هااام جدا لكل مالكى اسكودا تحذير هام جدا

**Tarek_Talaat** · 07-09-2009 02:34 PM

هاحكيلكم قصتى مع مركز مشهور تابع للوكيل موجود فى المعادى
اولا انا كنت دايما بروح للمركز دة علشان قريب منى اعمل الصيانات الدورية للسيارة وهى اوكتافيا a5
وكان كلة تمام الى ان حصلتلى حادثة كبيرة ففكرت انى اروح للمركز واصلحها هناك وكانت السيارة متأمن عليها اولا تحس انهم لما بيجلهم سيارة متامن عليها اكن جالهم هدية او تورتة يقطعو منها براحتهم وعادى ما كل التوكيلات انعدم منها الضمير وعملولى مقايسة اصلاح وجبت مهندس التامين ووافق على كل حاجة ورجعو عدلو تانى وجية المهندس تانى ووافق وكلة تمام ودفعت الفلوس وانا بستلم العربية بفتح الكبوت ملاقيش المصفحة بتاعتها موجودة اسال عليها يقولولى اصلها اتكسرت!!!!!!!!
طيب اسالهم محطنهاش لية مع مقايست التامين دى تمنها 1500 جنية بردو يقولولى اصلنا مخدناش بالنا وعموما نكتبلك عبارة يحفظ حقة فى المصفحة وروحت للتامين تانى قالةلى مينفعش طبعا دة تهريج

ثانيا قولت معلش اهمال بسيط وخلاص ولقرب المسافة كملت معاهم الصيانة لغاية صيانة ال 60 ودفعت 4500 جنية فيها ومن بعدها لاقيت العربية بطلع اصوات غريبة عند بدء التشغل والاداء مبقاش هو وحاسس ان العربية بقت ضعيفة جدا

ثالثا والاهم طبعا
حصلى حادثة تانية خبطة فى الشنطة من الخلف والسيارة مش مؤمن عليها اخدت السيارة وجريت بعد الحادثة وكنت بتصل بقريب ليا يجى معايا وكنت حاطط (سماعة البلوتوث) وبتكلم منها واتصلت بية وقابلتو وروحنا المركز وهناك قالولى على القايسة بتاعت التصليح وهتتكلف كام فلوس ووقت ووافقت وسبت السيارة بكل ( متعلقاتى الشخصية ) وحتى نسيت مفاتيح شقتى مع مفاتيح السيارة واوصيت موظف الامن بتاع الاستقبال ان يجمع مافى شنطة السيارة ويضعة فى اكياس اذا استلزم الامر

وروحت فى الميعاد المحدد علشان استلم السيارة اجدها وكانت هناك فروق كبيرة جدا بين الشنطة والاكصدام وقعدت اتكلم مع مدير القسم بتاع السمكرة وقالى مستحيل تتعمل اكتر من كدة !!!!!
قعدت اتناقش معاة وهو مصر جدا انا دة اخرها فطلعت اشتكى للمدير العام ورئيس مجلس الادارة والراجل طلع معايا فى غاية الاحترام واتصل بمدير السمكرة اللى هو اخوة وزعق وقاللو حاول تعملها ويدوب لسة ماشى اتصلو بيا قاللوى ان العربية اتعملت زى ما انا عايزها وممكن اروح استلمها
سؤال لما هى ينفع تتعمل معملهاش من نفسوا لية؟؟؟؟؟!!!!! وازاى يقولى مدير السمكر لو هى تتعمل فى الحرفيين لية جيت عندنا ؟؟؟؟؟؟
وروحت استلمت العربية واكتشف المفاجئة الكبرى (((((متعلقاتى الشخصية القيمة منها فقط مسروقة من السيارة)))))
وزعقت ودورت وكلة ينكر انوا الحاجة اتسرقت

يا اساتذة انا روحت وانا مدى امان لمركز تابع للوكيل وتتسرق متعلقاتى الشخصة منها ويتعاملو بكل برود معايا

المركز دة موجود فى زهراء المعادة فى نهايتها واى تفاصيل اكتر ممكن اى حد يكلمنى

**ahmed_mabrook** · 07-09-2009 02:59 PM

ربنا يعوض عليك بالخير ان شاء الله
فعلا من الحاجات المهمة جدا الوكيل عاوز اخد رايك بصراحة من حيث كل حاجة A5 OR Civic

**Tarek_Talaat** · 07-09-2009 04:57 PM

شكرا يا احمد
انا اللى مضايقنى بصراحة هو انك تستامن الناس ودة توكيل بردو مش ورشة فى حتة وتلاقى حاجتك تتسرق من العربية حسبنا اللة ونعم الوكيل

بص لو عايز رائيى الاوكتافيا حلوة وكويسة وجامدة جدا وفخمة لو دة كان اللى بتدور علية فى العربية لكن السيفيك شكلها شبابى جداااا وموتورها نشيط اوى وم الداخل مبتكرة جدا لو دة كان اللى بتدور علية فى العربية يعنى الاثنين يستحقو الاحترام وكل واحدة ليها مميزاتها

**marawansabry** · 08-09-2009 11:10 AM

معليش طبعا ربنا يخلف عليك .. اعتقد انك بتتكلم عن مركز الاقصى اللي في زهراء المعادي .. مع اني في التوكيل قالولي انة جميل جدا وفايف ستار وحاجة حلوة خالص بس هو حراق شويتين .. يعني اسعارة اغلي من التوكيل نفسة .. بس قالوا ان خدمتة كويسة

بس اسال مجرب .. واضح انك اتقرصت منهم جامد .. بالنسبة لموضوع المتعلقات الشخصية متزعلش مني لو انت في شركتك على مكتبك متسبش حاجتك وتمشي .. دا درس مستفاد معليش .. متعرفش نفوس الناس ولا ثقافتهم .. دا توكيل عربية يعني من الاخر ميكانيكية وسمكرية لابسين بس نضيف .. قدر الله وما شاء فعل

بس انا كنت ناوي اروح اعمل الصيانة الدورية عندهم لاني ساكن في المعادي ومشوار التوكيل دة بعيد وبقولوا زحمة قوي .. يعني انت رايك الصيانات الدورية كمان بلاش.

مرة تانية بقي ربنا يخلف عليك ومعليش.

**Tarek_Talaat** · 08-09-2009 12:20 PM

قدر اللة وماشاء فعل
انا اتقرصت منهم كذا مرة ودة اللى مدايقنى اوى اول مرة مع المقايسات الغلط والناقصة واتكلفت 1500 على حسابى وعلى فكرة هما فعلا اغلى بكتير مع انهم بيخدو نفس قطع الغيار اللى عند المركز الؤئيسى
وكمان دفعت 4500 عند صيانة ال 60 الف وبصراحة شوفتوهم بيستخدمو السيارة بطريقة عنيفة انا نفسى مبعملش بيها كدة وبردة لفت نظرهم ل دة بدون اى اهتمام منهم
وبصراحة كان عندهم مهندس شاطر جدا دة بسببة كنت بروح هناك كان ماسك الدنيا هناك ومظبتها ولما مبقتش االاقية والاقى مجموعة مهندسين قليلى الخبرة قاللولى دة فى اجازة وراجع وعرفت انو مشى اصلا

وانا عن نفسى مش اروح هناك تانى لانى قرفت وكل ما تروح تلاقى الناس غضبانة وجو عام مش ظريف انا هاخد السكة الطويلة واروح المركز التانى بتاع العبور انظف بكتير وارقى او اروح واستحمل الزحمة فى الفرع الرئيسى وانا مطمن على العربية

انا اللى يهمنى امشى من هناك وانا مستريح نفسيا على العربية

**Ahmed15** · 08-09-2009 02:55 PM

نشكرك جدا على تنبيهنا و نقل تجربتك مع هذا المركز لنا

**Tarek_Talaat** · 08-09-2009 03:22 PM

لا شكر على واجب يا احمد وشكرا ليك على مرورك بالموضوع

واتمنى من كل الناس انها تحكى تجاربها مع اى مركز خدمة او اى بائع بيحاول انو ينصب علينا او يسرقنا كفايانا اوى بقى احساس اننا مستهلك ضعيف وملوش لازمة وكفايانا اوى اننا نكون بندفع فلوسنا لناس بيسرقونا ويغالو فى ثمن الخدمة وبردة ندفع ومش دة وبس وكمان نتسرق حتى اغراضنا الشخصية اللى بداخل ادراج السيارة المقفولة

كان لازم كمان اخد موقف علشان لما يقولى مدير السمكرة عندهم وانا واللى زيى بندفع مرتبهم وهما قايمين علينا كمستهلك
سيادت المدير قاللى لو مش عاجبك روح اعملها برة !!!!!!!
هو مش فارق معاة عميل واحد وفاكر ان واحد مش هاتقف علية الدنيا لكن اتمنى اننا نقدر نوصلهم زى البلاد المحترمة عميل واحد اهم من اى حاجة فى الدنيا لان عميل و عميل و عميل...... هما دول شغلنا ومصدر رزقنا

ياريت كل الاخوة ينبهونا ونعمل حاجة بقى ضد استغلالنا كمستهلك بيدفع دم قلبة علشان خدمة

**marawansabry** · 09-09-2009 11:07 AM

المشاركة الأصلية كتبت بواسطة tarek_talaat

قدر اللة وماشاء فعل
انا اتقرصت منهم كذا مرة ودة اللى مدايقنى اوى اول مرة مع المقايسات الغلط والناقصة واتكلفت 1500 على حسابى وعلى فكرة هما فعلا اغلى بكتير مع انهم بيخدو نفس قطع الغيار اللى عند المركز الؤئيسى
وكمان دفعت 4500 عند صيانة ال 60 الف وبصراحة شوفتوهم بيستخدمو السيارة بطريقة عنيفة انا نفسى مبعملش بيها كدة وبردة لفت نظرهم ل دة بدون اى اهتمام منهم
وبصراحة كان عندهم مهندس شاطر جدا دة بسببة كنت بروح هناك كان ماسك الدنيا هناك ومظبتها ولما مبقتش االاقية والاقى مجموعة مهندسين قليلى الخبرة قاللولى دة فى اجازة وراجع وعرفت انو مشى اصلا

وانا عن نفسى مش اروح هناك تانى لانى قرفت وكل ما تروح تلاقى الناس غضبانة وجو عام مش ظريف انا هاخد السكة الطويلة واروح المركز التانى بتاع العبور انظف بكتير وارقى او اروح واستحمل الزحمة فى الفرع الرئيسى وانا مطمن على العربية

انا اللى يهمنى امشى من هناك وانا مستريح نفسيا على العربية

هو مركز العبور دة مركز معتمد برضة .. ولا فرع تاني للتوكيل ولا اية بالظبط .. وياتري تليفونهم اية وعنوانهم كمان لو امكن .. بس انت روح الاول وقلنا اخبارهم اية .. لحسن يطلعوا هما كمان بمبة.

وبعدين انا كنت سمعت ان التوكيل بيعمل فرع كبير في القطامية بس الكلام دة بقالة كتير .. محدش عندة فكرة هما خلصوة ولا لسة ولا الموضوع فشنك.

**marawansabry** · 09-09-2009 11:46 AM

على فكرة انا كلمت توكيل اسكودا واكدولي ان افضل حاجة تروحها هي مركز الخدمة بتاعهم بتاع غمرة .. وقاللوي هو زحمة شوية بس هو افضل من كل مراكز الخدمة المعتمدة .. صحيح انا سمعت كلام وحش علية من الناس على المنتدي هنا .. بس تقريبا الاعور وسط العميان بصير