زارنا وفد صيني في المكتب !! قمة الأمانة و الأخلاق

**Hegazio** · 02-09-2009 02:40 PM

أخوكم صيدلي و يعمل مدير تسويق منتجات دوائية في شركة أدوية
و عرفت هذه القصة من خلال الدعاية لمنتجاتنا و شركتنا فكرة في عمل أقلام مكتوب عليها اسم الشركة
و لما كانت الكمية كبيرة و تكفي استهلاك عام .. فلجأنا للبحث عن جودة معقولة و سعر قليل .. فاتجهنا طبعا للصيــــــــــن
و طلبنا نوع البلاستيك كذا و السوسته كذا و اختارنا خامات متوسطة و قلنا نوفر في الأنبوبة اللي جوة و طلبنا أرخص واحدة
و أكدولنا ان ده أرخص حاجة عندهم و دفعنا مبلغ محترم
و بعد سنة باسأل أحد الزملاء في شركة تانية .. و إذا بصفقة أفضل و سعر أقل و بالذات في الأنبوبة
و من مين ؟؟ !! من نفس الشركة !!!
اتصلت بيهم و قلت لهم انتو حرامية و نصابين و مش حنتعامل معاكو تاني
فإذا بوفد من الصين ( مش كتير قوي يعني 3 ) بكل احترام .. خلاصة الحوار
.
حضرتك احنا شرفنا التعامل معكم سابقا و قد يكون هناك نصيب أو لا في التعامل بعد ذلك مش ده موضوعنا ..
إحنا هنا عشان نقوللك احنا مش نصابين .. الشركة اللي بتقول عليها طلبت انابيب أقلام أرخص من ذلك و هو غير متوفر عندنا فطلب من شركة أخت توريد انابيب مخصوصة فيها كمية حبر قليلة ( 30 صفحة ولا حاجة ) لينا و احنا نحطها جوة أقلامنا
أدي أقلامك .. و أدي أقلامه .. و اتفضل شوف فرق كمية الحبر .. و ده طلب الزبون
نحن تعودنا من بلادكم علي مستوردين يطلبون طلبات عجيبة .. تصل الي طلب بضاعة سليمة بس تخرب بعد استخدامين مش مهم .. و نحن في الوقت ذاته نصنع لأمريكا و أوربا بضاعة شبيهة تعمر سنوات طويلة .. و كلة بطلب الزبون و كلة بحسابة
سيدي .. رجاءا .. لا تعمم علي المنتجات الصينية .. ولا حتي علي نوعية من المنتجات .. و الأهم .. لا تصفنا بعدم الأمانة .. نحن قادرين علي عمل أي شيء .. طبقا لرغبة الزبون .. و لكن أبدا لا نكذب .. و إذا كان طلب الزبون يصل الي إيذاء الأرواح .. لا ننفذه
شكرا .. السلام عليكم

**hani945** · 02-09-2009 02:48 PM

الناس دى عارفه شغلها

**MoToRiZeR** · 02-09-2009 02:58 PM

الدمعة هتفر من عيني

علي فكرة انا مرة إشتريت أحد منتجات الصوت الصينية لشركة إسمها promate .. المهم بعد ما إشتريته كان فيه حاجة في الجهاز مش عارف أشغلها .. فا دورت علي موقع الشركة و دخلت عليه بعتلهم أسالهم إزاي أعمل كذا كذا .. و في طرق الرد كتبت إيميلي و مش عارف إيه خلاني أكتب الموبايل ! المهم الكلام ده كان الساعة 11 بالليل .. تاني يوم الساعة 1 الضهر .. لقيت مكتب الشركة في القاهرة بيكلمني بيقولي حضرتك بعت للشركة الأم تسألها عن حاجات و هما حولوا لنا الإيميل اما لقوك سايب نمرة الموبايل .. يا تري الجهاز جنب حضرتك ؟ قلتله أه ! قاللي حضرتك كان سؤالك كذا .. هو ده بيتعمل عن طريق كذا كذا .. حضرتك جربته ؟ قلتله أه أهوه إشتغل .. انا متشكر جداَ ! قاللي العفو حضرتك و دي نمرتي إسمي كذا كذا مدير خدمة العملاء لو عندك أي إستفسار تاني أو مشكلة كلمني مباشرة .

الحقيقة إتبسط جداَ من الموضوع ده و إزاي الشركة مهتمة بإدارتها و إن المكتب بتاعها في القاهرة يكون علي مستوي عالي و يكون بيقدم حاجة فعلاَ إسمها خدمة العملاء ! و ده خلاني أشتري حاجات تانية من منتجات الشركة و انا متطمن .

و ده عرفني ليه المثل اللي بيقول "لا تفتح متجر إذا كنت لا تعرف الإبتسام" ده مثل صيني ! ناس يبيعولك السمك في الميا !

انا كنت بحب الناس الصينيين اللي بييجوا يبيعوا بضاعة بين البيوت و يخبطوا عليك يعرضوا البضاعة كانوا ظراف جداَ و كانوا بيقنعوني أشتري مع إن العربي بتاعهم عامل حادثة ! .. عكس المندوبين المصريين -النصابين- اللي كانوا إنتشروا في مصر في التسعينات يقولك عندنا حضرتك أزايز شامبو ماركة كذا بسعر أقل من السوق .. و هي أزايز للشامبو اللي بيتجيبوا و مالينها صابون سائل !