كل ما يخص مازدا 323 موديل 82 (اعطال.قطع غيار.كماليات)

**basslover** · 31-08-2012 04:51 AM

هل يمكن تعديل التبلوة الخاص بمزدا 323 موديل 1982 لتبلوة احدث ?

**basslover** · 01-09-2012 09:48 PM

و عربيتى لونها طوبى و هرشها قريب ان شاء الله ف لو رشيتها احمر عادى هتفرق فى البيع بعد كده ولا لا ؟؟

**مستر العوضى** · 02-09-2012 12:53 PM

ريش المسحات مش لاقيهم خالص

اجيبهم منين

وكمان عاوز جلد الابواب..........هل فية طقم ولا اشترى بالمتر انا سالت قالولى بتاخد 14 متر لل 4 ابواب والمتر ب 5 جنيهات

ارجو الافادة
جزيل الشكر

**mado83** · 02-09-2012 01:07 PM

المشاركة الأصلية كتبت بواسطة مستر العوضى

ريش المسحات مش لاقيهم خالص

اجيبهم منين
عند اى حد بتاع اكسسوارات

وكمان عاوز جلد الابواب..........هل فية طقم ولا اشترى بالمتر انا سالت قالولى بتاخد 14 متر لل 4 ابواب والمتر ب 5 جنيهات
بالظبط الباب 3.5 متر ولو لقيت بتوعها الاستيراد يكون افضل

ارجو الافادة
جزيل الشكر

**basslover** · 02-09-2012 09:13 PM

بجد مكنتش متوقع كده منكم مستنى حد يرد عليا و قولت يمكن محدش دخل بس الاقى حد كاتب بعديها و يتجاهل سؤالى ف بجد الف شكر للناس اللى هنا و انا اسف انى كتبت هنا حاجه

**mazagngi2010** · 02-09-2012 10:43 PM

المشاركة الأصلية كتبت بواسطة basslover

عموما انا مازداوى بقالى حوالى سنه و بعشق حاجه اسمها مازدا بس عزيزه مش راضيه عنى بقالها فتره و بقالى كام يوم ببص على المشاركات القديمه و قولت اعرفكم بنفسى و حكايتى مع عزيزه

انا شاريها ب 16 بس كان ساعتها قلق و انا عارف صاحبها ف اشتريتها مع ان فيها شغل كتير و جالى فيها من اسبوعين

هى 323 مو 82 موتور 1300 سى سى 4 غيار فابيركا دواخل و راشه بره

غيرت حاجات كتير علبه دركسيون - حوز مساعدين و سوست امامى - شدادات و جلب - كبالن - كاوتشين امامى جداد و خلفى استيراد و جنوط 14 المانى و عده صوت كاسيت و سماعات و جى ام و صب المهم دلعتها على اد ما اقدر و العربيه الصراحه كنت بشد مع عربيات جديده و مبتكسفنيش و صوتها كان جميل و هادى

المهم بعد فتره سهران مع صحابى و مشغل الاغانى عالى و راجعين من المقطم الصبح جيبت التالت و مشيت عليه كتير و مكنتش واخد بالى ف جابت موتور و دخلت فى عمره كامله كلفتنى 3000 تقريبا الكلام ده من حوالى 7 شهور و مكانش عاجبنى الموتور و شديت مع الراجل لانه الموتور صوته عالى و ضايع و مش زى الاول يعنى انا بروح المعهد فى المقطم و بطلع عليه جرى دلوقتى بقيت احسن ولا كانها سيات

الموتور صوته على جدا ولا كانها لادا ادائها معقول و بتجرى بس السحب مش زى الاول خالص غير مفتاح النور بايظ و لسه جايب بطاريه ادلر الالمانيه 70 امبير ب 200 جنيه من الاميريه و لسه محتاجه دراع نور و عداد عشان السرعه عندى بيهيس الضعف و محتاج فردتين كاوتش و 2 مساعد امامى و سمكره و دوكو بسبب انى كل ما انزل الاقيها مخبوطه و بدور على كسوه عشان فيها لسه الفرش الاصلى

و عايز اقولكم انى اول جيبتها من مدينه نصر ل عين شمس و اكتشفت ان مفيهاش ولا نقطه مياه ولا زيت

قدر الله ماشاء فعل كنت تجيب موتور استيراد احسن
جرب تركب مازدا 1500 مظبوطه واحكم على موتورها

المشاركة الأصلية كتبت بواسطة basslover

المهم انا ناوى انى اغير الموتور لانى بتاع جرى و كده ف هغير الموتور بس عايز اجيب حاجه مازدا حديث شويه ف مش عارف مازدا ايه يركب عندى ؟

التابلوه عندى فيه حفر ف كنت عايز اعرف لو ينفع يتلصق عليها الكاربون اللى بيتلصق على البودى ؟

عايز اعرف عداد ار بى ام يعمل كام ؟

و عايز اقول حاجتين العمره ده موضوع فاشل و تعليه العربيه برضه حوار فاشل :]

مادو يفيدك فى حوار التابلوه
انا كنت جايب عداد ب rpm ب 250 وشغال زى الفل لحد دلوقتى
بس ياريت تجيب اللى تدريجه الاساسي بالكيلو مش بالميل
كان قشطه الميكانيكى جايبهولى
تعليه العربيه افتكاسه فعلا
انا مغير السوست اللى ورا لسوست فيات 124 ناشفه ومقصوص منها حلقه والعربيه زلطه على الطريق بس ناشفه للاسف ثبات على حساب الراحه

المشاركة الأصلية كتبت بواسطة basslover

هل يمكن تعديل التبلوة الخاص بمزدا 323 موديل 1982 لتبلوة احدث ?

شكلك متعقد من التابلوه قوى
مش هعرف افيدك فى النقطه دى

المشاركة الأصلية كتبت بواسطة basslover

و عربيتى لونها طوبى و هرشها قريب ان شاء الله ف لو رشيتها احمر عادى هتفرق فى البيع بعد كده ولا لا ؟؟

المهم الدواخل تغيير لون العربيه مايعيبهاش بس تقول ايه فى السوق المعفن بتاعنا
عربيتى بيج اصلا ومن بره واخده لون اسود

**fathyalazhary** · 03-09-2012 06:39 PM

عندى كام اسئلة

1- المروحة بتاعت الرداتير وقفت و روحت للكهربائى قالى العيب فى الثرموستات و شالى سوتش و المروحة اشتغلت ,, السوال بقة دة السوتش بتاع الثرموستات

2- فلتر البنزين دة محتاج يتغير ؟؟

3- العربية بتترخ جامد و روحت للميكانكى قبل كدة قالى العيب فى البوجيهات و غيرتها ب ngk و بقت كويسة
عدى 3 اسابيع و الرجة رحعت تانى قالى نغير البوجيهات المرة دى بسن قصير انجليزى و غيرتها و دلوقتى كويسة
البوجيهات دية قرفتنى كل شوية بتبوظ اية السبب ؟؟

4- فلتر الهواء فية منة كورى و صينى اجيب انهو ؟؟

**mado83** · 04-09-2012 09:45 AM

المشاركة الأصلية كتبت بواسطة fathyalazhary

عندى كام اسئلة

1- المروحة بتاعت الرداتير وقفت و روحت للكهربائى قالى العيب فى الثرموستات و شالى سوتش و المروحة اشتغلت ,, السوال بقة دة السوتش بتاع الثرموستات

فعلا الترموستات بتبوظ بسرعه يعنى كل 4 او 5 شهور تقريبا

2- فلتر البنزين دة محتاج يتغير ؟؟
فلتر البنزين غيره كل شهر احسن تجيب ابو 5ج الشفاف

3- العربية بتترخ جامد و روحت للميكانكى قبل كدة قالى العيب فى البوجيهات و غيرتها ب ngk و بقت كويسة
عدى 3 اسابيع و الرجة رحعت تانى قالى نغير البوجيهات المرة دى بسن قصير انجليزى و غيرتها و دلوقتى كويسة
البوجيهات دية قرفتنى كل شوية بتبوظ اية السبب ؟؟
لو العربيه بتترج جامد يا اما من قواعد الماتور يا اما ظبط كهربا (ابلاتين وكوندنسر) مش اكتر ومش شرط تكون من البوجيهات قولى السحب عامل ايه والمشى والدواره الصبح بتتأخر ولا لا

4- فلتر الهواء فية منة كورى و صينى اجيب انهو ؟؟

كورى ب25ج كويس وهتغيره كل 8000 كيلو

**emad6610** · 04-09-2012 03:47 PM

مشكلة دراع النور
عندي الدراع ملمس و كل كام يوم لازم انزل الاقي البطارية نايمة
حاولت مع كهربائي و اتنين يشتغل الدراع شهر او اتنين و يرجع تاني يقرفني
تنصحوني بايه استيراد جديد و لا احاول مع حد تاني صعبان عليا اللي فيها لانه الاصلي بتاعها