الموضوع: كل ما يخص مازدا 323 موديل 82 (اعطال.قطع غيار.كماليات)

المشاركة الأصلية كتبت بواسطة digitalstorm

السلام عليكم يا رجال المازدا , عيشوا معايا التجربة أنهاردة نزلت أجرب العربية اللي اشتريتها أول امبارح و حكيت لكم عليها
, المهم العربية دارت بعد رابع أو خامس مرة و بعد طلعت من غير ما أسخن علي طول
كنت رايح اغسلها و امون بنزين 92 المهم لقيت المحطة فيها ييجي 400 عربية عشان
بنزين 80 و السولار و ما عرفتش أدخل المحطة أغسل قلت يا واد ما علينا بعدين ,
و فجاة لقيت العربية ما بتسحبش إلا لو كاركت علي دواسة البنزين
تيجي العربية ساحبة ساحبة جامدة و طالعة علي الغيار زي الغول فشر البي إم
و شوية و تيجي فاصلة و مبطلة !!!!!!

المهم روحت لواحد صاحبي بيفهم في الميكانيكا قالي الكاربرتير بيعلق و ظبطهولي
و بعدين قالي أنا حاظبطلك التاكيهات علشان عالية و بعد ما فتح وش التاكيهات
قالي ده في مسمار اللي ماسك الشاكوش قصير ,
و بعد محاولات طويييييييييلة قالي نطلع علي الخراط نخرط الشاكوش و نجيب مسمار أطول
, المهم علشان ما أطولش عليكم بعد ما رجعنا و ركبنا الشاكوش و قفلنا وش التاكيهات تاني
لاقينا صوتهم عالي برضة قلتله فل كدة انهاردة و قلت في سري أوديها بقي لواحد ميكانيكي شاطر يظبطلي الدنيا و أنا جاي ماشي من عنده لقيت مفيش فرامل نهاااااائي خالص
و سامع صوت حكة كدة طالعة من ناحية الفردة الأمامي يمين ,
يا وااااااد مش مهم نبقي نروح للفراملجي يشوف الدنيا فيها ايه ,
و فجأة لقيت العربية بتبطل لوحدها أجي أدور ما تدروش نزلت أبص علي الكاربتير
ألاقيه مش واصله نقطة بنزين شكيت علي طول في طرمبة البنزين
قمت فاكك الخرطوم بتاعها لاقيتها شوية تجيب بنزين و شوية ما تجيبش
و السؤال هنا يا تري دي طرمبة بنزين و لا خرطوم التنك مسدود و لا ايييييييييه ؟؟
اه و علي فكرة أشتريت من الحي العاشر وش اشارة الفانوس الأمامي ب 10 جنيه
وسير الدينامو 975 الأيطالي ب 15 جنيه ,
طولت عليكم معلش لكن أنا مصمم أنقل أي تجربة خاصة بالعربية دي
و أي أسعار قطع غيار علشان أفيد للناس زي ما انا أستفدت من المنتدي كتير جدا قبل ما أشتري

هرد على هيئه نقاط لانى مش مركز وعايز انام
-متاخدهاش على ال 92 .. انا كنت زيك اول ماجيبتها ودلوقتى بكرعها 80 وزى الفل اينعم هتكركر شويه بس عادى هتمشى معاك زى الجزمه بعد كده
انت اولى بالفرق

-شوف الفرامل اهم حاجه دلوقتى دى مفيهاش هزار
ومن وصفك ممكن تكون ماسوره فرامل بتسرب .. ابقى افتح علبه زيت الفرامل وشوف فيه زيت ولا لا ولو مفيش امشى بالراحه خالص لحد ماتوصل للفرملجى
حصلت مره معايا وكان الجنط غرقان زيت من جوه بسبب الماسوره كانت مكسوره

-دوران العربيه من خامس مره عادى فى الجو ده ولازم تسخن العربيه قبل ماتمشى اول مشوار فى اليوم حتى لو 3 دقايق -لضمان انتشار الزيت فى كل الموتور- علشان ماتسلخش البساتم على المدى البعيد

-سعر وش الفانوس والسير تمام

-بالنسبه للصوت العالى :حاسس ان واير السرعه -بين الدواسه للكربراتير-عندك عايز يتيغر او مش متثبت كويس وياريت تريح صاحبك وماتخليهوش يلعب فيها بعد كده

ومنتظرين تجاربك معانا