الموضوع: مكونات التكييف

اصدقاء محبى السيات
هتكلم انهارده عن التكييف بتاع الابيزا 1000 و هشرحلكوا مكوناته و طبعا على قد علمى و معرفتى فقط و مستنى طبعا مشاركتكم كالمعتداد
تكييف العربيه بيتكون من اجزاء كتير

• اجزاء كهربائيه علبة الفيوزات و الكتاوت و ازرار التكييف
• الكويل الداخلى
• الخراطيم
• مروحه الصالون
• مجموعة البوابات
• مروحه الموتور
• الاكسبانشن
• فلتر الفريون
• فلتر الهواء
• ثرموستات
• الكباس
• قاعدة الكباس
• السرابانتينه
• غاز الفريون

دورة التكييف بصفه عامة فى العربيه زيها زى اى تكييف فى البيت او حتى زى فكة الثلاجه كلهم قائمين على نفس النظريات مع بعض الاختلافات البسيطه
هحاول اشرحلكم كل جزء من اجزاء التكييف و وظيفته

• الكباس وده بيكون مكانه فى موتور العربيه و بيكون متركب على قاعده من الالومنيوم و لازم تكون القاعده الاصلى وماينفعش فيها القاعده الحديد اللى بيركبها الصنايعيه

دور و وظيفة الكباس انه هو اللى بيضغط غاز الفريون و بيحركه داخل دايرة التكييف و طبعاً الضغط ده بيسبب حراره و سخونة الفريون بشكل كبير .

• السرابانتينة مكانها فى مقدمة السياره متثبتة مع الريداتير

دورها هو تبريد الفريون اللى جاى من الكباس و هو ساخن و هى بتعمل عمليه التبادل الحرارى اللازم لتبريد الفريون

• مروحه الموتور و هى مكانها فى مقدمة السياره خلف الريداتير و السرابانتينه

وظيفتها هى اتمام عمليه التبادل الحرارى و تبريد الفريون باسرع وقت ممكن و بتكون سرعتين كل سرعه على حسب سخونه و ضغط الفريون

• الثيرمو ستات و مكانه بيكون اما على فلتر الفريون او فى السرابانتينه

وده ليه وظيفتين

1. بيحدد سرعه المروحه الاولى او الثانيه على حسب سخونة و ضغط الفريون
2. بيعطل او بيشغل الكباس فى حاله زيادة السخونه او الضغط العالى جداً او فى حالة تسرب الفريون حتى لا يتلف الكباس

• الاكسبانشن و ده مكانه قبل صالون العربيه مباشرة و قبل الكويل

و ده يعمل بدور خانق للفريون اللى هو جاى من السرابانتينه بعد لما اتبرد شويه و هنا و بسبب الخانق ده بيتحول الفريون من الدافىء الى البارد

• الكويل و ده مكانه داخل السياره خلف التابلوه مباشره

و ده وظيفته انا بيستقبل الفريون البارد و بينفل البروده دى الى جسم الكويل وبالتالى بينقله الى الصالون عبر فتحات التكييف

• مروحه الصالون و دى مكانها داخل السياره قبل الكويل مباشره و هى 4 سرعات

و دورها سحب و تدوير الهواء داخل السياره مروراً بالكويل و هنا بتتم عمليه سحب الهواء البارد الى صالون السياره

• فلتر الهواء و هو موجود فى بعض الموديلات خارج الصالون و الاخر داخل الصالون

وظيفته حجز الغبار و التراب من دخوله السياره

• فلتر الفريون و هو موجود داخل حوض الموتور

و دوره انا بينقى الفريون من اى شوائب قبل دخوله الى الكباس

• مجموعة البوابات و دى مكانها داخل السياره خلف التابلوه

و دورها هو توزيع الهواء البارد حسب الاحتياج و دورها كمان اما ان تاتى بالهواء من خارج السياره او من داخل السياره
و اخيرأ الدوائر الكهربائيه و المفاتيح و الكتاوت و دى مكانها فى داخل و خارج السياره و هى اللى بتشغل كل المنظومه دى

مع تحياتى
محمد مصطفى