الموضوع: موقف شفته امبارح

السلام عليكم ورحمة الله

امبارح وانا داخل القاهرة قبل الفطار من شبرا
لقيت افيو جاية مستعجلة وراه الديوان تقريبا وعدى قدامي وعند المؤسسة كده ناس كتير بتعدي
خبط واحدة طيبرها قدامه كذا متر

مش عاوز اقولكوا عالمنظر ربنا ما يكتبها على حد
البنت في لحظات مش ثواني كانت جايبة كمية دم كبيرة جدا منين الله اعلم كلها دم
الراجل نزل وطلع قدام كذه متر يعني خبطها وطيرها قدام شوية
طبعا اكبر غلط اللى معاها قاعدين يصوتوا صويت خرم ودانا
غلط اوى عشان ممكن يوهموها وممكن تموت من الخضة والله
انا وقفت جنب الافيو وشالوها وحطوها في العربية وهي معدية من جنبي كانت قاعدة تبص لى كده وهي مبرقة جااااامد
تقريبا اعصابها تعبت وعنيها فاضلة مبرقة وماشية معاهم ومسندنها والضربة جاية في سنانها طالعة
بس الناس كانت بتتصرف تصرف صح ركبوها مع الراجل وطلعوا على المستشفى جري
مش خناقات بقى ويمسكوا في اللى خبطها ويضيعوا وقت


انا عاوز اطلع من الموضوع ده بـــــــ سؤال واحد
ليه يا جماعة انتو متصربعين اوى كده؟؟؟
بحس ان الناس قبل الفطار بيتسابقوا
وبعدين انا كنت ماشي بسرعة والله
يعني داخل عالمؤسسة وماشي على 80 مستعجل برده وده غلط وده جاى يقلب نور وبيعدي ماشي كام 100 عالاقل
وفي الاخر خبط البنت
المفروض انا داخل حتة فيها زحمة وناس بتنتحر(بتعدى) يبقى اهدى
عموما بعد الموقف ده انا بعد كده في اي زحمة ههدي
وربـــــــــــنا يــــــستـــــر طـــــريقنا جميعا يارب
ويرجعنا كلنا سالمين غانمين
سواء ناس بتعدى ناس في العربية
ناس في مكان
والسلام عليكم

هو صحيح ممكن الست إللي إتخبطت تكون غللطانة وبتعدي الشارع بقفاها كمعظم الشعب المصري لكن ميمنعش إن بتاع الأفيو غلطان برضو ولازم يحسب أخطاء الغير وبستفزني أوي أوي موضوع العربيات إللي بتجري قبل الفطار طز في الفطار إللي حيموته ويموت الناس