فى زمن انعدمت فية الاخلاق وبقت قلة الضمير والنصب والغش فهلوة وشطارة وجدعنة وبالتالى وجب التحذير من معارض العربيات الخليجى والعربيات اللى من غير ضمان وتحديدا جابر عبد الشهيد واتو سمير ريان (لأن الموقفين كانوا مع المعرضين دول)

الموضوع عبارة عن موقفين فى احد مراكز خدمة التكييف المشهورة والمعروف عنها كفائتها وسمعتها فى اصلا تكييفات العربيات
المهم الموقف الاول عربية كيا سيراتو 2009 بورقها ومن غير نمر تبع جابر عبد الشهيد داخلة المركز علشان تشحن فريون!
طيب عربية زيرو وتشحن فريون يعنى فى تسريب من مكان ما لأنها مش هتطلع من المصنع من غير فريون يعنى لو افترضنا انها عيب صناعة فالواجب يتكشف عليها ويتحدد مكان التسريب الاول ويتم اخطار العميل اللى هيشتريها بعيبها . لأ دى جاية على اد شحن بس !!
المصيبة الافجع ان كان واضح من كلام الناس هناك مع الشواق اللى حايبها وكلام احد العملاء معاة هناك ان دى مش اول مرة لأ الموضوع متكرر وان لازم كل شحنة يطلع فيها كام عربية فيها عيوب ..طيب هل المستهلك الغلبان هيعرف بالعيوب دى؟؟؟

-----

الموقف التانى والافجع روحت المركز لقيت عربية كيا بيكانتو وزيرو بردة واقفة هناك
انا للصنايعى: انتم اية حكايتكم مع الكيا كل شوية عربية كيا زيرو تشحنولها التكييف .. اية الحكاية؟
الصنايعى : لأ دى مش شحن دى بتركب تكييف
انا : يعنى اية تركب تكييف ؟؟! العربية لسة زيرو !!
الصنايعى : المعرض باعتها يركبلها تكييف
انا: دة جابر عبد الشهيد بردة؟
الصنايعى : لأ اوتو سمير ريان
انا: يعنى هو باعت العربية زيرو يركبلها تكييف وترجع تانى المعرض؟
الصنايعى: ايوة
انا: وطبعا العربية هتتباع على انها بتكييف فابريكة
الصنايعى : اكيد والادهى من كدة ان العربية مكتوب عليها "صنعت طبقا للمواصفات القياسية الخليجية" !!
انا: خليجى ومن غير تكييف!!!!
الصنايعى : هو كدة جمرك العربية على انها مفهاش تكييف يعنى جمارك اقل وركبلها التكييف وهيبيعها بنفس سعر اللى بتكييف يعنى كسبان من الناحيتين !!
انا: فى الاخرة لما يطلع فوق خلى التكييف والجمارك ينفعوة!!!!!!!!!!!!!!!!!!!

طبعا لا تعليق بعد اللى شوفتة دة عربيات بتتلصم وتتباع على انها سليمة ومفهاش حاجة وعربيات تانية بيركبلها حاجات وتتباع على انها فابريكة وعربيات تالتة تتخبط وتترزع وتتسمكر وتتباع على انها زيرو
زمان كانت المعارض بتعلق على عداد الكلم " اصل العربية بتتنقل من المعرض للمخزن للمعرض التانى " انما واضح انها بتتنقل من المعرض للميكانيكى والسمكرى وهنا وهنا وترجع تانى المعرض زيرو !!!!!
دة كلة والناس مش عاجباها المستعمل !
لنـــــــا الله !