المشاركة الأصلية كتبت بواسطة NaderNabil
طب إسمعوا القصة اللي حصلت إمبارح...
كنت على طريق إسكندرية الصحراوي راجع للقاهرة....كنا لسه في بدايته عند الكيلو 170 تقريباً
و إذ فجأةً....3 عربيات أوبترا زيرو بالورق الأبيض...2 منهم كانوا بنمر تجارية و واحدة من غير...إثنين فضي و واحدة رمادي...معديين من جنبي طلقات...مع إني كنت ماشي تقريباً علي 120....و عينكم ما تشوف إلا النور..
كم الغرز الرهيبة اللي إتعملت...و شد و حرق....و المشي خارج حرم الطريق في الرمل لتخطي السيارات....مهزلة...
خطبتي كانت جنبي و أصحابي كانوا قاعدين ورا...باقولهم بصوا....العربيات دي المفروض رايحة تتسلم لناس زينا...و للأسف محدش في اللي دافعين فلوس العربيات دي يعرف إتعمل فيها إيه...كنت متنرفز جداً و مش عارف أعمل إيه...
طبعاً سبقوا بمسافة كبيرة و ماشوفتهومش لمدة 7 دقائق....
و فجأة...لاقيت تجمع ناس و عربيات راكنة علي الجنب...عربية أوبترا فضي (واحدة منهم) طلعت فوق الرصيف الأسمنتي في النص...و واقفة علي عجلة واحدة...الباقي كله في الهواء...و طبعاً بطن العربية متدمر و المقاصات و الجنوط في الجنينة...كان من الواضح من أثار الكاوتش على الأرض انها عومت و لفت منه لحد ما دخل في الرصيف
و طبعاً العربيتين التانين كانوا واقفين و شغالين إتصالات بالموبايل...
بالرغم من فرحتي انهم لاقوا جزائهم...لكني كنت حزين ان العربية دي هاتتصلح و تتباع إنها زيرو بعد كده...خصوصاً ان الخبطة في البطن يعني مش هاتبان...و الواحد عمره لما بيشتري زيرو بيبص علي بطن العربية :)