الموضوع: ترخيص الانوس خطوة بخطوة

السلام عليكم ورحمة الله وبركاته
الحمد لله إستلمت الانوس من منصور بسلام إستلمت بعد فترة حجز 18 يوم وإلي أخرها كده بيقولو شهادة المنشأ ودي ضروري علشان الترخيص
المهم سلمولي العربية سادة يا حضرات بمعني إن العربية بدون دواسات وكذلك كانت بدون ولاعة لولا إني لاحظت فلاقيت واحد راح جاب واحدة وجه مش عارف منين ، وبعد كده جت خطوة المفتاح إلي كان ملفوف في ورقة كده عرقانه مكتوب عليها لانوس نبيتي مش محطوط في ميدالية ولا أبعد اليقين حلقة مفاتيح
فتحوا الكبوت وشاوروا لي علي حاويات الزيت وقالوا كل واحد بتاع إيه وبعد كده طلبوا مني ما أفتحش حاجة إلا في صيانة الـ 5000 وإستلمت ضمان الكاسيت والبطارية ،( البطارية منعاً للجدل 55 وليس 70 ) والإطارات إلي نازله معها بيرلي 13 وأخيراً طلبت دواسات قالولي مافيش
ما علينا انا كنت مستعجل وما عنديش وقت للخناقة وكنت عاوز أجري علي المرور علشان ألحقهم زي ما حضراتكم عارفين المرور في رمضان طبعاً بخلاف كل ما يقال في التلفزيون والراديو أنهم يعملون إلي الساعة الثالثة وأحياناً للرابعة إلا أهم بيروحوا في الفحص الساعة 12 ونصف يا حضرات
يعني بعد كده إلي هاييجي هايروح وييجي بكره علشان كد تروح المرور مش بعد الساعة 9 الصبح (حظي كان حلو علشان أنا مرور المقطم ولكن بتوع مدينة نصر فنصيحة إتسحر وروح حط عربيتك امام باب المرور علشان تبقي أول واحد)
وإنت رايح لازم يكون معاك الآتي
(نصيحة قبل ما تتحرك من عند منصور إلي في شارع الطيران تفول العربية لأن فيها خمسة لتر بنزين فقط يدوبك يعدوك الشارع
1- شهادة المنشأ وفاتورة الشراء من منصور
2- صور بطاقتك نسختين
3- إشتري ملف الترخيص 8 جنيه ونص
4- إشتري إذن دفع وورق ترخيص من الخزنة بـ 50 جنيه
5- إدخل علي التأمين يا معلم (أنا قلت أرخص تلات سنيين علشان أريح دماغي من القرف بعد كده ) فدفعت 211 جنيه
6- رجعت علي الشباك تاني ( هنا تبدأ مرحلة تفتيح الدماغ يعني علشان ما تتعبش روحك بين روح وتعالي كرمش إيدك في أي حاجة وظبط إلي بيراجع لك الملف وهو هايبعتك علي الفحص خذ معاك الفاتورة وورقة التأمين وورقة الطفاية من جوه الملف
7- تروح تلاقي بتاع الفحص قاعد تحت المظلة يأشر لك علي الورق بعد ما راجل معدي الثمانين بيرفع لك البصمة طبعاً زي ما هو معروف البصمة صغيرة ولا زم تقوي بصر من يرفعا بالبرادس( فلوس يعني )
8- طبعاً بتاع الطفايات بيجيب معاه كرتونه يخلصها ويروح النصيحة ما تجيبش طفاية لحد ما يختمولك الورق أويقولولك إتصرف أو يبيعولك واحدة من عندهم
أنار روحت بعد كده إشتريت واحدة كيلو2009 من يافاريا في شارع كلوت بك عملت 110 علشان داه كان آخر محل فاتح آنا سأل عليها قبل كده كانت بـ 100 أو 105
9 - ترجع تاني يا معلم علي الشباك بعد ما مهندس الفحص مضالك الورق يقوم يعملك أمر دفع لي الخزنة بـ 770 جنيه يا حاج
10- تأخذ الورق وتمضي الإقرار بتاع المرور ومالكية السيارة ثم تأخد الورق وتطلع علي المراجع يراجع ويدخل الورق علي الحاسب الآلي |وهنا بقي لازم تتعلم الصبر لحد ما بياناتك تخش وبعد كده ينهدوا علي إسمك تروح تستلم الرخصة وبعدين تأخذ ورقة تطلع بيها علي مكتب اللوحات
11- تديلوه الورقة والرخصة ويطلع علي البطاقة وتنزل تستني جنب عربيتك
12- هايجيلك عسكري يركبلك النمر ويديلك الرخصة وطبعا إنت لازم تظبطه برضه
الموضوع كله إتكلف حوالي 1300
بالطفاية بتفويل العربية بالإكراميات
عشرات وخمسات وعشيرنات متنطوره ما عدتش الستين جنيه

حبة ملحوظات أخوكم وقع فيها أرجو إنكم تأخدوا بالكم منها
1- ما تخدش العربية من عند منصور إلا بعد أن تتأكد أن حاويات الزيت معديه الحد الأدني لأن أخويا معاه نوبيرا فتح الكبوت عندي وشاف الزيت بتاع الباور والباكم وقال إنهم ولاد ...... إزاي يدوك الزيت وهو علي الحد الأدني وكان عاوز يزودهالي قلت له لأ ومش عارف كده صح ولا غلط
2- سيبك خالص من العده العيانه إلي بيدوهالك هناك الحسنة الوحيدة الكفر بتاع العدة أما الكوريك فحدث ولا حرج ما يرفعش عجلة ومفتاح العجل لو إنت قرد فك بيه صامولة جامده شوية
3- إنزل إشتري كوريك ومفتاح صليبة من التوفيقيقة
كوريك تمساح الأصلي بـ 78 جنيه (الأحمر
كوريك تمساح نمرة واحد 2 طن 115 (الأخضر
مفتاح صليبة 15 جنيه
4- لف قبل ما تشتري عند بياع أو إثنين مش أكثر وخليهم يوروك الحاجة وإعرف السعر وإعرف الآخر إيه بعد كده يا معلم روح لهشام لهيطه وقوله علي الحاجة دي وقوله أنه يجيب أفضل حاجة وخليه يقولك علي السعر بعد كده قارنه باإلي إنت شفته وقوله إنك من نايل موتورز هاينزل في السعر ويعمل واجب حاجة كده بتاع خمسة جنيه أو عشرة في كل بند
النظرية في كده إن لو في حاجة مش مظبوطة ممكن ترجع له تاني
بالطبع أنا عارف إلي أنا مقولتش حاجة جديدة ولكن ده تذكره لمن نسي إجراءات المرور البديعه

الف الف مبرووووووووووك