تنصحونى اشترى دايهاتسو سيريون 1300 كاملة اوتوماتيك ولا لأ؟

**mohammed1985** · 07-09-2009 09:36 PM

السلام عليكم
كيفكم شباب
بعد لف ودوران وبحث مستفيض عن سيارة مناسبة قررت شراء دايهاتسو سيريون 1300 كاملة اوتوماتيك
العربية اتفرجت عليها فى التوكيل الصراحة تحفة وعملية جدا وبها كل ماتحتاجه غير انها واسعة جداااااااااا من الداخل وواخده اربع نجوم من 5 فى اختبارات الكراش والأمان ومزودة ب 2 اير باج الخ
سعرها فى الوكيل 85000 جنيه
[shr71=http://rightcar.govt.nz/gfx/vehicles/rb/daih/daih0035.jpg]دايهاتسو سيريون[/shr71]
كنت فكرت فى الياريس بس اول ماجربت اقعد مكان السائق اتخنقت بصراحة نظرا للضيق المستفز من الداخل
وفكرت فى افيو لكنى بصراحة احسها لانوس بالاضافة الى بعض المشاكل اللى كل الناس تعرفها
الاوبترا شكلها مش مريحنى ومش حابه خالص
والنيسان صنى كويسة بس تقفيل صينى وكمان شكلها كبير عليا انا 24 سنة بس
وفكرت فى الجراند بونتو لكنا اضيق من السيريون كمان تقفيل السيريون وتجهيزاتها احسن كتير
طبعا من البداية استبعدت الفيرنا والاسبرانزا
ياريت تنصحونى ان كنت اكمل فى قرار شراء السيريون ولا افكر فى حاجة تانية فى نفس حدود السعر ده؟
وياريت اعرف نظام توكيل دايهاتسو ايه ان كان حلو ولا وحش من ناس جربت التعامل معاه فعلا
تحياتى لكم
محمد صالح

**tutankhamoun** · 07-09-2009 09:41 PM

السيريون عربية حلوة و جميلة .........
بس لي تعليق
الجراند بونتو تقفيلها أحسن من تقفيل السيريون .
النيسان صني تقفيل مصري مش صيني ..............

إنما السيريون عربية حلوة
أدخل قسم الدايهاتسو .......... و أقرأ المواضيع عن مميزات و عيوب العربية علشان تقدر تقرر أن كانت مناسبة لك أم لا .

**tutankhamoun** · 07-09-2009 09:45 PM

بمناسبة اختيارات العربيات اللي أنت حاطتها ....

لو لنفسي .......... من أختياراتك
النيسان صني ............ أو الجراند بونتو ..... ( البونتو كلاسيك أرخص من كدا و الجراند أغلى شوية من كدا )

لو من خارج أختيارتك ...
فيه حاجات كتيرة في معدل السعر ده ......
بروتون جين 2 ......... هيونداي نيو أكسنت .......... كيا ريو ..........

لو عايز عربية صغيرة
السيريون أختيار موفق جدا ......

و ربنا يوفقك إن شاء الله .

**mohammed1985** · 07-09-2009 09:59 PM

شكرا لكم على التفاعل السريع
انا اعرف ان الجين 2 عربية جامدة بس اعرف ان عفشتها ناشفة قوى وهتحسسك بالمطبات ولو مشيت فى مناطق وعرة
والنيو اكسنت اعرف انها ضعيفة جدا ومش متماسكة ومش متربطة كويس
واحد صاحبى معاه النيو اكسنت جه ياخد ملف الاكصدام الخلفى راح واقع
وحاجات من دى العفشة هتتبهدل جامد صحيح الكلام ده ولا ايه؟

**tutankhamoun** · 07-09-2009 10:11 PM

المشاركة الأصلية كتبت بواسطة mohammed1985

شكرا لكم على التفاعل السريع
انا اعرف ان الجين 2 عربية جامدة بس اعرف ان عفشتها ناشفة قوى وهتحسسك بالمطبات ولو مشيت فى مناطق وعرة
والنيو اكسنت اعرف انها ضعيفة جدا ومش متماسكة ومش متربطة كويس
واحد صاحبى معاه النيو اكسنت جه ياخد ملف الاكصدام الخلفى راح واقع
وحاجات من دى العفشة هتتبهدل جامد صحيح الكلام ده ولا ايه؟

فعلا عفشة الجين 2 عفشة رياضية مش ناعمة و مش مريحة في الأماكن المكسرة .
بس السيريون عفشتها مش ناعمة برضه ........ بس مش قادر اقولك هي ناشفة زي الجين 2 أو لاءة ...... لأني مركبتهاش كتير في أماكن مكسرة .

بصراحة النيو أكسنت أحسن من الوصف بتاعك ........ بس برضه أسأل أصحابها يمكن يكون صاحبك أصلا مبهدل العربية .

شوف أنت عايز أيه ؟؟
موتور صغير و توفير بنزين . ؟
عربية صغيرة أو كبيرة ؟
محتاج شنطة أو لاءة ؟
يعني حدد أنت مهتم بأيه في العربية اللي أنت عاوز تشتريها علشان أنت بتقارن عربيات مش نفس الفئة الحجمية خالص .
و لا نفس فئة الموتور ....

ربنا يوفقك لما فيه الخير إن شاء الله .

**M.Mosaad** · 08-09-2009 11:49 AM

السيريون عفشتها ناشفه لانها مناسبة للطرق بتاعتنا هي مش ناشفه اوي بس برضة ناشفه بالنسبة للياباني بس هي بصراحه تحفةةةةةةةة واسعه من جوة و من برة صغيرة تركن في اي حته و جرايه جداااااااااا و قطع غيار معمرة بس مش رخيصة الشنطة صغيرة بس نصيحه لو هتجيبها انشاء الله هات ال GLX دي بحوالي 90 لان الزيادات اللي فيها اكتر من فرق الفلوس علشان تزودها بعد كدة فيها abs و سبويلر و اربع سماعات و جنوط سبور بس الكاسيت اوديو بس
و ربنا يوفقك للي فيه الخير

**abohalmos** · 08-09-2009 02:32 PM

انا فى نفس الحيرة

محتار اوى بين الياريس مانوال و السيريون مانوال ......اصلى من الصعيد و الشوارع عندنا فاضية عن القاهرة ...... وانا مش بحب الاتو اوى .....

ساعة اقول انا هانزل احجز السيريون دلوقتى ........و انها اكتر عربية مناسبة ليا ........و الراجل عبد اللطيف جميل بتاع دايهاتسو نازل عروض وراء بعض لدرجة انى حاسس انه قاصدنى انا بالذات و ناقص يعمل عرض يقولك اتصل بالتليفون و نجيبلك العربية لحد البيت و ادفع براحتك

و ساعة اقول لا دى شنطتها صغيرة ....مع انى مش بحتاج احط حاجات كتير فى الشنطة ..... و مش بسافر غير مسافات قريبة .....و اطفالى لسه صغيرين (سنتين وواحد شهرين ) فالعربية هاتبقى موز عليا اوى ....ده انا من البيت للمستشفى لطلبات البيت لخروجة مع اصحابى على القهوة

و ساعات اقول لا خلينى فى الياريس دى تويوتا برضه .....و شنطة حلوة و برضه واسعة و يابانى و صالونها حلو

و ساعات اقول لا الياريس ملهاش توكيل و لا صيانة فى الصعيد .......يعنى لو مشكلة فى العربية هاشيلها على ونش و اطلع على القاهرة يا معلم و السيريون ليها صيانة و توكيل فى الاقصر يعنى حوالى 60 كم من قنا

و ساعات اقول لا مانا اظبط مع شركة تأمين كويسة و هيا تخلص الليلة كلها لو حصل حاجة

وساعات اقول برضه الياريس عربية سيدان و انتوا عارفين السيدان فى نظر الصعايدة قيمة و سيما ...... و السيريون يقوولوا عليها عربية صغيرة

و ساعات اقول برضه الياريس ...... ماهى منتشرة هنا جدا و ناس كتير جايباها... وواحد صاحبى معاه العربية عامل بيها 60 الف كم و مراحش التوكيل ولا صيانة و لا مرة لحد دلوقتى ......

و ساعات اقول الياريس حوض ماتورها صغير و الاكصدام الامامى حتة واحدة و هوا و الخلفى اقل خبطة بيكسر نصين و غير يا معلم و رش الجديد يا ريس

وساعات اقول ما السيريون برضه نفس الكلام ...... بس السيريون الاكصدام مش حتة واحدة و كمان اصحابها بيقولوا بياخد و يدى مع الخبطة مش بيكسر نصين زى الياريس

وساعات اقول انفض للاتنين ........و اجيب لانسر 1300 مانوال .... الاقى اللى يقول دى مفهاش ايرباج و كمان لو شغلت التكييف السحب بيموت ...... و احنا فى الصعيد ....... يعنى الواحد هاين عليه يشيل التكييف الاسبليت بتاع البيت على كتفه و يمشى بيه ...... ده احنا هنا الواحد محتاج عربية 2 تكييف مش واحد

انا و الله مش طماع ....انا عاوز عربية كويسة تشيلنى انا وولادى مرتاحين و صالون حلو و تكييف و تكون أمان لانه زى مانتو عارفين الشوارع ملياانة هبل كتير ...ميكروباصات و موتسكيلات و كله .....محسش انها مقصرة معايا و فى نفس الوقت لو اتخبطت او حبيت اصلح فيها حاجة ماتعبشى فيها لانى طبيب و معنديش وقت لغلب الصنايعية و الكلام ده .... و انا مش النوع اللى بيغير لانى بحب ابقى مقتنع بالحاجة اللى حاجيبها ...... لانى بعد كده عمرى ما ابص تانى خلاص و بأشترى دماغى على الاخر ......انا كانت معايا 128 كونت منفض و لا عمرى بصيت على اى عربية لانها كانت شايلانى بس كونت لوحدى ساعتها

اى رأيكم يا جماعة ........يا توت باشا و نيستا و كل الاخوة

انا دماغى قربت تطير منى ....

**tutankhamoun** · 08-09-2009 06:38 PM

أبو حلموس باشا ............ ياه أنت لسة ما أشتريتش عربية ؟؟؟

بُص يا باشا شوف العربية اللي أنت مُعجب بها و أشتريها على طول ........... بعد ما تشوف أماكن مراكز الخدمة الأقرب لك .
و ممكن تفكر برضه في حاجة من هيونداي ......... يعني فيه نيو أكسنت ....... و فيه كيا ريو ......... ( أقصد لو لهم أماكن مراكز خدمة عندكم بحكم أنتشارهم كماركات ) .

ربنا يوفقك في حيرتك دي .