مشكله كبيره في التيجو 1600

**khaled1964** · 30-10-2009 08:13 PM

اولا اتشرف بوجودي معاكم ودي اول مره ادخل هنا للرد
وثانيا انا بعد طووول تردد ولكن يرجع الفضل اليكم ومنتداكم اشتريت تيجو 1600 يوم 20/10 وحتي اليوم 30/10 عملت حوالي 900 كيلو والسياره اكترررررر من ممتازه بالنسبه الي سعرها مع العلم اني كنت راكب دايو لانوس وقبلها هيونداي اكسيل
بالنسبه للتيجو مشكلتها تتلخص ببساطه في عده نقاط يمكن تحملها وهي
1- لو محمل وزن كتير ومشغل التكييف وبدات التحرك عالاولاني حتحس ان العربيه تقيله شويه ولكن بعد النقل للتاني حيتلاشي هذا الاحساس وطبعا سبب ذلك وزن السياره مع السعه اللتريه للموتور 1600سي سي وللعلم السياره عالطريق المفتوح رووووووووووووعه
2- ابواب السياره وخصوصا الشنطه الخلفيه تحتاج عضلات لقفلها ولابد من رزع الباب حتي يقفل باحكام وده التقفيل المصري
3- لا اذكر اي نوع من المشاكل او العقبات تعرضت لها مع سيارتي خلاف ما ذكر بالعكس تعرضت لموقف مفاجيء اضطرني لاستعمال الفرامل وكنت علي سرعه واثبتت كفاءه لم اتوقعها ابدااااااا بالاضافه الي مظهرها وكمالياتها الكثيره تعطيك احساس انك اشتريت سياره من فئه 150 الف جنيهاوعلي فكره هي مصاريف الترخيص حوالي 500 جنيها لمده سنه واسف لو طولت عليكم واشكركم علي قبولي عضو بمنتداكم

**activehero2006** · 31-10-2009 07:22 PM

ياريت تسمحو لي ان اشارك

انا شايف ان جميع المشاركين الي مع الصيني او ال ضدد الصيني
في جدال لن يسفر على اي شيئ

لانه وبكل بساطه بدري قوى على اي حد جرب العربية شهر او شهرين يقول عنها قصائد شعر

وبدري قوى ان اي حد لقى عيب بالسيارة يبقى معنى كده ان السيارة وانتاجها كلة في عيوب

يا جماعة لسه شوية

يعنى السيارة لسه يا دوب جديدة وخاصة الـ 1600
يعنى الي مشي بيها يا دوب 1000 او حتى 5000 كيلو
استحالة يكون عرف عن السيارة كل شيئ
وحتى الي يقابل مشاكل هو عيب التقفيل المصري

المهم الي عاوز اقوله ان الحكم على السيارة لسه امامه كثير
عشان تثبت قوتها بمصر اكيد لسه امامها وقت كبير

بس اكيد اما نحب نقارن العربية دي لازم نقارنها بمثيلاتها في الفئة واكيد لازم نكون حطين بالحسبان السعر الي بيهم قطاع عريض من السوق المصري

تحياتي للجميع
واوعى حد يضرب نار

**mtradwan** · 02-11-2009 03:40 PM

السلام عليكم...
انا عايز اعرف لو سمحتم ايه الفرق بين العربية 4×2 ، 4×4 من حيث الاوبشن واستخدمها للبنزين والشكل.
وجزاكم الله خيرا.

**karkar6789** · 02-11-2009 06:57 PM

المشاركة الأصلية كتبت بواسطة som3aa

2- مركبش عربية من شركة مجهولة المصدر (شركة صينى بير سلم) و اقول الامان من عند ربنال

معلوماتك ناقصة ما اسمهاش صيني بيرسلم اسم الشركة شيري وتقدر تدور على الاداء الاقتصادي للشركة وبجد انا بقولك هاتنبهر ...وعاوز اقولك حاجة ..في حاجات الناس بتفهمها غلط زي رخص العربيات الصيني السبب فيه ان مصنعها في الصين معمول في حتة اجر العامل فيها دولار في الساعة يعني تكلفة انتاج العربية قليلة جدا ....وبعدين لو معاك لاب توب اقلبه وشوف صناعته ايه ...وبعدين انا مش فاهم ايه سر كرهك للعربيات الصيني ؟؟؟

**tamagogo** · 05-11-2009 01:27 AM

لا حول ولا قوة الا بالله. وحدوا الله. مافتكرش ان الاستاذ مضطهد الصيني ولا حاجه. بس كل حاجه المفروض تتحط في مكانها الصحيح ونبطل ناخد الموقف المتطرف في كل حاجه. ياما بتعشق الصيني يا اما بتكرهها عمى.

الشيري مناسبه لفئه كبيره من الناس اللى يهمها السعر اكثر من الامان والجوده, خلاص ربنا يباركلهم بس لازم يكونوا عارفين ده ان عربياتهم مش امنه ومش في مستوى جوده العربيات المنافسه الاغلى.
والاخوه اللى بيشتروا عربيات تايه زي التويوتا والهوندا بيدفعوا اكتر في مقابل الجوده والامان والعمر الطويل المتجرب. وفاكر كان فيه استاذ في التسويق بيقول ان الغالي رخيص لانه على المدى الطويل ما بيكلفكش كتير في مشاكله, وزي مثلا الاخ اللى باع التيجو بعد كام شهر عامله 9000 كيلو بخساره 17000 جنيه, ديه لو كانت تويوتا ماكانش خسر كده.

انا شخصيا رفاهيتي ومتعتي في عربيتي وما اطيقش اسمع فيها صوت تكته او تزييق, وبحب اركب عربيه عفشتها ناعمه ماحسش بالمطبات زي الكورولا , ولما ادوس بنزين العربيه تجري والاقي تكييف تلاجه, واعتقد ان الصيني لا يقدم هذا المستوى من الجوده.

المهم ان اللى معاه عربيه يكون صادق ومايخبيش عيوبها او مميزاتها, لانها امانه وربنا هيحاسبه عليها.

وشكرا

**tamagogo** · 05-11-2009 01:30 AM

نسيت اقول ان تويوتا مش بقية اهلي وشيري مش من الاعداء. لكن كل عربيه لازم تاخد حقها بعيدا عن العواطف

**yasserayad** · 05-11-2009 01:05 PM

الاخ كان بيستفسر فقط
ومحدش بيغير من الصينى ولا حاجه
هم مؤيدى الصينى بقوا بيفكروا كده ليه من ليس معنا فهو ضدنا
هو اهلى وزمالك يااخوننا.............خدوا الموضوع على انه لايتعدى المناقشه وابداء الراى للافاده والاستفاده
وبعدين هى العربيات الصينى بقت من المقدسات وممنوع الكلام عنها ولا ايه............
هو احنا مانعرفش نناقش بعض الا لما نصنف بعض فى فرق معينه
انت مع الصينى وانت ضده ...؟؟ شىء غريب والله
ومنتدى تانى اسمه اسبيرانزا كلوب ممنوع تتعامل معاه الا لو كنت معاك عربيه اسبيرانزا....شىء غريب
لاحول ولا قوة الا بالله

**wahid37** · 09-12-2009 10:18 PM

الواحد مش عارف يقول ايه الواحد مخه اتلخبط

اخوانى الاعزاء

الموضوع محتاج شوية صراحة وبلاش مكابرة بالايجاب اوبالسلب وشكرا للجميع

**ashrafsadany** · 10-12-2009 05:57 AM

يا جماعة واحد صاحبى جاب العربية قبل العيد وهوا ماشى بيها العجلة الشمال ورا قفشة فرامل مرة واحدة قدام عنيا وهوا حلف لى انو مالمس الفرامل

**mtradwan** · 10-12-2009 03:21 PM

المشاركة الأصلية كتبت بواسطة tamagogo

لا حول ولا قوة الا بالله. وحدوا الله. مافتكرش ان الاستاذ مضطهد الصيني ولا حاجه. بس كل حاجه المفروض تتحط في مكانها الصحيح ونبطل ناخد الموقف المتطرف في كل حاجه. ياما بتعشق الصيني يا اما بتكرهها عمى.

الشيري مناسبه لفئه كبيره من الناس اللى يهمها السعر اكثر من الامان والجوده, خلاص ربنا يباركلهم بس لازم يكونوا عارفين ده ان عربياتهم مش امنه ومش في مستوى جوده العربيات المنافسه الاغلى.
والاخوه اللى بيشتروا عربيات تايه زي التويوتا والهوندا بيدفعوا اكتر في مقابل الجوده والامان والعمر الطويل المتجرب. وفاكر كان فيه استاذ في التسويق بيقول ان الغالي رخيص لانه على المدى الطويل ما بيكلفكش كتير في مشاكله, وزي مثلا الاخ اللى باع التيجو بعد كام شهر عامله 9000 كيلو بخساره 17000 جنيه, ديه لو كانت تويوتا ماكانش خسر كده.

انا شخصيا رفاهيتي ومتعتي في عربيتي وما اطيقش اسمع فيها صوت تكته او تزييق, وبحب اركب عربيه عفشتها ناعمه ماحسش بالمطبات زي الكورولا , ولما ادوس بنزين العربيه تجري والاقي تكييف تلاجه, واعتقد ان الصيني لا يقدم هذا المستوى من الجوده.

المهم ان اللى معاه عربيه يكون صادق ومايخبيش عيوبها او مميزاتها, لانها امانه وربنا هيحاسبه عليها.

وشكرا

حضرتك بتتكلم عن الصينى ... هل من منطلق انك جربته ولا سمعت عنه ...* اذا كنت جربت سواقة الصينى وبتقول انه مش امان يبقى حضرتك مش واخد بالك ان فى العربيات الصينى فيها امان اكتر من عربيات تانية كتير فى فئتها واعلى منها فى السعر زى الاكسنت مثلا وترعف مثلا ان سمك الصاج فى بعض العربية الصينى اعلى من سمك الصاج فى عربيات تانية زى الاكسنت وتعبر الاكسنت اعلى فى السعر من الصينى .. وايضا الصينى فيها مثلا اير باجز و aps و ebd مش موجودة فى عربيات تانية كتير اعلى منها سعرا برده زة النيواكسنت ... لازم ياجماعة لما نقارن بين العربيات لازم نكون جربناها انا مش محامى او بدافع عن العربيات الصينى لكنى جربتها وكل يوم العربيات دى بتزيد اوى وهييجى يوم ومش هتلاقى الا الصينى فى مصر.
* اما لو انت ماجربتهاش اصلا يبقى لازم تجربها علشان تحكم عليها علشان يبقى نقدر نقوا اسال مجرب ولا تسأل طبيب ده المثل اللى دايما معظمنا يتبعه.
والاختلاف فى الرأى لا يفسد للود قضية
انا اسف انى طولت عليكم .
وجزاكم الله خيرا