بعض الناس في مصر فاهمة العربيات غلط..فاهمين إن العربية الحديد احسن من العربية الورق وده غلط خالص. العربية الحديد تتأثر بالحادثة أكثر من الورق (مع الاعتبار معايير واختبارات الأمان للعربية)...الحقيقة ان العامل الاول المؤثر في اي خبطه للعربية هي وضعك اثناء الخبطة ثم يأتي بعد ذلك مرونة العربية...

تجربتي الأخيرة: ميكروباص خبط عربيتي والحمد لله...إللي حصل إن واحد معاه اكتافيا وقف مرة واحدة قدامي مش عارف ليه..المهم ربنا أكرمني وقدرت اقف قبل ما اخبط فيه وبسرعة وانا بافرمل شغلت الفلاشر وطلعت ايدي من الشباك..وسمعت طاااخ طييخ...طاخ الأولانية ميكروباص خبط ميكرباص تاني من ورا..اما الطييخ فكان صوت الميكروباص المخبوط وهو بيخبطني من ورا.

لا حول ولا قوة إلا بالله...بصيت في المرايه لقيت سواق الميكروباص نزل من عربيته وماسك دماغة وقعد على الأرض!!!!! نزلت اطمن عليه..وسألته انت كويس ماردش...الناس نزلت وقالوا لي عربيتك مافيهاش حاجة بصيت على العربية ملقتش اي حاجة والحمد لله...الأكصدام الفبر الطري خد الخبطة ورد...والاكصدام الحديد يتاع الميكروباص ما اقولكوش تقريبا واقع وموقع الفوانيس..انا متصور ان الميكروباص كان متبعزق من ورا ومن قدام من قبل الخبطة والخبطة وقعت الدنيا اكتر...

المهم انا طلعت بدون خسائر بحمد الله وفضله...اما السواق فمعرفش ماله!!! وزمايلة هما إللي اصروا اني امشي!!!!! الظاهر والله اعلم كان بيمثل..انا كنت خايف يكون صدره خبط في الدريكسيون جامد بس الحمد لله كله طلع تمام