السلام عليكم
انا كنت عايز اضيف الموضوع "شفت بعينى......." بس شفت انى افتح موضوع جديد نظرا لأهميته

المرة دى انا باكتبلكم عن تجربة شخصية بعد ماتكتبلى عمر جديد وخرجت من اول حادثة لى من 15 سنة سليم والحمد لله.
الموضوع انى كنت فى رحلة صحراوية من بتوعى انا والعائلة وبعد ما خلصت وفى طريق العودة من طريق وادى الريان (اللى هو طريق زراعى ضيق وكله ملفات وماشى جنب ترعة) كنت ماشى على مهلى جدا بسبب انى كنت مهوى العجل علشان المشى فى الصحراء فالمفروض مازودش عن 80 لغاية مازوده.
المهم ان نا كنت ماشى اقل من كده كمان يعنى مثلا 60 وغالبا علشان كده ومن كتر الملل نمت لحظيا (مش عارف طبعا قد ايه) بس صحيت فجأة على نزول العربية من على الاسفلت وماشى فى التراب ولقيت عامود نور قدامى تماما مالحقتش اعمله اى حاجة.
طبعا دخلت فى العمود بس العربية ماكتفتش بكده . لأ خلعته من الأرض بقاعدته فغالبا خروج القاعدة رفع العربية من تحت ولقيت العربية من تحتى بتترفع وبتديها شقلباظ على جنبها وكملت الدورة دحرجة لغايه ماوقفت معدولة تانى.

الحمد الله طلعنا كلنا سالمين باستثناء بعض الخرابيش.
احب هنا اشير الى البطل حزام الأمان اللى لولاه ماعرفش ايه اللى كان ممكن يحصل (خاصة انى بعد الحادثة لميت كل الحاجات اللى كانت جوه العربية من على الأرض مكان مالعربية اتدحرجت)، لأن الاولاد كانوا ورا نايمين ولستر ربنا وعلى غير العاده رابطينه (لأنهم عادة بيفكوه لما بيناموا) انا دايما باحاول اخليهم يربطوه لما يركبوا بس طبعا الاطفال مش من السهل اقناعهم بحاجة زى دى.

طبعا السرعة الواطيه اللى كنت ماشى بيها حد من التوابع بس برضه ياريت كلكم تهتموا بموضوع الحزام ده وحتى مع اللى راكبين ورا وحاولوا مع اولادكم واحده واحدة لغاية مايتعودوا. ماحدش عارف ايه اللى ممكن يحصل حتى لو ماشى جوه البلد.

وربنا يكفينا ويكغيكم شر الطريق.

هاحاول ارفع بعض الصور للعربية بعدين