الموضوع: تنك ال 405

المشاركة الأصلية كتبت بواسطة kareem_ashmawy

رمضان كريم يا احمد بك
انت تدى دروس فى ال405 بقى من هنا و رايح

اهى تجربة ونفذنها لعل تنفع اى حد من الأعضاء

المشاركة الأصلية كتبت بواسطة the-hero

السلام عليكم ورحمه الله وبركاته
أزك يا رجالة عاملين ايه رمضان كريم والكل يشد حيله بقي أحسن هيخلص والفرصة ديه مشهتتعوض غير السنة الجايه
وكمان دخلين على العشرة الاواخر وليلة القدر والاعتكاف فالكل يفضى نفسه ويسيبه من مشاغل الدنيا كله فانى

انا كان عندى ريحه بنزين فى العربية بتبان جامد فى الصالون عند التفويل وديه مشكلة خطيرة جدا ريحة شديدة بنزين 92 سريع الاشتعال أى حد مولع سيجارة ممكن العربية تنفجر بينا
المهم دورت قلت أكيد الخراطيم فيها حاجة
وثانيا التنك عندى كان مخروم من السروجى الله يسامحه بقي كان مركب لى دواسه جلد وجه فى الاخر تحت الكنبا دق مسمارين عشان البرشما فخرم التنك
انا طبعا مكنتش معاه ساعه معمل كدا كنت أكيد سيبته ورحت اصلى لكنى لما شفت البرشام قلت اكيد خرم الاول واكيد ميعرفش ان التنك تحت الكنبا مباشرة فأكيد التنك اتخرم وريحه كانت بتزيد مع التفويل

المهم قررت وعزمت النيه على خوض التجربة الجديدة فى فك التنك بنفسي ومساعدة واحد صديقى
رفعت العربيه من النحيتين
فكيت الكنبا اللى ورا وفكييت فبرا العوامة وفكيت فيشة العوامه وكمان الخرطومين بتوعها
تحت التنك ممسوك ب 2 كابولى بطول العربية واحد يمين والتانى شمال وداخل فوق ماسورة الشكمان
فكيت ال 2 كابولى مسمار 13
وفكيت زور التنك الرئيسي وكمان خرطومين الفايز
وينزل التنك من الجنب اليمين للعربية ويتسحبناحيه اليمين برضه مع تسليك وتنفيد الطبب البارزة منه من الشكمان يعنى واحد يسحب من اليمين وواحد يسلك من تحت
وأخيرا التنك طلع بره العربية
لقيت خرم فيه لحمتة بمعجون حديد ولقيت قطع فى المواسير قصيت منها المقطوق وأديتها أفزان جديدة
لكن التانك فبر بس قمة فى الامان وخامه أحسن من الصاج بكتير وبيتحمل كتير ولو أتخبط الفبر لين ميتكسرش تحفة قعدت أتأمل فيه مده
بجد الناس دول بيبدعوا فى العربيات ديه تحفة
ورجعت ركبت بعكس طريقة الفك
يعنى من اليمين زق وتدخيله فوق الشكمان مع تركيب الخراطيم فى مجاريها لحد مدخل فوق الشكمان فى مكانة مع الرفع لفوق من اليمين
وتركيب الكاوابيل تحتيه وربطهم وربط الأفزان بتاعت الزور وتقفيل خراطيم الفايز تحت
وتركيب خراطيم العوامة وفيشتها وتركيب غطاها وتركيب فوقيهم الكنبة
وخلصت الليلة
ورمضان كريم

تسلم ايدك ياباشا وماينفعش كده عايزين تاني مره الشغل بالصور علشان الاستفاده تزيد
علي فكره التانك الفبر احسن 100 مره من الصاج انا مره بتاع قطع غيار قالي انه ب3000 جنيه ومتقسم من جوه نصين الاساسي والاحطياطي ولما يخلص الاساسي يقوم موتور يقلب التانك علشان البنزين يتسحب من الاحطياطي فعلا الناس دي مابتهزرش وتلاقي الناس لما يبوظ التانك الفير يغيروه بصاج

ايه الحلاوه دي يااحمد ياقوت بس والله حلوه حكايه انك اتفقت مع ميكانيكي يديك صبي

المشاركة الأصلية كتبت بواسطة nabaster

بسم الله ما شاء الله عليك

انتا دماغك زي الفل يا احمد (الله اكبر)

انا عملت زيك كده بس كانت في فيات سينا

كانت عربية خالو وكنا مسافرين القاهره المهم جه في مطب وراح مظبط التنك من تحت لان التانك عنده هوا صاج

وعينك ماتشوف الا النور حنفية بنزين اتفتحت

المهم بعد طريق الكريمات في حته اسمها المعصره نزلت فيها هناك وكانت اساعه 7:30 الصبح ومفيش ورشه فتحت

المهم هوا اتصل بشركته بعتتله عربيه وراح يشوف مصالحه وسابني انا بالعربيه

انا نمتلي ساعتين فيها كده وصحيت والف علي اي حد يشتغل في العربيه محدش راضي يحط ايده فيها

قلت مبدهاش بقي

روحت نقيت ورشه كده نضيفه واتفقت معاه اني هستخدم العده بتاعته و هيساعدني صبي من الي في الورشه ويوميته عليا وهدي صاحب الورشه الي فيه النصيب اخر النهار

المهم نقيت واد حرك كده من الصبيان ورفعلي العربيه علي كوريكين تمساحه

ومقولكش علي الي شوفته

العربيه من تحت تانك البنزين مصمم بطريقه غريبه والعربيه ضيقه جدا من تحت

تانك البنزين من تحت مثبت بـ 8 صواميل 10 وطبعا بتدور بقي علي المسامير دي ويادوب بتلاقي بالصدفه

المهم فك فك حوالي ساعتين علشان احرك التانك بس من مكانه

طلعت التانك وغسلته بالخل وطلعت علي ورشة لحام ظبطه وتمام التمام

ركب بقي يا رايس

العربيه مش ناطقه ولمبة الرشاشات في العربيه منوره

قلت طيب اعيد علي الوصلات تاني عدت عليها كله تمام ربنا الهمني قلت طيب العيب يمكن في العوامه

خليت الواد يدور العربيه وفعلا لاقيت العوامه مش شغاله

العومات الكهربا عموما ليها زنه مسموعه وفعل لاقيت العوامه فاصله

طيب ايه العمل دي مصيبه فعلا

العوامه بتاعة العربيه دي كهربا تمنها استيراد 1200 جنيه

وفي التوكيل 3500

روحت فكيت العوامه وخرجتها بره وقلتله اوصفلي اقرب كهربائي

روحت للكهربائي واجرب الاقي العوامه شغاله طيب ايه المشكله؟؟؟؟؟؟

اخدته معايا راح طالعلي بفكرة اننا نعملها توصيله خارجيه مؤقته

قلتله يعني انا لو سايبك لواحدك هتخلي العربيه تنفجر مش كده؟؟؟ وانتا تموتلي جواها

بيقولي ليه يا بيه وبتاع

قلتله دي عوامه كهربا يعني في موتور جوه واي شرز مع البنزين بالسلامه وياك تعملها في اي عربيه تاني (الكلام ده سمعته من كهربائي في التوكيل)

المهم قعدت امخمخ انا مع نفسي وروحت قلت انضف الفيشه بتاعة العوامه وامشي ورا السلك بتاعها لان كده ان شاء الله العوامه سليمه

ظبط الدينا وتمام التمام وهوب بدور وراحت نطقت الحمد لله

طبعا الكهربائي واقف جمبي والميكانيكي خلص شغل الورشه وواقف معايا ومفيش حد سامع منه نفس

والي ضحكني في وسط الموضوع بقيت لما بطلب حاجه من الصبي الاقي الراجل الميكانيكي هوا الي بيجبهالي ههههههههههههههههههههههه

المهم خلصت وقفلت الكنبه والشنطه وكله تمام وحاسبت الميكانيكي والكهربائي تخيلو الاقي الساعه كام؟؟ 8:30 تخيلو؟؟؟

وانا مش نايم قبلها وسفر وطلعان عين الي جابوني

لاقيت خالو بيتصل وانا لسا بدور وبيقولي انا جاي في السكه قلتله تعالي يا عم العربيه لسا خلصانه

مروحين اسيوط والله بنام علي بعض وكل نص ساعه اقف ابدل واغسل وشي

وتوته توته خلصت الحدوته :)

a.yakout

الله ينور عليك
القصة كلها حكاية جرأه
يعنى جمد قلبك واعتمد على الله
وحط فى أعتبارك ان الصنايعي أساسا مبيعملش حاجه
أخرة يفك يغير يركب وشكرا
يبقى انت متعملش كدا ليه