المشاركة الأصلية كتبت بواسطة motorizer
حضرتك رغم إن الموضوع ده قتل بحثاَ و الإصلاح ييجي منين و إزاي بس هحاول أوصلك وجهة نظري .
حضرتك بتقول فيه ناس يا حرام إتولدت في المكان الغلط .. أيوة مزبوط .. و ناس كتير أوي إتولودوا في مصر غلط و كانوا بيعاملوهم في مصر معاملة -أسف- الكلاب .. و اما خرجوا برة و بقوا شئ مشرف رجعوا قالوا المصريين أهما و كل كلام الهجص ده .. مع إن في أرض الواقع مصر كانت السبب في هروبهم للخارج .
أهم مبادئ الإصلاح إن يكون فيه رغبة في الإصلاح .. حضرتك مثلاَ من طريقة سواقة الناس في الشارع .. إنت إستشفيت في أي يوم إن الناس نفسها تمشي في الشارع بنظام ؟ هتقولي انا و إنت .. إحنا حتي مش أقلية .. إحنا أفراد .. يعني ولا حاجة ! اما يحصلك حادث و يروحوا بيك المستشفي تلاقي موظف الإستقبال نايم و الدكتور مزوغ و الممرضات بيهبدوك عالترولي بدون أدني إحساس و قاعدين يهرجوا .. و اللي سببلك الحادث يهرب و محدش يعرف يجيبوا بل و ممكن الناس تقلبك في موبايلك و فلوسك .. ساعتها هيكون إحساسك إيه ؟ بالمناسبة دي تجربة شخصية لي يعني مش من خيالي !
الإصلاح لازم يبقي رغبة عامة .. و ده مش هيتحقق في مصر طول ما مفيش عدالة إجتماعية .. واحد زي سواق التاكسي هتيجي تقوله الإصلاح و النظام .. هو ميهموش .. هو يهمه يرجع لصاحب التاكسي بالوردية و لعياله بالأكل .. لازم تصلح المشكلة من جذورها و عشان تعمل كدة لازم يبقي في إيدك سلطة .. و مدام السلطة فاسدة يبقي مش هيحصل حاجة .
إنت بتقول شركة فورد و كذا و كذا .. دي كانت منظومة كاملة صالحة .. إنت لو عندك شركة فيها المدير فاسد و مجلس الإدارة فاسد و السكرتير فاسد و الموظفين فاسدين بس الفراش قرر إنه هيبقي كويس .. تفتكر ده هيأثر في حاجة !؟
الناس في مصر نوعين .. الحرامية الكبار اللي مش هاممهم حد المهم كرشه يزيد كام مليون كل يوم ... و نوع بيتمني يعيش مستور و خلاص و يروح لولاده باللي يسد جوعهم و ده كل اللي بيفكر فيه لا هيفكر في إصلاح ولا نظام .. بينهم طبقة متوسطة هتختفي قريباَ و دول فيه منهم اللي منجرف مع القطيع و منهم اللي نفسه يشوف البلد نضيفة شوية و مش عارف .
طول ما بينفع في مصر إنك تعمل اللي إنت عايزه و تتعدي علي حقوق غيرك و محدش يقدر يكلمك ولا يردك .. هتفضل بلد متخلفة عن الركب الحضاري مليون سنة ضوئية
إنت عايز تشتغل عشان نفسك تبقي حاجة .. اللي هيشتغلوا عندك و معاك دافعهم للشغل الإحتياج المادي فقط .. النجاح و الريادة و كل الكلام ده ولا يفرق معاه .. هو عايز يقدر يصرف علي مراته و سجايره تبقي في جيبه و معمر مزاجه! نص شباب مصر في كليات مبيحبهاش بس أهو اللي كان موجود و خلاص و بيطلعلنا كل سنة ملايين الشباب اللي لا يفقهوا البطيخ و ملهمش لازمة .. النظام نفسه غلط !
انا اتمنالك تبقي رائد الصناعة المصرية بس هيبقي إحساسك إيه لو معرفتش تطلع تراخيص لمصنعك عشان لو إشتغل هتقفل علي ناس كبار ؟! الإصلاح عايز قوة .. و القوة تيجي من رغبة شعبية .. و الشعب مشغول في أكل عيشه .