شهادة وفاه الشاهين

**sab3aawy** · 13-05-2007 04:09 PM

توضيح هام لاخونا وائل

انت مش واخد فى اعتبارك ان الشاهين دفع خلفى في حين ان ال405 والانو جر امامى

وبالتالى انت بتدفع ثمن المتانة المتناهية للشاهين من مساحة السيارة لان معروف ان سيارات الدفع الخلفى بتروح منها مساحة كبيرة فى مكان الجيربوكس وتانك البنزين وعمود الكردان

كل مكسب قصاده قيمة مدفوعة يا اخ وائل، صح وللا غلط

وبعدين هارجع واؤكد ان تصميم الشاهين قديم وليس غبى، ليه بؤكد، لأن الشاهين هى ال131 بنفس الأبعاد الدخلية، والتى لم يجرؤ احد فى عصرها على اتهامها بالغباء وكانت معشوقة اوروبا كلها ، ناهيك عن انها من اكثر سيارات فيات التى حققت سوقا ممتازة فى الولايات المتحدة. صحيح اننا نجد ان مساحة صالون ال128 الأصغر حجما مثلا هو نفس مساحة صالون ال 131 والشاهين، ولكن تانى افكرك ان دى جر امامى (يعنى باور ترين كله فى الكبوت الأمامى جارر وراه صندوق فاضى) والتانية دفع خلف(يعنى ميكانيكا موزعة على كل مساحة السيارة وواخدة من مساحتها)

فبالتالى فرق المساحة اللى انت متضايق من فقده هو نفسه ثمن المتانة اللى انا شايف انها اهم مميزات الشاهين

**وائل عطية** · 13-05-2007 04:09 PM

والله ياأخ هاني إحنا كنا أنهينا الموضوع
بس واضح إن الأخ اللي دخل بدون داعي ده لم يقرأ الموضوع إجمالاً
وإنما تدخل لمجرد إنه يقول أي حاجة والسلام !!!!

**وائل عطية** · 13-05-2007 04:26 PM

انت مش واخد فى اعتبارك ان الشاهين دفع خلفى في حين ان ال405 والانو جر امامى
[/quote]
والله الكلام ده عارفه كويس يا باشمهندس خالد
بس ياأخي أنا لم أُذنب حين أبديت تعليقاً على موديل لا يلقى هوى في نفسي
ياأخ سبعاوي
من بداية ركوبي سيارات امتلكت أربعة سيارات: اثنتان منهم يتوقيع فيات كانت الأولى 128 والثالثة سيينا 1600
يعني بحسبة بسيطة تجد إن 50% مما ركبت بتوقيع فيات، أي أنني أتحدث عن واقع وعن تجربة شخصية انتقدت من خلالها موديلاً واحداً وهو الشاهين اللي تعليقى الوحيد عليه كان في الحجم الهائل والأبعاد الكبير التي كان يجب أن يتوازى معها في نفس الاتجاه رحابة المقصورة
ثم إن الوصف كان مجازياً وشرحت لك ذلك مسبقاً فهناك تصميم غبي وتصميم عبقري .. ألم تسمع عن "عبقرية مكان مصر"

**sab3aawy** · 13-05-2007 04:58 PM

يا وائل من حقك تنتقد زى ما انت عايز وانا لم افعل سوى انى دافعت عن وجهة نظرى بإظهار ما ارى انك اهملته فى انتقادك

انت بتقول ان تصميم الشاهين غبى وبتقارنها بسيارات جر امامى

وانا شايف ان تصميمها معقول جدا بالنسبة لسيارة دفع خلفى، ولما احب اتكلم عن نسبة مساحة صالونها الى ابعادها الخارجية يبقى اقارنها بسيارات الدفع الخلفى وليس الأمامى،

كما ان الشاهين ليست بالحجم الوهمى الذى تتكلم عنه ولندع لغة الارقام تتكلم

الشاهين طولها 430 سم: يعنى اطول من اللانوس ب10 سنتى متر فقط واقصر من النوبيرا وكذلك اقصر من سيارتك الحالية ب20 سنتى متر
عرضها:1.67 متر يعنى اقل من معظم السيارات الموجودة فى نفس الفئة
وزنها فارغة:950 كيلوجرام فقط، يعنى اقل من وزن اللانوس ب85 كيلوجرام كاملة

فى المجمل هى عربية تحت المتوسطة فى الحجم(اذا اعتبرنا النوبيرا نموذج مثالى للسيارة المتوسطة)،وبالتالى فصالونها معقول بالنسبة لحجمها الحقيقى، اما كون خطوطها الحادة بتديها منظر اكبر من حجمها الفعلى فانا اراها ميزة وليس عيب "على سبيل البرستيج يعنى"

**وائل عطية** · 13-05-2007 05:04 PM

"على سبيل البرستيج يعنى"

وأنا أرفع القبعة احتراماً للبرستيج ولك أنت شخصياً
بس بيني وبينك بقى أنا زعلان منك ياريت تبص على صندوق الوارد بتاعك

13-05-2007 06:06 PM

والله انا مش عايز ادخل عشان الموضوع ميكبرش وعشان ثقتي في المطلقة في اطراف الحوار ( هاني ) و(وائل ) وانا فعلا مش هدخل لاني علي علم بان كلا الطرفين استوعب سبب سوء التفاهم واعتقد انة خلص كمان

بس انا كنت عايز اقول حاجة هو مش ده منتدي ؟؟

يعني مش ده المكان اللي الناس بتكتب فيه ارائها بحريه مطلقة وبدون رقابة

مش احنا عملنا الموقع ده عشان نحقق ده ؟

طب ليه فيه ناس مش قادرة تستوعب مفهوم حريه الراى بمزياه ومساوئة

خليني اقولكم ببساطة تصوري " انا شايف ان لو انا عايز اسمع رائ عن عربية ( وانا معرفش عنها حاجة ) هعمل حاجة من دول :

هسائل واحد معاه العربية مثلا وده اكيد هيقولي رائيه الشخصي
او هقرا ريبورتاج عنها في مجلة او جرنان وده هتلاقي مليان كلام من نوعية تتميز السيارة وتتفوق السيارة وتنفرد الزمارة الخ الخ
او هستنصح واسئل ميكانيكي ودول 90% منهم اللي يتكل عليهم يبيع عيالة

يعني كل الناس ديه مش هتتفق علي حاجة فضلا عن كون ارائهم بعيدة عن الحيادية والموضوعية ان لم تكن خالية من كلاهما تماما

طب لو سئلت في منتدي ؟؟
هو ايه المنتدي ؟؟ قولنا مكان للحريات واهمها حريه الرأي وهو مش مكان موجود فعلا لاء ده مجرد مجتمع افتراضي بيجمع ناس موجودين فعلا في الحياة

خدت بالك يعني كل الناس اللي ممكن اسئلهم في الواقع ( الموضوعيين والمفتكسين وووو) هلاقيهم موجودين برضوا في المنتدي

بس المنتدي هلاقي فيه تنظيم اكتر هلاقي فيه تواصل اكتر واحتمال اني الاقي فيه حد بيفهم بجد اكبر

طب ليه بقي الناس بتنزعج لما واحد يدخل يقول العربية ديه زبالة والتصميم ده جربان والاستابيلتي بتاعة العربية العلانية زي الزفت ( عفوا )

ليه بجد بنزعل ديه طبيعة الناس وديه طبيعة المصريين وديه طبيعة اي مجتمع افتراضي او واقعي

انا لما كنت بدور علي معلومات عن عربيتي سئلت الناس وانا كتبت ارائهم في المشاركة بتاعة " ليه اشتريت البرايد "

وكان فيه منهم واحد قال " اخويا عمل سيرش علي النت ولقي العربية مليانة عيوب "

طب يا اخي انا فلييت النت حتة حتة ملاقيتش العيوب اللي مليانة ديه وهو مقلناش علي ولا موقع منهم ده غير اننا لا نعرفة ولا نعرف اخوه

اللي عايز اقولة ان اللي بيدخل المنتدي المفروض داخل يدردش ويشبع هوايتة ( قبل كده وصف كريم المنتدي بالقهوه اللي بنتجمع فيها ) يعني مكان ترفيهي في الاساس

وديه طبيعة اي منتدي في الدنيا ومينفعش نغيرها

عشان كده مينفعش نصادر اراء الناس التانية ومينفعش نزعق ونبواء في وشهم ونقولهم " ايه يا عم الكلام ده انت بتتكلم غلط خالص "

لاء يا سيدي معلش تعالي علي نفسك شوية وتجاهل الاراء اللي متعجبكش ورد علي الاراء اللي تعجبك او اللي عايز تضيف عليها او تستوضح

لاكن اسلوب انك تقعد لكل واحد مستنيلة علي غلطة عشان ترد عليه وتبقي انت القط ابو عنين قزاز غلط ومش صح

لازم نتعلم نتكلم مع بعض ونسيب مساحة للاختلاف بينا ونحترم اراء الناس حتي الاراء الغلط تحترمها لان احترامنا ليها احترام لحرية الناس انفسهم

ومنقولهمش خلي رائيك لنفسك لان ده مكان الناس بتتشارك فيه ارائها

اللي مش عاجبة بقي فكره الرائ والرائ الاخر هو اللي ملوش مكان بينا لاننا هنا بنأسس مدرسة الرائ والرائ الاخر والحوار والجدل المثمر

http://www.nilemotors.net/Forum/viewtopic.php?t=666

اللينك ده لمقارنة كانت اتعملت بين اخيين في منتهي الاحترام هما حسام كرم(بيمثل الادا) و محمد يسري (بيمثل الشاهين )

المقارنة ديه وامثالها احسن حاجة في المنتدي لانها نقاش موضوعي فيه سخونة وشد بس مع مراعة اداب التحاور واحترام الغير
ودخل في المقارنة ناس بتلوش ومش فاهمة حاجة فعلا بس الحمد لله معرفوش يعكروا روعة الجدال المثمر

ياريت تتدخلوا تشوفوها لانها مثال حي نتعلم منة ان الجدال المنطقي هو اسمي انواع الجدال واكثرها اثمارا وعشان نتعلم ان لازم في خرابة نلاقي عفريت بس تجاهل العفريت افضل واقيم مليون مره من الانسياق وراءه في تفاهات ومجادلات بدون داعي

**hazem_khidr** · 14-05-2007 12:15 AM

والله ياأخ هاني إحنا كنا أنهينا الموضوع
بس واضح إن الأخ اللي دخل بدون داعي ده لم يقرأ الموضوع إجمالاً
وإنما تدخل لمجرد إنه يقول أي حاجة والسلام !!!!

انا مكنتش قريت اللي اتكتب علشان الميل كان واصل قبل كلام الباشمهندس سبعاوي و عموما ميرسي لزوقك اوي يا استاذ وائل علي الكلام الحلو دا

**hazem_khidr** · 14-05-2007 07:30 AM

إهدأ ياأخي شوية
مفيش داعي للموال اللي انت قولته ده
أنا لم أصف شركة فيات إجمالاً بالغباء

حضرتك ما وصفتهاش بالغباء مش كده

فما الضير أن أقول أن تصميمات فيات متخلفة؟؟ هذا رأيي ولي حرية التعبير عنه ولي عليك حق إبرازه وعدم التدخل فيه نهائياً

امال مين اللي كتب الكلام دا؟؟؟؟

**المتميز** · 10-09-2007 06:37 PM

الشاهين تصميم غبي و#####
و انا راكب شاهين !!!!

تم تعديل المداخلة من قبل الأشراف وحذف الكلمات التي لا تليق

**sherif_84** · 12-09-2007 05:14 PM

لا حول ولا قوة الا بالله متتعبش نفسك يا استاذ سبعاوى هو الشعب المصرى كده يحب اللت والعجن فالكلام كل عربية فالعالم لها مميزاتها وعيوبها حتى البى ام والمرسيدس لهم عيوب اى حاجة لها عيوب لان الكمال لله وحده فمينفعش ان كل واحد يشتم العربية اللى مش عاجباه يقول رأيه من غير شتيمة لان مالك السيارة ممكن يتضايق لان العربية لاى واحد مننا أعضاء المنتدى بتمثل حتة منه فرجاء أرجو ابداء الرأى الفنى والميكانيكى من غير شتيمة لان احنا اساس كلامنا الاحترام وأرجع اقول ان الشاهين عربية جميلة بس عيبها انها ضيقة من الخلف والتابلوه شكله قديم وتانك البنزين واكل جزء من الشنطة انما باقى العربية ممتازة