اصحابي عاوزين ياجروا عربية وانا اللي اسوقها واجبها على رخصتي وكنت عاوز اعرف لو في مشكلة حصلت في العربية لاقدر انا هشيل حاجة ولا ايه بالظبط
اصحابي عاوزين ياجروا عربية وانا اللي اسوقها واجبها على رخصتي وكنت عاوز اعرف لو في مشكلة حصلت في العربية لاقدر انا هشيل حاجة ولا ايه بالظبط
هتجيب نفسك لوجع دماغ على الفاضى...... لو حصلها خربوش بسيط وعايز يرخم عليك هيقولك صلحالى لا وفى التوكيل كمان ........ولو كلة تمام وحصل خير والعربية مفهاش اى اضرار وسلمتها واتبسط بيها ودة مستحيل لان فى شوارعنا بتتخبط وهيا واقفة هتلاقيك كل شوية عايز تاجر تانى ورجليك مالت لسكة التاجير وكل شوية تجرب نوع شكل بصراحة الحكاية مغرية بس انا اخاف ااجر عربية اكتر من تلت ايام .......ومتناش انهم بيمضوك على وصولات بحق العربية وبلاوى يعنى لازم كمان يكون ليك معرفة بصاحب المكتب وواثق فية..........
لو خلاص هتعمل كدا يبقى محدش يلمس دركسيون العربية غيرك أنت عشان ميحصلش حاجة و الى كان السبب يخلع منك
و فعلا أى حاجة بيتلكك و غالبا العربية بيبقى فيها حاجة فلازم تبص عليها كويس جدا أكينك هتشتريها
ايوه على رخصتك يبقى بياناتك انت واللى مضى عند الراجل , وساعه الهزار بيبقى كله اصحاب
اول ما تقلب بنكد بتلاقى كل واحد بيقول يلا نفسى ومليش فيه وكلام من دا , وزى ما قالك استاذ احمد رجلك لو خدت على الايجار مش هتعرف تبطله
انتو عايزين تتأجروا ولا تشتروا عربيه تأجروها ؟!!
عموما في الحالتين وجع دماغ ومسؤولية عليك وانت اللي هتتحملها كلها وزي مالاخوة قالوا ساعة الجد كله يلا نفسي
بجد يا جماعه يا ريتني سمعت الكلمتين دول من شهر واحد بس
إياكم وتأجير العربيات
اجرت عربيه لانسر وكتبت على نفسي وصل بتمن العربيه وفعلا ساعة الهزار كان كله اصحاب وعادي يا عم انت خايف من ايه ؟ ان شاء الله مايحصلش حاجه وكله يعدي تمام ...
فعلا كله عدى تمام لغاية قبل ما اسلم العربيه بنص ساعه !!! واحد معرفه كان معانا ( كنا في فرح ) هو مش صاحبي ... المهم قالي عايز اجرب العربيه ... وطبعا كانت اكبر غلطه عملتها ... خد العربيه مفيش دقيقتين وخبطها في حيطه
الخساير : اكصدام وفانوس خلفي وخبطه في الرفرف
رجعنا بيها عالمكتب الوضع طبعا اتغير تماما ... بقيت حاسس اني متهم وهدخل الحبس خلاص ... المعامله بقت يا تدفع حق قطع غيار اصلي يا تتحبس ... وطبعا صاحبنا في الاول قال هشيلها انا ... لما عرف ان موقفي صعب طبعا قالي النص بالنص ... وخليته كتب وصل على نفسه لكن هو اصلا ماكملش 21 سنه وطبعا ولا حس ولا خبر ولا خدت منه جنيه واحد
اهي برضو جت في 2000 جنيه الحمدلله يعني تخيل لو جت في اكتر من كده ولقيت نفسك متدبس في 30 - 40 الف
يبقى ابعد عن الشر وغنيله وبلاااااااش ايجاار
الحمدلله يا سمارت ومحدش بيتعلم ببلاش
وموضوع الايجار دة مينفعش غير للي مزنوق فعلا
والي يمضي علي حاجة يكلبش فيها بإيده وسنانه مهما حصل .
انا مش عارف اقولكم ايه ربنا يكرمكم ويتقبل منكم صياكم
واحب اقول انا مش اجر عربيات ولا سايق ولا اي حاجة انا هفضل بال504 بتاعتي وخلاص
والعربية كانت هتروح فرح فعلا ستر ربنا وقولتولي
مادام معاك عرربية ايا كان نوعها فانت مش محتاج تأجر اللى يأجر المضطر ومعندوش
بس على فكرة احنا كنا لسة مأجرين افيو لمدة شهر ورجعناها وكله تمام والمكتب كان محترم جدا رجعلنا وصل الامانة بكل ادب واحترام مادامت عربيته سليمة
عشان بس ما نظلمش كل مكاتب التأجير