السلام عليكم ورحمه الله

راجع من شغلي وخارج منه الساعة 3
ومتجه من النزهة الجديدة لجسر السويس
وبتكلم مع اخونا شنوري في الموبايل لقيت واحد بيرمي عليا باكسنت نبيتي
بعدت عنه وقلت ده مجنون ده لقيتة كانه سمعني وانا قافل الازاز وهو بيشاور عليا وبيقولي يا مجنون
شنوري بيقولي مالك قولتلة تقريبا واحد بيتخانق
قاللي سيبك منه وكملت كلام لكن الاخ التاني مش عايز يبطل قرف
قفلت مع شنوري وحرقت الغيار وحصلتة عند زحمة سوق القنال عشان اشوف ماله من غير مافتح ازاز عربيتى حتى
لقيتة قرب عربيتة مني وبيشتم
فتحت ازاز عربيتي بيقوللي مالك بقي يا لولو
استغفرت ربنا وقولتلة شكلك عايز تتخانق وانا صايم وبقفل الازاز
قام شتم بجد بقلة ادب ماستحملتهاش قمت زنقت عليه بالعربية مع انه كان قدامي
زاغ مني لكني كنت نويت اجيبة مهما كان
جبتة وطلعت قدامة ووقفتة وهو وابل شتايم وانفتح
نزلت من العربية وقولت ولا هاشتم انا هاحط الصاعق في بقة واللي يحصل يحصل
البية نزل ماسك طبنجة
اه والله العظيم طبنجة وشكلها ممسوك كتير وكالح وشكلها ميري اللي بيسموها حلوان يعني واضح انها حي
انا مش بفهم في انواع الاسلحة بس واضح من شكلها انها ميري لاني بعرف شكلهم
وقام حاططها في الحزام وقاللي مالك بقي يا وشتم
كل ده انا مش عايز اخسر صيامي واشتمه مع اني مش عاجز
ربنا سبحانة وتعالي الهمني
روحت فتحت باب العربية ورميت الصاعق وخدت الموبايل
وفتحت الكاميرا
وقولتلة سمعني بقي كنت بتقول ايه يا حيلة اللي جابوك
والله لو كنت فتحت علية رشاش ما هايكون رد فعلة زي كدة
اتنطر لورا خطوتين ووقف محلك سر ومش عارف يتحرك
وانا عشان كنت وقفت جسر السويس عند سوق القنال وناس في ميني باص وميكروباصات شايفين اللي حصل قعدو يسقفو لانهم كانو حاسين بالظلم وانه كان بيحاول يحتك بيا وهو الي عمال يشتم وانا ساكت
جاتلة صدمة وركب عربيتة بس ماعرفش يتحرك عشان كنت قافل علية صح وميكروباص كان في ضهرة
للاسف ماكنتش صورتة عشان موبايلي الديفولت بتاعة بيفتح على الصور مش الفيديو
ولازم ادخل اوبشن واختار فيديو ودماغي ماكنتش جايباني لكدة وقتها

خاصة لما قربت الموبايل من وشه (بس كان مش بيصور ) ومن نمرة عربيتة جاتلة حالة هلع
وحمدت ربنا انه الهمني اعمل كدة لاني لو كنت اتخانقت معاه بالصاعق وهو ضربني بالنار هايكون في حالة دفاع شرعي عن النفس

بجد انا مش متخيل ان في مجانين بالمنظر ده خاصة لما طلع يجري بعد ما مشينا بيحاول يزنق عليا وانا صورته من ورا عشان اصور النمرة
وبعد كدة حرقت على الغيار وكنت هاطلعة فوق الرصيف بس مارضيتش بدل مايموت واورح في داهية في كلب زي ده
لما رجعت بيتي تخيلت اي بني ادم مظلوم يقع في ايدة هايعمل فيه ايه
طبعا هو شكلة 99% ظابط خاصة من شكلة وجسمه وهيئتة وسنه مش صغير في اوائل الاربعينات
اما عن وشه والله كأن علية غضب الله
سواد مش طبيعي مش سواد لون لكن سواد مش عارف اوصفه
ربنا يرحمنا من امثال المجانين دول لان البلد بقت مليانة منهم
انا محتفظ بالفيدو وبالصورة اللي فيها نمرة عربيتة
ونفسي اقابلة تاني بس ماكنش صايم