ده لا يدعو دايما لمهاجمه باقى خلق الله فى ناس كتير جدا بتمشى بالتزام تام الا فى حاله تعرضه للخطر بيضطر يغير اسلوبه وده بيكون غصب عنه
على العموم انا متربى فى الاسماعيليه والسواقين هناك عارفين كويس قواعد المرور والالتزام حتى الساعه 4 الفجر فى الاشاره لما تكون الدنيا ميفهاش بنى ادم وتلاقى الناس واقفه ملتزمه , ولما يكون فى اشاره واقفه وتلاقى الحاره اليمين فاضيه علشان اللى داخل يمين , ولما تشغل اشاره فى حاره واللى جنبك يستناك على طول علشان تدخل وغيره وغيره
بالطبع فى قله مش ملتزمه بس دى موجوده فى اكتر بلاد العالم تحضرا يعنى لو احنا شايفين ان الغرب ( البالونه الاعلاميه المنفوخه على الفاضى ) ملتزمين
تحياتى
الاسماعليه احسن مرور فى مصر
بسم الله الرحمن الرحيم
الاجابه لندن
المنيا الاشارات اللي فيها كهربائية يعني مفيش عساكر مرور ولا غيره وتلاقي الناس ملتزمين بالاشارات فعلا
مش عارفه بقه اذا كان في كاميرات ولا لأ بس غالبا لا
يمكن اسماعليه عشان مدينه صغيره
وكمان الغردقه
الاسماعليه احسن مرور
العريش / السويس / الاسماعيلية / بورسعيد
من حكم تجربتى للمدن الاتية :
1 - القاهرة
2- الأسكنرية
3-الإسماعيلية
4- السويس
5- بورسعيد
6- المنصورة
أفضلهم على الإطلاق
الإسماعيلية
و أسوائهم
القاهرة و المنصورة
بصراحة أنا ممتنع عن التصويت لصالح أي مدينة أو محافظة مصرية بأعتبار أن النتيجة :
لم ينجح أحد
امبارح سائق ميكروباص اخضر ( من بتوع الشركات ) .
كسر الاشارة فى مصر الجديدة و كان هيتسبب فى حوادث و عادى جدا و لا حد كلمه خالص .
حتة زيادة ازاى عندة ست صوابع مثلا ولا عندة تلات عيون دة مش مبرر للسب والقذف اللى احنا بنشوفة فى كل موضوع يشارك فية وفى رمضان كمان هو فى اية ولا الحكاية شتيمة * شتيمة وخلاص مكنش حد غلب كان كلة شتم وخلاص ولو بالشتيمة كنا بقينا احسن بلد فى الكون من اللى الواحد بيسمعة فى الشارع بس كمان شتايم فى المنتدى لا كدة اوفر وفوق الاحتمال دى بقت حاجة تقرف وبعدين هو يصح الواحد يشتم بلد ومدن كاملة هو اية شغال فى الاحصاء والسكان واتعامل مع المواطنين كلهم اذا كان الرسول بيقول الخير فى وفى امتى الى يوم الدين ولا سى توتو مش عاجبة كلام الرسول برضوة يمكن يكون لية راى تانى
اما حضرتك لو شايفها زبالة فارض اللة واسعة فتقدر تهاجر فيها او تقدر تبدا بنفسك او علشان تكون ايجابى انت وهو ممكن تدعو لحملة ايجابية لاحترام قوانيين المرور اواقل حاجة يا اخى تدعوا بصلاح حال الامة مش سبها وخلاص
الرسول قال (من راى منكم منكرا فليغيرة بيدة فان لم يستطع فبلسانة وان لم يستطع فبقلبة وذللك اضعف الايمان )والمفقصود بلسانة بالنصح مش الشتيمة والسب لان على فكرة شتيمة شعب كامل تعتبر غيبة ونميمة وكفارتها هو التصالح من ال 80 مليون واحد واحد
وفى حديث اخر انصر اخاك ظالما او مظلوما قال انصرة مظلوما فكيف ظالم قال تنصحة وتدلة على الخير والصواب )
مش تسبة وتشتمة وتجعلة موضع سخرية
هو دة خلق المسلم وخصوصا فى شهر فضيل زى دة .
لقد حصلت على "تحذير" لشخصنة الحوار
و مخالفة قواعد المنتدى
مشرف عام .4
مرسى مطروح بجداره والله فى عز الظهلر انا لسه جاى من هناك قبل رمضان بيوم والميكروباص والملاكى واقفين فى الاشاره والدنيا قدامهم فاضيه واحد بيقوله ادخل يا اسطى الطريق فاضى قالله الكلام ده عند الناس المتخلفه اللى مبتحترمش النظام ولاموأخذه يا باش فى الكلمه قصدوا عندكو فى مصر وسلملى على البتنجان ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
هو انا ليا رد صغير بس لعدم خروج الموضوع عن مساره , كل الناس حاسه بالبلد , ان الواحد بقا يقف فى ركن ويفضل يشاور على باقى البلد انها غلط وهو مش واخد باله انه من البلد دى ومع ذلك لسه قاعد فيها ومن غير ما يحاول انه يغير حتى لو فشل اسمه عاجز , قمه العجز بقا انه يشتم فى البلد , وان كان اللى بيشتم زعلان من باقى الشعب , فهو جزء لا يتجزء من الهمجيه و لا ينتمى للحضاره اللى بيتكلم عنها طول الوقت بأى شكل واكبر دليل على كدا انه بيشتم البلد عاطل فى باطل ومبحاولش يغير زى ما الحضاره اللى بنتكلم عنها ما بتقول
بلدنا الزباله فيها كتير حلو والغرب الزباله بهت علينا للأسف فى كتير وحش , مش عارف امتى هنبطل عقده الخواجه اللى بقا شكلها يقرف دى